Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ PANGERAN duka pole ka Isra’il, laju nyacae Daud, maksodda madhatengnga kasossa’an ka bangsa jareya. Dhabuna ka Daud, "Mara badha’agi sensus e Isra’il ban Yehuda."

² Daud laju adhabu ka Yowab panglimana tantarana, "Mara ba’na abareng ban ra-parwirana entar ka sakabbinna suku Isra’il badha’agi sensus sanagara reya. Sengko’ terro taowa barampa bannya’na."

³ Tape Yowab mator ka rato, "Moga-moga ra’yat Isra’il sareng GUSTE Allahepon junandalem epatamba’a bannya’ kantos tekel saratos kalena se samangken, ban moga junandalem gi’ eparengngana odhi’ sopaja kengenga ngoladi. Namong ponapa parloepon sensus gapaneka?"

⁴ Tape rato ta’ kasokan ngoba papakonna jareya. Daddi Yowab ban para parwirana laju ngetong bangsa Isra’il.

⁵ Saellana alengka Songay Yordan, Yowab ban reng-orengnga akemah e lao’na Aroër, settong kottha e nga’-tengnga’anna cora e dhaera Gad. Dhari jadhiya reng-oreng jareya terros dha’ dhaja, ka Yaezer,

⁶ pas terros ka Gileyad ban ka Kades e dhaerana oreng Het. Saellana jareya laju terros ka Dan, dhari Dan laju abiluk ka bara’, ka Sidon.

⁷ Dhari jadhiya reng-oreng jareya entar ka lao’ ka Tirus kottha se abinteng rowa. Saterrossa laju entar ka sakabbinna kotthana oreng Hewi ban oreng Kana’an, ban dhi-budhina ka Bersyeba, e bagiyan lao’na Yehuda.

⁸ Reng-oreng jareya entar ka sakabbinna bagiyanna nagara jareya sampe’ epabalattra e dhalem bakto sangang bulan dhu polo are. Samarena laju padha abali ka Yerusalim.

⁹ Hasella sensus jareya eatorragi ka rato. Bannya’na lalake’ se nyokobi sarat kaangguy epadaddi tantara badha ballung atos ebu oreng e Isra’il ban lema ratos ebu oreng e Yehuda.

¹⁰ Tape saellana mare ngetong bangsa jareya, Daud arassa sala, daddi mator ka PANGERAN, "Adhu, GUSTE, abdidalem ce’ dusana! Nyo’ona sapora abdidalem, GUSTE, sabab abdina ce’ budhuna ngalakone barang se kadi ka’dhinto."

¹¹ PANGERAN adhabu ka Nabbi Gad se daddi parantarana Pangeran ban Daud, "Kassa’ kabala ka Daud ja’ Sengko’ aberri’ peleyan tello macem. Se kemma’a bai se epele Daud bi’ Sengko’ ejalannagiya." Kalagguwanna, saellana Daud abungo,

¹² (24:11)

¹³ Gad ngadhep, manapa’ dhabuna PANGERAN, atorra, "Ka’dhimma se epeleya junandalem: Nagara ka’dhinto ekenneng laep tello taon abittepon, otabana junandalem buru eserser moso tello bulan abittepon, otabana nagara ka’dhinto ekenneng wabah panyaket tello are abittepon? Ngereng potossagi samangken jugan se ka’dhimma se epele junandalem, amarga sareng abdidalem eatorragiya ka PANGERAN."

¹⁴ Dhabuna Daud, "Adhu, palang kaula! Tape etembang kaula eokom manossa, langkong sae eokom PANGERAN, sabab PANGERAN paneka raja bellas asena."

¹⁵ Daddi PANGERAN madhateng wabah panyaket ka oreng Isra’il molae dhari gi’ laggu sampe’ ka bakto se la eteptebbagi Salerana. Sanagara Isra’il badha pettong polo ebu oreng se mate.

¹⁶ Malaekadda PANGERAN se ngeba maot jareya la napa’ ka kennengnganna pagebba’anna gandum andhi’na Arauna, oreng Yebus. E bakto ngoladi ja’ malaekat jareya la mola’ana mamosna’a Yerusalim, laju ngoba potosanna, pas ambu se ngokom bangsa jareya. Dhabuna ka malaekat jareya, "Ella cokop! Ambu!"

¹⁷ Daud ngoladi malaekat se teppa’na mate’e ra’yat jareya, laju mator ka PANGERAN, "Abdidalem se dusa, sabab abdidalem se alako sala. Ponapa kasala’anna ra’yat se palang ka’dhinto? Ngereng abdidalem sabala saos okom, GUSTE!"

¹⁸ E are jareya keya Gad ngadhep ka Daud laju mator, "Ngereng junandalem meyos ka pagebba’anna gandum gadhuwanna Arauna abadhi mezba e ka’dhissa’, atorragi ka PANGERAN."

¹⁹ Daddi Daud laju mangkat menorot dhabuna PANGERAN se epanapa’ kalaban parantara’anna Gad jareya.

²⁰ Kabendherran Arauna teppa’na nyongngo’ ka baba, laju nangale’e rato ban para pangerengnga ongga ka kennengnganna. Arauna asojud e ajunanna Daud, laju atanya,

²¹ "Badha ponapa junandalem me’ meyos ka ka’dhinto, guste?" Dhabuna Daud, "Melleya kennengnganna pagebba’anna gandum reya; sengko’ agabaya mezba e dhinna’, eatorragiya ka PANGERAN, sopaja wabah panyaket reya ambuwa."

²² Atorra Arauna, "Ngereng pondhut saos, guste, atorragi ka PANGERAN ponapa se sareng junandalem eanggep sae. Ka’dhinto pe-sape badhi kurban obbaran; manabi parlo kaju badhi apoyya, agem saos dalangkedanna salaga sareng pan-papanna pagebba’an."

²³ Jareya kabbi bi’ Arauna eatorragi ka rato sambi mator, "Moga Guste Allahepon junandalem kasokana narema tor-atorrepon junandalem, guste."

²⁴ Tape rato adhabu, "Enja’! Bi’ sengko’ ebelliya. Sengko’ ta’ endha’ ngatorragi ka tang GUSTE Allah barang ollena ri’-berri’na oreng." Daud laju mondhut pagebba’anna gandum jareya ban pe-sapena, ebajari pesse salaka saeket.

²⁵ E jadhiya Daud maddek mezba eatorragi ka PANGERAN, pas ngatorragi kurban obbaran ban ban-kurban karokonan. Parnyo’onna Daud ekabbuli bi’ PANGERAN, ban wabah panyaket jareya laju ambu.

2 Samuel

Video 2 Samuel 24

Ikuti Kami:

KONTAK | PARTISIPASI | DONASI