Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ipepulung Raja Daud kerina tenterana, ibagina ku bas terpuk-terpuk 1.000, ras seratus, jenari iangkatna pegawai jadi komendan tentera e.

² Kenca bage isuruhna berkat i bas telu terpuk, si ipinpin Joap, Abisai senina Joap, ras Itai i Gat nari jadi komendan tiap terpuk. Emaka ngerana raja man tenterana, "Aku ikut ras kam kerina."

³ "Kam la banci berkat ras kami," nina tentera e. Sabap adi kune kami kerina kiam, ntah pe adi setengah i bas kami nari mate, labo diate musuh pe e, sabap kam nge si idaramina. Kam seri ergandu ras 10.000 tenterandu. Lang pe madin nge kami isampatindu i bas kota nari.

⁴ Nina Raja, "Bage-bage! Kuga akapndu si mehulina bage." Kenca bage tedis ia i pintu samping gerbang kota. Kerina tentera barisen 1.000 ras seratus erdalan ndarat.

⁵ Iperentahken raja man Joap, Abisai ras Itai nina, "Erkiteken aku ula sakiti Absalom." Janah kerina pasuken e megisa perentah si ibereken Daud man peminpin-peminpin.

⁶ Tentera Daud lawes ku mbalmbal jenari iserangna tentera Israel i kerangen Eperaim.

⁷ Bangsa Israel talu ibahan tentera Daud; sada kinitalun si mejin alu 20.000 kalak si terbunuh i bas wari e.

⁸ Pertempuren merap ku kerina daerah e, jenari teremen kalak mate i bas kerangen e asangken ibunuh i bas peperangen.

⁹ Rempet Absalom jumpa ras tentera Daud. Absalom sanga ngersak kelede janah sanga mentas i teruh sada batang kecing galang, sangkut takalna i bas dahan kayu e. Kiam kelede e emaka Absalom tading molah-olah, gantung i bas dahan kayu e.

¹⁰ Sekalak tentera Daud ngidahsa, emaka ilaporkenna man Joap, "Tuan, kuidah Absalom molah-olah i bas batang kecing!"

¹¹ Erjabap Joap, "Adi idahndu uga maka la minter ibunuhndu? Kubereken min ndai bandu sepuluh duit pirak ras sada gendit."

¹² Tapi erjabab kalak ndai, "Aminna pe 1.000 duit pirak iberekenndu bangku la aku nggit ngangkat jari-jaringku ngelawan anak raja. Kita kerina megi perentah raja man bandu, man Abisai ras man Itai, 'Erkiteken aku ula sakiti Absalom.'

¹³ Adi la kupatuhi raja, kubunuh Absalom, megi raja kerna si e, kai pe ieteh raja, kenca bage labo kam nggit nampati aku."

¹⁴ "La aku sempat ndekah ngerana ras kam," nina Joap. Ibuatna telu lembing, itajakkenna ku tenten Absalom si tupung e nggeluh denga molah-olah i bas batang kecing.

¹⁵ Kenca bage reh sepuluh kalak tentera Joap ngurup Absalom mutusken kesahna.

¹⁶ Joap merentahken ngembus terompet pengadi pertempuren, emaka ngadi tentera e ngayaki bangsa Israel.

¹⁷ Ibuatna mait Absalom, ibenterkenna ku bas sada lubang si mbages i bas kerangen e, itutupina alu jergungen batu si seh kal galangna. Kerina kalak Israel kiam, lawes ku rumahna sekalak-sekalak.

¹⁸ Paksa geluh Absalom nggo ibangunna sada tugu guna dirina i Baluren Raja, sabap la lit anakna dilaki si nerusken kesusurennna. Ibahanna gelar tugu e sue ras gelarna, janah seh ngayak genduari tugu e igelari Tugu Absalom.

¹⁹ Kenca bage ngerana Ahimas anak Sadok man Joap, "Bere aku kiam ndahi raja meritaken berita si mehuli enda, TUHAN nggo mulahi ia i bas musuh-musuhna nari."

²⁰ "Ula," nina Joap, "Sendah la kam si maba berita si mehuli. I bas wari-wari si deban banci ilakokenndu e, tapi la wari enda, sabap anak raja nggo mate."

²¹ Jenari nina man suruh-suruhenna bangsa Sudan, "To turiken man raja kai si idahndu." Nembah suruh-suruhen e jenari kiam ia.

²² Isekseki Ahimas, "La atendu ndele kai si jadi? Bere min aku pe mberitaken berita e." "Ngkai maka ilakokenndu atendu e, anakku?" nina Joap ngaloi "Labo kam ngalo kai pe jenari."

²³ "Amin kai pe jadi lawes ateku!" nina Ahimas. "Adi bage kin lawesken," nina Joap. Kiam Ahimas ngincuah arah Baluren Jordan, ilumbana suruh-suruhen ndai.

²⁴ Daud sanga kundul i kesain kelang-kelang kerabangen kota si arah bas ras si arah darat. Penjaga e nangkih ku ancuk-ancuk tembok. Tedis ia i babo tarum pintun gerbang e, itatapna janah idahna sekalak reh kiam-kiam.

²⁵ Ilebuhna ku teruh jenari ikatakenna man raja. Ngaloi raja, "Adi sisada ia, berita si mehuli nge si ibabana." Kalak si kiam e reh deherna reh dekahna.

²⁶ Kenca bage idah penjaga e kalak si deban kiam sisada-sisada, emaka ilebuhna ka ku teruh man penjaga pintun gerbang, "Nehenlah! Lit kiam sekalak nari!" Nina raja, "Ia pe maba berita si mehuli nge."

²⁷ Nina penjaga e, "Kuidah maka si kiam arah lebe e bali ras Ahimas." "Ia sekalak si bujur," nina raja. "Emaka berita si mehuli nge si ibabana."

²⁸ Erlebuh Ahimas ngataken mejuah-juah man raja, ersembah mungkuk i lebe-lebe raja nina, "Puji TUHAN, Dibatandu si nggo mereken man bandu kemenangen naluken kalak si mberontak ngelawan Tuanku Raja!"

²⁹ "Ma selamat nge Absalom?" nungkun raja. Ngaloi Ahimas, "Tuan, sanga pegawaindu Joap nuruh aku, kuidah sada keguntaren si mbelin, tapi la terturiken aku kai e."

³⁰ "Arah lepar ah kam tedis," nina raja; jenari Ahimas ngepar janah tedis i jah.

³¹ Kenca bage seh suruh-suruhen bangsa Sudan e jenari nina man raja, "Lit berita si mehuli man bandu, o Tuanku Raja! I bas wari enda nggo ibereken TUHAN man bandu kemenangen ngelawan si mberontak ngelawan kam!"

³² "Ma selamat nge Absalom e?" nungkun raja. Ngaloi suruh-suruhen e, "Sura-surangku maka kai si jadi man Absalom, jadilah man kerina musuh-musuhndu Tuan, janah man kerina si mberontak ngelawan kam."

³³ Megi si e ceda kal ate raja. Lawes ia ku das ruangen i das pintun gerbang tangis ia. Sanga erdalan serko ia, "O anakku! Aku min ndai mate nggantiken kam o anakku! Absalom anakku!"

2 Samuel

Video 2 Samuel 18

Ikuti Kami:

KONTAK | PARTISIPASI | DONASI