Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Daud makompol reng-orengnga kabbi, pas egi-bagi epadaddi kasatuwan-kasatuwan se bang-sebangnga bannya’na badha se saebu oreng ban badha se saratos oreng. Samarena jareya pas ngangkat ra-parwira se epamimpin kasatuwan-kasatuwan jareya.

² Kasatuwan-kasatuwan jareya pas epamangkat aperrang, ebagi epadaddi tello bagiyan se epimpin Yowab, Abisai ale’na Yowab ban Itai dhari Gat. Dhabuna rato ka reng-orengnga, "Sengko’ abarengnga ban ba’na keya."

³ Tape reng-oreng jareya nyaot, "Ampon, guste. Sabab sanare pasukannepon junandalem ka’dhinto tapaksa buru, otaba kantos saparona mate, moso ta’ kera senneng, sabab se eencer junandalem. Ajiepon junandalem padha sareng sapolo ebu oreng dhari pasukannepon junandalem. Langkong sae junandalem ngerem bantowan saos dhari kottha ka’dhinto."

⁴ Dhabuna rato, "Iya mara, soka’na ba’na." Rato laju ngadek e erenganna labang sakethengnga kottha, dineng pasukanna abaris kabbi ka lowar, agalumpo’ menorot kasatuwanna bang-sebang se bannya’na orengnga badha se saebu ban badha se saratos.

⁵ Rato pas apareng parenta ka Yowab, Abisai ban Itai, dhabuna, "Senga’ Absalom ja’ pasampe’ loka, kaneserre sengko’." Sakabbinna pasukan padha ngedhing ka papakonna Daud jareya.

⁶ Pasukanna Daud mangkat aperrang bi’ pasukan Isra’il neng e alas Efraim.

⁷ Pasukan Isra’il epakala bi’ reng-orengnga Daud; kalana jareya ce’ sarana, se mate e are jareya dhu polo ebu oreng.

⁸ Perrang jareya alatlat ka man-dhimman saantero dhaera jareya, se mate posang e dhalem alas abannya’an dhari se mate e paperrangan.

⁹ E bakto Absalom teppa’na netene jaranna, o-tao pas tapanggi ban reng-orengnga Daud. Jaranna Absalom lebat e baba’anna kajuwan raja se mandhap, serana Absalom takae’ ka cangkana kajuwan jareya. Jaranna berka’ terros, ban Absalom cekka’ atong-gattong e jadhiya.

¹⁰ Sala settong dhari orengnga Daud nangale’e jareya, pas areppot ka Yowab, oca’na, "Towan, gella’ abdina nengale Absalom atong-gattong e cangkana kajuwan raja!"

¹¹ Saodda Yowab, "Apa? Ba’na nangale’e Absalom? Arapa me’ ta’ terros epate’e? Ja’ sakenga bi’ ba’na epate’e, bi’ sengko’ ba’na tanto eberri’i pesse salaka sapolo meggi’ ban sabbu’ settong."

¹² Tape oreng jareya nyaot, "Sanare eparengngana pesse salaka saebu abdina ta’ poron nyake’e pottrana rato. Abdina sadaja ampon mereng dhabuna rato ka panjennengngan, ka Abisai sareng ka Itai, sopaja Absalom ta’ sampe’a elokae demi rato.

¹³ Ompamaepon abdina mate’e Absalom, tanto epanggi sareng rato sabab Rato Daud tanto meyarsa ponapa’a saos — ban panjennengngan ta’ kera nolonge kaula."

¹⁴ "Ella, ambu, ja’ nya’-bannya’a caca! Aso’al jawab ban ba’na, pera’ wang-mowang bakto malolo," dhabuna Yowab. Yowab laju mondhut tombak tatello’ pas ecocowagi ka dhadhana Absalom se gi’ odhi’ atong-gattong e kajuwan raja jarowa.

¹⁵ Samarena jareya Absalom egaruyu’ bi’ reng-orengnga Yowab, sapolo oreng bannya’na.

¹⁶ Yowab mamonye tarompet kaangguy maambu reng-orengnga se nyerser pasukan Isra’il.

¹⁷ Absalom epatoron, ecabbur ka dhalem somor se dhalem e alas. Somor jareya pas etembugi bato dhari attas. Reng-oreng Isra’il padha buru mole ka bengkona bang-sebang.

