Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ri wattu ammarentana Daud, le’baki naalle cipuru’ lompo taua tallun taung sallona. Nampa appala’mo pangngunju’ Daud mae ri Batara lanri anjo passalaka, na Nakanamo Batara, "Anjo bala kacipuranga passabakkang kasalanna Saul siagang kaluargana, iamintu lanri nabunona tu Gibeon."

² (Anjo tu Gibeon teai tu Israel; anjo ke’nanga golongang ca’di lalang ri tu Amori. Le’baki a’janji tu Israel angkanaya lanala’langngi ke’nanga, mingka Saul eroki naputta ke’nanga lanri nanawa-nawana kaparalluanna tu Israel siagang tu Yehuda.) Nampa nakio’mo Daud anjo tu Gibeon,

³ na nakuta’nang ke’nanga angkana, "Apa akkulle siratang kugaukang mae ri kau ngaseng? Erokka’ ampakabajiki kasalang le’baka nigaukang mae ri kau ngaseng, sollanna nubarakkaki umma’Na Batara."

⁴ Appialimi ke’nanga angkana, "Anjo parkarana ikambe siagang Saul siagang kaluargana takkulleai nile’bakang lanri pera’ yareka bulaeng, mingka tena todong naero’ ikambe ambunoi tu Israel, manna pole sitau." Nakanamo Daud, "Punna kamma padeng, apa nukellai kugaukang?"

⁵ Appialimi ke’nanga angkana, "Anjo Saul, karaeng nipilea ri Batara eroki amputtai ikambe sa’genna lanynya’ kabusu’ ikambe battu ri sikontu butta Israel.

⁶ Lanri kammana anjo, passareangi mae ri kambe tuju tu bura’ne jari-jarina sollanna nagentung ikambe ri dallekanNa Batara ri Gibea, kota kakaraengang kalenna Saul." Appialimi karaenga angkana, "Baji’mi, lakupassareangi ke’nanga."

⁷ Mingka lanri anjo Daud siagang Yonatan le’ba’mi massing assumpa, tena napassareangi Daud Mefiboset ana’naya Yonatan.

⁸ Ia naallea Daud iamintu Armoni siagang Mefiboset rua-rua ana’ bura’nena Saul nilassukanga ri Rizpa ana’na Aya; kammayatompa lima ana’ bura’nena Merab iamintu ana’ bainena Saul; anjo ana’-anaka lassuki battu ri pakkalabinianna Merab siagang Adriel ana’na Barzilai, tu battua ri Mehola.

⁹ Nipassareangi ke’nanga mae ri tu Gibeon, nampa mate kabusu’mo ke’nanga nigentung irate ri bontoa ri dallekanNa Batara. Ri wattu kala’busanna wattu paccu’lakkanna lamung-lamunga nanihukkung mate ke’nanga, iamintu ri wattu appakkaramulana taua angngalle jelai.

¹⁰ Nampa Rizpa, baine piarana Saul, appaka’rangi kaeng karung untu’ kalenna irate ri batu pammantanganna maya’-maya’na. Tena nabokoi Rizpa anjo tampaka appakkaramula ri wattu pakkattoanga sa’genna turung bosia ri wattu runanna leko’-leko’ kayua. Tena nakellai anjo mayaka ngaseng nigaru ri jangang-jangang punna allo yareka ri olo’-oloka ri wattu bangngina.

¹¹ Ri wattunna nipabattuang Daud anjo apa nagaukanga Rizpa

¹² a’lampami angngallei buku-bukunna Saul siagang Yonatan battu ri pandudu’na kota Yabesh ri Gilead. (Le’baki anjo taua allukkaki anjo buku-bukua battu ri parang kotana Bet-San, iamintu tampa’na tu Filistin anggentungi anjo maya’-mayaka ri le’ba’na nabeta Saul ri Bonto Gilboa.)

¹³ Nierangi anjo buku-bukunna Saul siagang Yonatan battu anjoreng, nampa nipasse’re todong buku-bukunna anjo tujua tau le’baka nigentung.

¹⁴ Nampa nitarawang anjo buku-bukunna Saul siagang Yonatan kammayatompa buku-bukunna anjo tujua tau lalang ri jera’na Kish manggena Saul ri Zela ri daerana suku Benyamin. Ri le’ba’na ngasemmo nigaukang situru’ parentana karaenga, niturukiammi pappala’ doanna ke’nanga ri Allata’ala untu’ anjo pa’rasanganga.

¹⁵ Nakajariammo pole bunduka ri tu Filistin a’bali siagang tu Israel. A’bunduki Daud siagang ana’ buana angngewai tu Filistin. Lalang anjo pa’bundukanga mangngammi nasa’ring Daud.

¹⁶ Nia’mo se’re tu lompo kalenna niarenga Yisbi-Benob. Ia pokena tambaga nipare’, battala’na kira-kira nia’ tallu sitangnga kilo. Angngerang tongi pa’dang beru, siagang napattantumi angkanaya akkullei nabuno Daud.

¹⁷ Mingka niaki battu Abisai ana’na Zeruya antulungi Daud. Nabakkai anjo tau lompoa kalenna nampa nabuno. Le’baki anjo napala’mi ana’ buana Daud sollanna a’janji Daud angkanaya tenamo nalamminawang pole antama ri pa’bundukanga. Nakana ke’nanga, "Ikatte karaeng panrannuanna tu Israel, gassingka tenamaki’ sallang ri tangnga-tangngana ikambe."

¹⁸ Nakajariammo pole bunduka a’bali tu Filistin ri Gob. Lalanna anjo pa’bundukanga Sibkhai tu Husa ammunoi se’re tu lompoa kalenna niarenga Saf.

¹⁹ Lalang ri pa’bundukang maraengannaya a’bali tu Filistin ri Gob, Elhanan ana’na Yair battu ri Betlehem ambunoi Goliat battua ri Gat. Panna’gallang pokena Goliat sallompoi kayu pattannunga.

²⁰ Nakajariammo pole bunduka a’bali siagang tu Filistin ri Gat. Anjoreng nia’ se’re tau lompo kalenna sannaka nangaina a’bunduka. Karemeng limanna siagang karemeng bangkenna ta’annang kabusu’.

²¹ Nacau-caui tu Israel, na lanri kammanami anjo nanibunomo ri Yonatan ana’na Simea, daenna Daud.

²² Anjo appaka tau lompoa ngaseng kalenna nibunoa ri Daud siagang pasukanna, sangnging jari-jari tau lompo kalenna ri Gat.

2 Samuel

Video 2 Samuel 21

Ikuti Kami:

KONTAK | PARTISIPASI | DONASI