Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E bakto jareya Nabbi Elisa adikane sala settong e antarana bi-nabbi se gi’ dha-ngodha, laju adhabu, "Mara ba’na asadhiya, bi’ sengko’ esorowa ka Ramot e Gileyad. Giba butol se aesse mennya’ jaitun reya.

² Sanapa’na ka jadhiya sare oreng se anyama Yehu, pottrana Yosafat, bajana Nimsi. Pas ajak ka kamar kadibi’an,

³ sanapa’na ka kamar jareya mennya’ reya selennagi ka serana, sambi ngoca’, ‘Dhabuna PANGERAN junandalem epajumenneng rato Isra’il sareng Salerana.’ Saellana jareya, ba’na duli ondur dhari jadhiya."

⁴ Nabbi se gi’ ngodha jareya mangkat ka Ramot,

⁵ laju nemmone Yehu ban para panglima laenna teppa’na aparembagan e jadhiya. Nabbi jareya adhabu, "Guste, badha sen-pessen ka junandalem." Saodda Yehu, "Ka sapa?" "Junandalem dibi’," saodda nabbi jareya.

⁶ Saellana jareya se kadhuwa laju maso’ ka dhalem bengko, ban nabbi se gi’ ngodha jareya laju nyelen mennya’ jaitun gella’ ka serana Yehu sambi adhabu, "PANGERAN Allahna Isra’il adhabu kadi ka’dhinto, ‘Bi’ Sengko’ ba’na epadaddi ratona Tang ommat Isra’il.

⁷ Ba’na bakal mateyana balana lorana ba’na, Ahab. Kalaban cara se kantha jareya Sengko’ ngokom Izebel se la mate’e Tang bi-nabbi ban Tang di-abdi laenna.

⁸ Ana’ bine ban na’ potona Ahab kodu mate kabbi. Saneyap lalake’ balana Ahab, towa otaba ngodha bi’ Sengko’ epateyana kabbi.

⁹ Ana’ binena bi’ Sengko’ epakantha’a ana’ binena Yerobeyam ban ana’ binena Baesa, to-rato Isra’il.

¹⁰ Izebel ta’ ekoburragiya. Mayyidda bakal ekakana pate’ e dhaera Yizre’el.’" Samarena adhabu kantha jareya, nabbi se gi’ ngodha buru laju kalowar terros buru.

¹¹ Yehu abali ka ca-kancana, se laju padha atanya, "Badha kabar ponapa? Aponapa’a oreng gila ka’issa’ ka sampeyan?" "Sampeyan ampon oneng sadaja," saodda Yehu.

¹² "Bunten, kaula ta’ oneng!" saodda reng-oreng jareya. "Tore, pona, parenge oneng!" "Oreng ka’issa’ manapa’ dhabuna PANGERAN ja’ kaula sareng PANGERAN epadaddi rato Isra’il," saodda Yehu.

¹³ Ca-kancana Yehu duli mokka’ jubana, pas eampar e dhak-ondhak bagiyan attas e ajunanna Yehu. Saellana jareya reng-oreng jareya laju nope tarompet sarta aera’, "Yehu rato!"

¹⁴ Daddi Yehu asakongkel ngamoso Rato Yoram se e bakto jareya badha e Yizre’el. Yoram meyos ka jadhiya polana arabada, mabarasa ka-lokana ollena se aperrang e Ramot ban Hazael rato Siria. Yehu adhabu ka ca-kancana se daddi para panglima, "Mon sampeyan saroju’ kaula daddi rato, jaga ja’ sampe’ badha oreng settonga se kalowar dhari Ramot se abala’a ka reng-oreng e Yizre’el."

¹⁵ (9:14)

¹⁶ Saellana adhabu kantha jareya Yehu laju netene kareta perrangnga sarta terros meyos ka Yizre’el. E bakto jareya Yoram gi’ ta’ baras, ban Ahaziya rato Yehuda teppa’na badha e jadhiya nyapot Yoram.

¹⁷ E bakto pangawalla manara kottha Yizre’el nangale’e Yehu rabu ban reng-orengnga, laju aera’, "Badha reng-oreng sarombongan entara ka ka’dhinto!" Yoram nyaot, "Soro parjurit jaran kasorang entar nalektegi apa reng-oreng jareya kanca otaba moso."

¹⁸ Parjurit jareya mangkat nompa’ jaran laju entar ka Yehu pas ngoca’, "Rato terro ngagaliya ponapa junandalem rabu ka ka’dhinto menangka kanca." "Areya banne orosanna ba’na!" saodda Yehu. "Mara ba’na noro’ sengko’." Pangawalla manara gella’ nangale’e parjurit se eotos buru napa’ ka kennengnganna rombongan jarowa, tape tadha’ abali, daddi laju ereppoddagi.

¹⁹ Otosan laen epamangkat, manapa’ partanya’an ka Yehu akantha otosan se dha’-adha’. Yehu nyaot akantha saodda ka otosan se dha’-adha’ jarowa, "Areya banne orosanna ba’na! Mara ba’na noro’ sengko’!"

