Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lanai ndekahsa kenca si e ngerana Ahitopel man Absalom nina, "Bere kupilihi 12.000 kalak janah i bas berngi enda ngayaki Daud.
2 Gelah kuperang sanga ia latih ras kote. Gelah kusengget ia jenari kiam kerina tenterana. Raja ngenca si kubunuh.
3 Jenari kubaba man badu kerina kalak si ras ia desken sekalak pengantin mulihi ndahi perbulangenna. Kam ersura-sura munuh sekalak jelma ngenca; rayat si tading selamat nge."
4 Nasehat enda lit perjilena iakap Absalom ras kerina peminpin-peminpin bangsa Israel.
5 Amin bage gia nina Absalom, "Genduari lebuhken Usai, gelah sibegiken kai nina."
6 Kenca Usai nggo seh ngerana Absalom man bana, "Enda me nasehat si nggo ibereken Ahitopel man banta. Si ikut nge e? Adi lang turiken dage man kami kai si man bahanen."
7 Erjabap Usai "Nasehat Ahitopel sekali enda la mehuli.
8 Ietehndu maka bapandu Daud ras kalak si ras ia kerina kalak mbisa erperang, janah genduari kerina sangana merawa desken indung mberuang kebenen anak. Bapandu pe sekalak tentera si erpengalamen, janah i bas berngi enda labo ia tading ras anak buahna.
9 Nggit me maka i bas paksa enda ia sangana cebuni i bas sada gua ntah i bas ingan si deban. Adi nggo iserang Daud tenterandu, ise pe si megisa e la banci la ngataken tenterandu nggo talu.
10 Emaka amin si merawana pe si la meteh mbiar desken singa pe mbiar, sabap kerina bangsa Israel meteh bapandu tentera si mbisa janah kalak si ras ia pe kerina mbisa.
11 Pedahku maka ipepulungndu kerina bangsa Israel i bas tampuk negeri nari seh ku tampukna si deban, bali teremna ras kersik i tepi lawit. Jenari babaindu ia kerina erperang.
12 Ugapa pe sidat nge ia amin i japa pe ia, jenari siserang ope denga ietehna kai jadi. Ia ras kalak si ngikut ia sada pe la pulah.
13 Adi ia mundur ku bas sada kota, kerina rayatna maba nali jenari gelah irintak kota e ku bas baluren seh sada batu pe la lit tading i das tampuk uruk e."
14 Megi si e nina Absalom ras kerina kalak Israel "Nasehat Usai ulin asangken nasehat Ahitopel." Nggo itetapken TUHAN maka nasehat Ahitopel si mehuli e la iikutken, gelah reh cilaka man Absalom.
15 Kenca bage ituriken Usai man Imam Sadok ras Abiatar nasehat si nggo iberekenna man Absalom ras man peminpin Israel janah nasehat si nggo ibereken Ahitopel.
16 Itambahi Usai cakapna nina, "Genduari pedasken! Suruh sekalak utusen ndahi Daud gelah ula ia erberngi i dalan ngepar lau si lit i taneh mesawang, tapi minterlah ngepari Jordan, gelah ia ras kalak si ras ia la ketunduken jenari ibunuh."
17 Biasana Jonatan anak Abiatar ras Ahimas anak Sadok nimai i ulu Lau Enrogel i darat kota Jerusalem, sabap la ia pang duana idah mengketi kota e. Sekalak suruh-suruhen diberu reh ka ndahi kalak enda jenari nuriken man bana kai si nggo jadi, janah kenca bage lawes Jonatan ras Ahimas ngatakenca man Raja Daud.
18 Tapi i bas wari si e rembang sekalak danak-danak ngidah kalak enda, emaka ikatakenna man Absalom. Minter kalak enda cebuni i bas rumah sekalak jelma i Bahurim. Lit sada sumur deherken rumahna e, emaka bengket Jonatan ras Ahimas ku bas sumur e.
19 Ibuat ndehara empuna rumah ndai sada tutup, ikimbangkenna e i babo lubang sumur e, jenari iamburkenna gandum i babona gelah ula ise pe mperdiatekenca.
20 Pegawai-pegawai Absalom reh jenari isungkunna diberu e nina, "I ja Ahimas ras Jonatan?" "Nggo ia ngepar lau e," nina njabapsa. Idarami pegawai Absalom kalak ndai duana, tapi la jumpasa, emaka mulih ia ku Jerusalem.
21 Ndarat Ahimas ras Jonatan i bas sumur e nari, jenari pedas-pedas lawes njumpai Raja Daud nurikenca kerina. Nina Ahimas ras Jonatan, "Ahitopel mereken nasehat guna nerang kam, Raja. Emaka genduarilah kam berkat ngepari lau enda."
22 Lawes Daud ras tenterana ngepari Lau Jordan. Pepagina erpagi-pagi kerina nggo seh i lepar lau e.
23 Kenca idah Ahitopel maka nasehatna la ikutken ipasangna pelana keledena mulih ia ku kotana. Kenca idungina kerina urusenna ideliskenna bana. Ia ikuburken i bas kuburen keluargana.
24 Daud seh i Kota Mahanaim sanga Absalom ras bangsa Israel ngkepari Lau Jordan.
25 (Absalom ngangkat Amasa jadi puanglima nggantiken Joap. Amasa anak Jeter bangsa Ismael, gelar nandena Abigail anak Nahas senina Seruya, nande Joap.)
26 Absalom ras bangsa Israel erkemah i negeri Gileat.
27 Kenca Daud seh i Mahanaim jumpa ia ras Sobi anak Nahas anak kota Raba nari i Amon, bage pe Mahir anak Amiel i Lodebar nari ras Barsilai i Rogelim nari i Gileat.
28 Ibaba kalak enda mangkuk, kudin taneh, tilam, bantal, bagepe pangan man Daud, ras anak buahna eme: gandum, page, cimpa, becih page, kacang ras ritik, tengguli ras mentega, ras biri-biri. Ieteh kalak enda maka Daud ras kalak si ras ia melehe, muas, janah latih i bas taneh si mesawang.
29 (2Sam 17:28)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA