Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nipilei Daud ana’na Isai a’jari karaeng siagang nipa’jari tumalompoi ri Allata’alana Yakub. Iami appare’ kelong-kelong untu’ tu Israel. Na iaminne kana-kananna Daud kala’busanga:

² Le’baki mangkana RohNa Batara tete ri nakke; pasang siagang passuroNa niaki ri muncengku.

³ Le’baki a’bicara Allata’alana Yakub; Nakana pannulunna tu Israel ri nakke: "Karaeng ammarentaya ri ra’ya’ lalang kaadelang ampimpingai mappilangngeri mae ri Batara,

⁴ rapangi caya singara’ ammumbaya ri bari’basa’ dudua wattu singara’na langika. Rapangi singara’na alloa ri wattu le’ba’na bosi ampaccillaki ruku’ moncongbuloa ga’ga nicini’."

⁵ Kamma tomminjo jari-jariku batena Nabarakkaki Allata’ala, parjanjianNa ri nakke tena pamminraNa, mannannungang siagang sangkaki janjinNa, yangasenna bajiki atoro’na. Natanggongi Allata’ala pammetangku na Naturuki sikontu apa Nakaerokia pa’maikku.

⁶ Mingka tau tamappilangngeria ri Batara rapangi katinting nipatappasaka. Takkulleai nita’gala’ ri limanna taua;

⁷ manna sitau tania’ ero’ ambuttuki punna tammakea pa’lapa’ kayu yareka bassi limanna. Possoki tau kammaya anjo nikanre ri pepe’.

⁸ Iaminne areng-arenna perwira tantarana Daud ia masahoroka: Uru-urua iamintu Ishbaal, tu Hakhmoni, pamimpinna "Pa’gompoang Tallua". Le’baki lalang se’reang pa’bundukang kale-kalenna angngewa sagantuju bilangngang tau nanabuno kabusu’ anjo musunna siagang pokena.

⁹ Tau makaruaya lalang ri anjo Pa’gompoang Tallua iamintu Eleazar ana’na Dodo battu ri jari-jarina Ahohi. Ia anrurungangi Daud ri wattunna nadallekang tu Filistin le’baka a’rappung untu’ a’bundu’. Na ri wattunna ammono’ pasukang Israel,

¹⁰ tuli ammantanna Eleazar angngewai tu Filistin na natumpasa’ sa’genna mangngang dudumo nasa’ring. A’jari ka’doro’mi limanna sa’genna takkulleamo nalappassang pa’danna. Anjo alloa nisarei pammetang lompo tu Israel ri Batara. Anjo pasukang Israel ammonoka sumpaeng ammotereki ri tampa’na Eleazar a’bundu’, nampa nalakka’ baju pa’bundu’na sikamma mayaka anjoreng.

¹¹ Tau makatallua lalang ri anjo Pa’gompoang Tallua iamintu Sama ana’na Age battu ri Harari. Le’baki ri wattunna asse’re tu Filistin ri Lehi, ri se’reang koko rassia campe’ eja, larimi pasukang Israel ambokoi tu Filistin.

¹² Mingka Sama tuli ammantanna attahang a’bundu’, na nabuno siagang nabeta tu Filistin, sa’genna akkulle napartahangkang anjo kokoa. Kammaminjo nanisare pammetang lompo ri Batara.

¹³ Ri se’reang allo maraengang ri wattu a’birinnamo wattu pakkattoanga, nia’ tallu battu ri tallumpuloa perwira tantarana Daud kaminang porea naungi ri Leang Adulam. Anjo wattua niaki Daud lalang ri anjo leanga. Tu Filistin akkemai ri Lappara’ Ka’bung Refaim, siagang nia’mo sipa’gang pasukanna ke’nanga angngempoi Betlehem.