²⁰ Pangawalla manara gella’ areppot pole ja’ otosan jareya la napa’ ka kennengnganna rombongan buru tape tadha’ abali. Pangawal jareya ngoca’ pole, "Kadiya pamimpin rombongan ka’issa’ Yehu, sabab netene kareta perrangnga akadi oreng gila."

²¹ "Sadhiya’agi tang kareta," dhabuna Rato Yoram. Kareta jareya esadhiya’agi, dineng Yoram ban Rato Ahaziya laju mangkat ngamba’a Yehu, padha netene kareta perrangnga bang-sebang. Se kadhuwa jareya tapanggi ban Yehu e teggal bekkas andhi’na Nabot.

²² "Ponapa sampeyan paneka rabu ka’dhinto menangka kanca?" dhabuna Yoram ka Yehu. Yehu nyaot, "Baramma se akanca’a ban ba’na, mon e dhinna’ gi’ bannya’ dhukon, ban gi’ badha oreng se nyemba brahala se emolae bi’ ebuna ba’na, Izebel?"

²³ "Paneka pangkiyanadan, Ahaziya!" ca’na pacerrengnga Yoram sambi mabiluk karetana, terros buru.

²⁴ Yehu naja’ gandhibana salar-kellarra, laju manna Yoram teppa’ ka balikadda, terbas sampe’ ka kol-tongkolanna. Yoram robbu, seda e dhalem karetana.

²⁵ Dhabuna Yehu ka Bidkar, ajudanna, "Ba’na ba’ gi’ enga’a, e bakto ba’na ban sengko’ nompa’ jaran noro’ Ahab, ramana Yoram? E bakto jareya PANGERAN adhabu ka Ahab, ‘Sengko’ tao sapa se mate’e Nabot ban na’-ana’na ba’ari’, ban sengko’ ajanji ngokoma ba’na e kebbun reya keya.’" "Daddi, pelpallagi mayyidda Yoram reya ka kebbunna Nabot, sopaja okomanna Allah se la ejanjiyagi rowa kalakon."

²⁶ (9:25)

²⁷ Ahaziya ngoladi kadaddiyan jareya, daddi laju buru netene karetana nojju ka kottha Bet-Hagan. Bi’ Yehu eserser; sambi nyerser Yehu aera’ ka reng-orengnga, "Pate’e keya rato jareya!" Bi’ reng-orengnga Yehu Ahaziya jareya epana e jalan ka Gur, e seddi’anna kottha Yibleyam. Tape Ahaziya gi’ ngenneng buru sampe’ ka Megido, laju seda e jadhiya.

²⁸ Bi’ ba-ponggabana jinazana ekala’ laju egiba epanompa’ kareta ka Yerusalim. E jadhiya laju esareyagi e pasareyanna to-rato e Kottha Daud.

²⁹ Ahaziya jumenneng rato Yehuda e bakto Rato Yoram pottrana Ahab la olle sabellas taon se marenta Isra’il.

³⁰ Yehu rabu e Yizre’el. E bakto Izebel meyarsa kabar jareya laju ngator rambudda sarta acella’, pas nyongngo’ ka baba dhari candhelana karaton.

³¹ E bakto Yehu maso’ lebat labang saketheng, Izebel aera’, "He, Zimri! ba’na se mate’e gustena! Arapa’a ba’na me’ dha’ enna’?"

³² Yehu adhanga ka candhela jareya, pas adhabu, "Sapa se noro’ sengko’?" Ngedhing jareya, badha ponggaba karaton kadhuwa otaba katello se nyongngo’ ka baba.

³³ Dhabuna Yehu ka reng-oreng jareya, "Ontallagi ratona ba’na jareya ka baba!" Daddi bi’ reng-oreng buru Izebel eontallagi ka baba, bi’ Yehu laju elempet bi’ karetana sampe’ dharana nampes ka geddhung ban ka ran-jaranna kareta jareya.

³⁴ Yehu pas maso’ ka dhalem karaton terros adha’ar. Saellana laju adhabu, "Babine’ jareya oreng dalka’. Maske kantha jareya, mayyidda koburragi pateppa’ sabab gi’ anyama pottrena rato."

³⁵ Tape e bakto reng-oreng jareya ngala’a mayyidda se ekoburragiya, se etemmo pera’ kare galunthonganna serana, lang-tolangnga lengngenna ban sokona.

³⁶ Saellana parkara jareya ereppoddagi ka Yehu, Yehu laju adhabu, "Areya la edhabuwagi sabellunna bi’ PANGERAN, se adhabu kantha reya kalaban parantara’anna Eliya, abdina, ‘Mayyidda Izebel bakal ekakana pate’ e dhaera Yizre’el,

³⁷ ban re-karena mayyidda jareya bakal ajalamperrana akantha calatthongnga keban sampe’ tadha’ oreng se taowa mayyidda sapa jareya.’"

2 Raja-raja

Video 2 Raja-raja 9

Ikuti Kami:

KONTAK | PARTISIPASI | DONASI