¹⁸ Gi’ odhi’na Absalom maddek tugu kaangguy salerana dibi’ e Corana Rato, sabab salerana ta’ kaagungan pottra lalake’ se nerrossagiya toronanna. Daddi tugu jareya enyamae epapadha ban asmana dibi’, ban sampe’ sateya tugu jareya paggun anyama Tugu Absalom.

¹⁹ Saellana jareya Ahima’as, pottrana Zadok mator ka Yowab, "Kaula nyo’ona edi berka’a ka rato ngatorana oneng ja’ sareng PANGERAN rato ampon epasalamet dhari mosoepon."

²⁰ "Ella," dhabuna Yowab, "are teya ba’na ta’ olle manapa’ kabar se bagus apa’a bai, sabab pottrana rato adinggal dunnya."

²¹ Yowab pas adhabu ka dunorra, oreng dhari Sudan, "Kassa’ ba’na nyabis ka rato, atorragi pa-apa se etangale’e ba’na." Dunor jareya asojud pas mangkat sambi ka’-berka’.

²² Ahima’as maksa ka Yowab, "Sanare badha’a ponapa’a saos, kaula nyo’ona edi manapa’a kabar gapaneka." "Arapa ba’na ma’ ce’ maksana se atemmowa ban rato, na’?" dhabuna Yowab. "Ba’na ta’ kera eberri’i opa."

²³ "Ta’ aponapa," ca’na Ahima’as, "kaula entara." "Mon cara jareya iya kassa’, la mangkat," dhabuna Yowab. Daddi Ahima’as ka’-berka’ lebat e lorong e Cora Yordan, ta’ abit saellana jareya bisa nyalep dunor Sudan gella’.

²⁴ Daud teppa’na agi-lenggi e rowangan e antarana labang saketheng lowar ban labang saketheng dhalem. Panjagana ongga ka geddhung, manjeng e ata’na labang saketheng jareya; oreng jareya ngabas ka lowar, pas nangale’e badha oreng ka’-berka’ kadibi’an.

²⁵ Panjaga jareya aera’ abala ka rato, rato adhabu, "Mon oreng jareya kadibi’an, tanto ngeba kabar se nyaman." E bakto oreng jareya para’ napa’a,

²⁶ panjaga jareya nangale’e badha oreng laenna se ka’-berka’ keya. Daddi tokang jaga jareya pas aera’, "Guste! Badha oreng laen pole se ka’-berka’ kadibi’an ka ka’dhinto." Rato nyambit, "Tanto oreng jareya ngeba kabar nyaman keya."

²⁷ Ca’na panjaga jareya, "Oreng se jang adha’an ka’dhissa’ Ahima’as. Abdidalem oneng dhari paberka’na." "Ahima’as jareya oreng becce’," dhabuna rato, "tantona ngeba kabar nyaman."

²⁸ Ahima’as aera’ ngatore salam ka rato, pas asojud, laju mator, "Sokkor ka GUSTE Allahepon junandalem se ampon massra’agi ka junandalem reng-oreng se aberonta’ ka junandalem!"

²⁹ Dhabuna rato, "Apa Absalom se gi’ ngodha jarowa salamet?" Saodda Ahima’as, "Guste, e bakto eotos sareng Yowab gella’, abdidalem nengale bannya’ oreng nger-enger, namong abdidalem ta’ oneng ja’ badha ponapa."

³⁰ "Kassa’ manjeng e dhissa’," dhabuna rato; daddi Ahima’as manjeng ka penggir.

³¹ Saellana jareya dunor se asalla dhari Sudan jarowa dhateng, laju mator ka rato, "Abdidalem abakta kabar sae kaangguy junandalem! E are mangken sareng PANGERAN junandalem epamennang ka sadajana oreng se aberonta’ ka junandalem!"

³² Dhabuna rato, "Apa Absalom se gi’ ngodha jarowa salamet?" Dunor jareya nyambit, "Moga-moga sadajaepon oreng se aberonta’ ka junandalem eparengngana ngalame akadi oreng ngodha gapaneka."

³³ Rato ce’ sossana, pas ongga ka kamar se badha e attassa labang saketheng, pas molar sambi adhabu, "Adhu, ana’! Ja’ sakenga sengko’ bai se mate, banne ba’na, na’! Absalom, tang ana’!"

2 Samuel

Video 2 Samuel 18

Ikuti Kami:

KONTAK | PARTISIPASI | DONASI