¹⁴ (23:13)

¹⁵ Nakkuki nasa’ring Daud mae ri anjo pa’rasanganna; nakanamo, "Ka’de’ nia’ kulleanna nakunisare je’ne’ inung battu ri bungung niaka ri ampi’na pakke’bu’ lompona Betlehem!"

¹⁶ Nalangngere’na akkana kamma Daud, mangemi anjo tallua perwira ampantamakki pakkemaanna tu Filistin, nampa anynye’ro’ je’ne’ battu ri anjo bungunga, nampa naerang mange ri Daud. Mingka taerokai Daud angnginungi, ba’lalo natumpai a’jari passare mae ri Batara.

¹⁷ Nampa nakana, "O, Batara, takkullea’ angnginungi anne je’neka! Punna kuinungi, kammai kusa’ring angnginunga’ cera’na tau le’baka ansaungi nyawana ke’nanga!" Jari tena sikali naero’ Daud angnginungi. Iaminjo jasa-jasana anjo tallua pejuang barania.

¹⁸ Anjo tallumpuloa perwira masahoroka niareng tongi "Tridasawira". Nipimpingi ke’nanga ri Abisai andi’na Yoab, ana’na Zeruya. Le’baki ammuno tau tallum bilangngang siagang pokena. Lanri kammana minjo na’jari masahoro’. Mingka tena nala’bi hebakkangngang na "Pa’gompoang Tallua".

¹⁹ (23:18)

²⁰ Nia’ sitau maraengannaya masahoro’ iamintu Benaya ana’na Yoyada tu Kabzeel. Ia sanna’ baranina. Nia’ rua pahlawang lompo battu ri Moab le’ba’ nabuno. Le’baki ri se’reang allo ri wattu naunna bosi kammaya es batu, nantama’ ri se’reang kali’bong nampa ammuno sikayu singa lalang.

²¹ Le’ba’ tongi ammuno sitau tu Mesir sannaka gammara’na siagang angngeranga sanjata poke. Nampa takkanja napake Benaya andallekangi anjo taua. Naalleangi pokena anjo tu Mesirka nampa napakei ambunoi anjo taua.

²² Iaminjo jasa-jasana Benaya, kalase’renna tau battua ri "Tridasawira".

²³ Lalang ri anjo pa’gompoanga Benaya kaminang masahoro’, mingka tena nasangkamma heba’na siagang "Triwira". Naangkaki Daud anne lapung tau a’jari kapala pangawala’ untu’ kalenna.

²⁴ Anggota-anggota maraenganga battu ri "Tridasawira" iamintu: Asael andi’na Yoab Elhanan ana’na Dodo tu Betlehem Sama siagang Elika tu Harod Heles tu Palti Ira ana’na Ikes tu Tekoa Abiezer tu Anatot Mebunai tu Husa Zalmon tu Ahohi Maharai tu Netofa Heleb ana’na Baana tu Netofa Itai ana’na Ribai tu Gibea ri daerana suku Benyamin Benaya tu Piraton Hidai tu ka’bung-ka’bung Gaas Abialbon tu Araba Azmawet tu Bahurim Elyahba tu Saalbon Ana’-ana’ bura’nena Yasyen Yonatan Sama tu Harari Ahiam ana’na Sarar tu Harari Elifelet ana’na Ahasbai tu Maakha Eliam ana’na Ahitofel tu Gilo Hezrai tu Karmel Paerai tu Arbi Yigal ana’na Natan tu Zoba Bani tu Gad Zelek tu Amon Naharai tu Beerot, paerang sanjatana Yoab Ira siagang Gareb tu Yetri Uria tu Het. Yangasenna nia’ tallumpulo antuju tantara masahoro’.

²⁵ (23:24)

²⁶ (23:24)

²⁷ (23:24)

²⁸ (23:24)

²⁹ (23:24)

³⁰ (23:24)

³¹ (23:24)

³² (23:24)

³³ (23:24)

³⁴ (23:24)

³⁵ (23:24)

³⁶ (23:24)