Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri kota Gilgal nia’ sitau apparicu niareng Seba. Anjo taua ana’na Bikri, battu ri suku Benyamin. Ri wattunna battu Daud siagang sikamma tau naaganga a’rurung, appasa’rami tarompe’ Seba nampa ammarrang angkana, "Tena passisambunganta siagang Daud. Apa saba’na kilamminawang mae ri ia? He tu Israel, umba kimmotere’ ngaseng!"
2 Nampa a’lampamo anjo tu Israelka ambokoi Daud namminawang ri Seba. Mingka tu Yehuda tulusu’ amminawangi ri Daud battu ri Binanga Yordan sa’genna ri Yerusalem.
3 Battuna Daud mange ri balla’ kakaraenganna ri Yerusalem, anjo sampuloa baine piara nabolika anjagai balla’ kakaraenganga, naerangi antama’ ri balla’ nijagai bajika ri pangawala’. Sikamma apa naparalluanga ke’nanga nipasadiai siganna’-ganna’na, mingka tale’bakami Daud assikatinroang siagang ke’nanga. Jari nijagaimi ke’nanga siagang sangkammami janda tallasa’na ke’nanga sa’genna mate.
4 Naparentakangi karaenga mae ri Amasa angkana, "Pa’rappungi tu Yehuda nampa battuko siagang ke’nanga mae ri nakke lalanna tallungngalloa."
5 Nampa a’lampamo Amasa untu’ ampa’rappungi ke’nanga, mingka tammoterai lalang wattu le’baka napattantu karaenga.
6 Nampa nakanamo karaenga mae ri Abisai, "Anjo Seba la’bi lanasusaiki’ na Absalom. Lanri kammana anjo erangi ana’ buaku nampa nuondang, sollanna tena naempoi kota-kota niaka pattahanganna, nampa akkulle lari battu ri katte."
7 Jari a’lampami pasukang Yoab siagang pasukang pangawala’ kalenna karaenga kammayatompa sikontu tantara maraenga, nipimping ri Abisai, untu’ angngondangi Seba.
8 Ri wattunna battu ke’nanga ri batu lompoa ri Gibeon, battumi Amasa ambuntuli ke’nanga. Anjo wattua Yoab ammakeang tau a’bunduki siagang asseleki pa’dang ri aya’na. Ri wattunna a’jappa mae ri dallekang, ta’lappasaki banoa pa’danna sa’genna ta’lesso’ pa’danna mae ri lima kairinna.
9 Angkanai Yoab mae ri Amasa, "Antekamma kabaraka gang?" Nampa nata’gala’ janggo’na Amasa siagang lima kananna, sangkamma angkanaya eroki ambaui.
10 Tanacinikai Amasa angkanaya nia’ pa’dang ri lima kairinna Yoab. Ti’ring napacoka Yoab anjo pa’danga antama’ ri battanna Amasa, sa’genna assulu’mo bone battanna Amasa naung ri buttaya. Matemi silalonna, sa’genna tenamo naparallu Yoab ancoka poleangi. Nampa napatulusu’ lampana Yoab siagang andi’na iamintu Abisai untu’ angngondangi Seba.
11 Nia’ sitau tantarana Yoab ammenteng ri ampi’na maya’na Amasa siagang ammarrang angkana, "Inai-nai agang mae ri Yoab siagang Daud, amminawangko ri Yoab!"
12 Anjo maya’na Amasa attalaka ceraka ammonrangi ri tangnga-tangngana aganga. Anjo tantarana Yoab sumpaeng naciniki angkanaya sikontu tau ammaloa ammantang ngasengi anjoreng. Lanri kammana anjo nare’resammi anjo mayaka mange ri kokoa nampa narangka’ siagang kalimbu’.
13 Le’baki napalili anjo mayaka battu ri aganga, napatulusu’ ngasemmi lampana taua ampinawangi Yoab untu’ angngondangi Seba.
14 Nalaloi kabusu’mi Seba sikontu daerana suku-suku Israel, nampa ammantang ri kota Abel-Bet-Maakha nipinawang ri sikontu bija-bijanna Bikri.
15 Nalangngere’mi ana’ buana Yoab angkanaya niaki Seba anjoreng; nampa nakurummo ke’nanga anjo kotaya. Appatambummi butta ke’nanga ri tammulilina tembo’ bageang pantarang nampa appakkaramula angngeke butta irawanganna anjo temboka sollanna narumbang anjo temboka.
16 Ri anjo kotaya nia’ sitau baine baji’ akkala’, ammenteng irateanna temboka akkiok-kio’ angkana, "Pilangngeri! Pilangngeria’! Palaki sollanna battu Yoab mae anrinni; erokka’ a’bicara siagang ia."
17 Nampa battumo Yoab siagang akkuta’nammi anjo bainea angkana, "Ikatteka Yoab?" Appialimi Yoab angkana, "Iyo." Nakanamo anjo bainea, "Kipilangngeri anne kanangku." Appialimi Yoab angkana, "Baji’mi, kupilangngeri apa lanukanaya."
18 Nakanamo anjo bainea, "Riolo biasai taua akkana kamma anne, ‘Punna paralluko pappitangara’, a’lampako mange ri kota Abel’ — nampa kammaminjo nagaukang ke’nanga.
19 Anne kotana ikambe iamintu kota Abel lompoi, kala se’renna kota kaminang amanga siagang tamamminraya pa’mai’na ri butta Israel. Angngapa nakiero’ angngancuruki? Erokki’ ampanraki buttaNa Batara?"
20 Appialimi Yoab angkana, "Tena. Tena sikali nakuero’ ampanraki yareka angngancuruki kotanu. Tena nakamma anjo pattujunna ikambe.
21 Mingka nia’ sitau niareng Seba, ana’na Bikri, tubattu ri daera monconna Efraim, le’ba’ ero’ angngewa ri Karaeng Daud. Passareangi anjo taua, kunampa a’lampa battu ri anne kotaya." Nakanamo anjo bainea, "Ulunna anjo taua lanapasambilai ikambe battu rate ri temboka anne mae ri katte."
22 Nampa a’lampa siagang appare’ akkala’ baji’ untu’ ampabattui ero’na mae ri pandudu’na anjo kotaya. Le’baki anjo nisamballemi nanialle ulunna Seba nampa nipasambila mae ri Yoab. Nampa napasa’ra tarompe’na Yoab sa’genna nabokoimo ana’ buana anjo kotaya nampa ammotere’ mae ri massing balla’na. Kammayatompa Yoab ammotere’ tommi mange ri Yerusalem andallekang ri karaenga.
23 Iaminne pagawe-pagawe tinggina Daud: Panglimana sikontu tantarana Israel: Yoab. Kapala pasukang pangawala’ kalenna Daud: Benaya ana’na Yoyada.
24 Kapalana tunisuro passaya anjama: Adoram. Bendaharana pa’rasanganga: Yosafat ana’na Ahilud.
25 Jurutulisi’na pa’rasanganga: Seya. Imanga: Zadok ana’na Abyatar.
26 Imanga ri balla’ kakaraenganga: Ira tubattua ri kota Yair.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA