Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lit denga ate TUHAN nembeh nandangi bangsa Israel sekali nari, emaka IbahanNa Daud maba kesuliten man bangsa e. Nina TUHAN man Daud, "To lawes jenari kira kerina rayat Israel ras Juda."

² Emaka ibereken Daud perentah man Joap puanglima tenterana, "To lawes ras pegawaindu ku kerina suku-suku Israel mulai i bas ujung negeri ku ujungna si deban. Jenari kira rayat e, kueteh ateku beliganna."

³ Tapi ijabap Joap raja, "O Tuanku Raja, mungkin TUHAN Dibatandu mahan beligan rayat Israel seratus kali nari asang si genduari e. Janah mungkin nggeluh denga kam ngidah perbahanen TUHAN Dibatandu e. Tapi ngkai maka Tuanku Raja merincuh erbahan sensus?"

⁴ Tapi iusahaken raja maka Joap ras pegawaina ngikutken perentahna, itadingken kalak enda adep-adepen raja jenari lawes ia kerina meligai rayat Israel.

⁵ Ikepari kalak enda Jordan jenari erkemah ia i Selatan Arur kota i tengah berneh, i daerah Gat. I jah nari lawes ia kerina ku Utara Jaser,

⁶ jenari seh i Gileat jenari ku Kades i daerah Heti.

⁷ Kenca bage lawes ia ku Dan janah i Dan nari lawes ia ku Selatan kota kalak Hewi ras kalak Kanaan, jenari si perpudina ku Berseba i bagin Selatan Juda.

⁸ Emaka kenca siwah bulan dua puluh wari mulihken ia ku Jerusalem nggo idalanina kerina negeri e.

⁹ Ilaporkenna man raja kerina beligan kengasupen militer eme: 800.000 i Israel janah 500.000 i Juda.

¹⁰ Tapi kenca Daud nggo erbahan Sensus e, pusuh peratenna mulai la senang, emaka nina man TUHAN, "Nggo mesangat dosa si kubahan alu erbahan sensus e! Alemi min dosangku erkiteken kebodohenku e."

¹¹ Nina TUHAN man Gat nabi si Daud, "To dahi Daud janah kataken man bana maka Kubereken man bana telu si man pilihenna. Kulakoken si apai si ipilihna." Pepagina erpagi-pagi, kenca Daud medak,

¹² (2Sam 24:11)

¹³ idahi Gat ia, iturikenna man Daud kai si nggo ikataken TUHAN, kenca bage nungkun Gat, "Si apai si ipilihndu? Telu tahun dekahna kelihen i negerindu, ntah telu bulan kam kiam i bas adep-adepen musuhndu, ntah telu bulan dekahna penakit sampar i negerindu? Genduari ukurken manjar-anjar. Jenari turiken man bangku jabap si apai si kubaba mulih man TUHAN."

¹⁴ Nina Daud njabapsa, "Aku i bas keadan sakit. Tapi la ateku manusia si ngukum aku. TUHAN jinelah si ngukum aku, sabap perkuah AteNa."

¹⁵ Jenari ibereken TUHAN penakit sampar man Israel, menaken erpagi-pagi nari seh paksa si nggo itetapken, i bas ujung negeri ku tampukna si deban emaka mate me 70.000 kalak bangsa Israel.

¹⁶ Kenca menam kernep Jerusalem, erkusur ukur TUHAN kerna ngukum bangsa e, jenari nina man malekat si munuhi bangsa e, "Bias! E nggo bias!" Malekat e lit i ingan ngerik Arauna kalak Jebusi.

¹⁷ Idah Daud malekat e si nggo munuhi rayat e jenari nina man TUHAN, "Aku jine si ersalah. Aku saja si nggo erbahan lepak kai kin si nggo ibahan rayat si musil enda? Arus maka aku ras keluargangku nge si IukumNdu."

¹⁸ I bas wari e ka idahi Gat si Daud jenari nina man bana, "To lawes ku pengeriken Arauna, janah pajekken sada batar-batar persembahen man TUHAN."

¹⁹ Ipatuhi Daud perentah TUHAN emaka lawes ia bagi si nggo ikataken Gat man bana.

²⁰ Ipernehen Arauna ku berneh janah idahna raja ras pegawaina nangkeng ndahi ia. Idampeskenna bana ku taneh i lebe-lebe Daud

²¹ jenari nungkun ia, "Tuanku Raja, erkai kam ku jenda?" Nina Daud njabapsa, "Nukur ingan pengerikenndu janah majekken sada batar-batar persembahen man TUHAN gelah ngadi penakit sampar e."

²² "Buatlah, Tuanku Raja," nina Arauna, "janah persembahkenlah man TUHAN kai iakapndu mehuli. I jenda lit piga-piga lembu man tutungen jadi sada persembahen i babo batar-batar e. Enda pasangen-pasangen gereta lembu ras kayu-kayu pengeriken man rantingna."

²³ Ibereken Arauna e kerina man raja jenari nina, "Mbera ialoken TUHAN Dibatandu persembahenndu."

²⁴ Tapi nina raja erjabap, "Labo bage, kugalari nge e kerina man bandu. La kupersembahken man TUHAN Dibatangku persembahen-persembahen la ertukur." Emaka igalarina ingan pengeriken ras lembu e lima puluh duit pirak.

²⁵ Kenca bage ipajekkenna sada batar-batar persembahen man TUHAN jenari ipersembahkenna persembahen tutungen ras persembahen persadan. Emaka penakit sampar i Israel nggo ngadi.

2 Samuel

Video 2 Samuel 24

Ikuti Kami:

KONTAK | PARTISIPASI | DONASI