Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tupung e idilo Nabi Elisa sekalak nabi si nguda denga, janah nina man bana, "Ersikaplah, lawes kam ku kota Ramot i Gileat. Baba botol si isin minak saitun enda,

² janah kenca nggo kam seh i jah, daramilah Jehu anak Josapat ntah pe kempu Nimsi. Dilo ia lawes i bas teman-temanna nari, jenari baba ia bengket ku bas sada kamar tersendiri.

³ Emaka ilingkenlah minak saitun enda ku takalna, janah nindu, 'Ipebetehken TUHAN maka ItangkuhkenNa kam jadi raja Israel.' Kenca bage tadingkenlah ingan e pedas-pedas."

⁴ Emaka lawes nabi si nguda denga e ku Ramot.

⁵ Idapetina i je puanglima-puanglima tentera sangana runggu. Nina nabi e, "O Bapa, lit berita man bandu." Nungkun Jehu, "Siapai kin kami katandu e?" "Kam, bapa," nina ngaloi.

⁶ Kenca bage bengket ia duana ku rumah, jenari iilingken nabi si nguda denga e minak saitun ku takal Jehu janah nina man bana, "TUHAN Dibata bangsa Israel pebetehkenca: 'Kutangkuhken kam jadi raja bangsangKu Israel.

⁷ Arus ibunuhndu tuanndu, eme raja, anak Ahap e, gelah banci Kuukum Isebel erkiteken ibunuhina nabi-nabingKu ras suruh-suruhenKu si deban.

⁸ Kerina keluarga Ahap ras kesusurenna arus mate. Kubuangken kerina dilaki i bas keluargana, subuk nguda tah metua.

⁹ PerbahanenKu man keluargana, bali ras man keluarga Jerobeam raja Israel ras man keluarga Baasa raja Israel.

¹⁰ Isebel la ikuburken, tapi maitna ipangani biang i bas daerah Jesreel.'" Kenca ikatakenna si enda, itadingken nabi si nguda denga e kamar ndai jenari kiam ia.

¹¹ Kenca mulihken Jehu ku teman-temanna puanglima ndai, isungkun kalak ndai ia nina, "Uga ma berita mehuli nge? Kai ndai ate kalak mehado ah ndahi kam?" "Kam pe itehndu nge sura-surana," nina Jehu ngaloi.

¹² "Lang, la ieteh kami!" nina kalak ndai erjabap. "Turiken man kami kai nina!" "Iturikenna man bangku maka nina TUHAN, 'Kutangkuhken kam jadi raja Israel.'"

¹³ Minter itangtangi teman-teman Jehu jubahna sekalak-sekalak, ikimbangkenna i tampuk tangga si arah datasna man ingan Jehu tedis, jenari iembusna terompet, ersurak ia nina, "Jehu kap rajanta."

¹⁴ Kenca bage ibahan Jehu pertakin nandangi Raja Joram, si sangana i Jesreel ertambar erkiteken luka-luka pertempuren i Ramot ngelawan Raja Hasael i Siria nari. Emaka nina Jehu man teman-temanna, "Adi ras aku kin kam, jaga maka ula sekalak pe kiam i Ramot nari nehken berita e ku Jesreel."

¹⁵ (2Raj 9:14)

¹⁶ Kenca bage inangkihina gereta perangna, lawes ia ku Jesreel. Joram langa denga malem, janah Raja Ahasia i Juda nari sangana i je ndahi ia.

¹⁷ Sekalak penjaga si ertugas i das menara i kuta Jesreel ngidah kerehen Jehu ras teman-temanna. "Kuidah nterem kalak ergereta reh," nina erlebuh. Nina Joram ngaloi, "Suruh kalak erkuda njumpaisa, metehsa teman tah imbang."

¹⁸ Emaka lawes si erkuda ndai njumpai Jehu, jenari nina, "Perlu raja metehsa ntah kin kam reh selaku teman." "Labo urusenndu e!" nina Jehu erjabap. Kenca bage ikataken penjaga si i das menara ndai maka persuruhen si erkuda ndai nggo seh, tapi la ia mulihken.

¹⁹ Emaka isuruhna ka kalak si deban nungkun Jehu bagi si ndai ka. Jehu pe erjabap bagi si ndai ka nina, "Labo urusenndu e! Ikutken aku!"

²⁰ Iberitaken penjaga ndai ka sekali nari maka persuruhen ndai nggo seh, tapi la mulihken. Janah tole nina, "Peminpin kalak si reh e ngeratuh geretana bagi kalak adon, bali kal ras Jehu!"

²¹ Emaka iperentahken Raja Joram nina, "Pasang geretangku." Ipasang me geretana, jenari minter ia berkat ras Raja Ahasia, sekalak-sekalak nangkih geretana njumpai Jehu. Jumpa ia i bas sada juma, Nabot empuna.

²² "Ma dame nge kerehenndu enda?" nina Joram man Jehu. "Uga banci lit dame adi tetap denga lit kinigurun ras penembahen man dibata-dibata si deban si ibenai nandendu Isebel?" nina Jehu ngaloi.

²³ Janahna ngkusurken kudana, muatna lompat nina Joram, "Penipu ena, Ahasia!"

²⁴ Irintak Jehu panahna, janah asa gegehna ipanahna Joram pultak terus ku jantungna. Patinggal Joram i bas geretana, jenari mate ia.

²⁵ Kenca bage nina Jehu man suruh-suruhenna Bidkar, "Buat maitna, ambekken ku juma Nabot. Ingetlah sanga kita duana erkuda i pudi Ahap, bapa Raja Joram, maka nina TUHAN kerna Ahap,

²⁶ 'Kuidah nderbih Nabot ras anak-anakna ibunuh. Emaka erpadan Aku maka i bas juma si enda ka me kam Kuukum.' Emaka angkatlah mait Joram, ambekken ku juma Nabot, gelah alu bage kata TUHAN igenepi."

²⁷ Ahasia, raja Juda ngidah kai si jadi, emaka lompat ia tare gereta perangna kempak kuta Bet Haggan; iayak-ayak Jehu ia. "Bunuhlah ia pe!" nina Jehu merentahken anak buahna. Ipanah kalak ndai i das gereta perangna i bas dalan nangkeng-nangkeng ku kuta Gur, deherken kuta Ibleam. Tapi ngasup denga ia nerusken perdalanenna seh i Megido, janah i je ia mate.

²⁸ Ibuat pegawaina mait Ahasia ibabana alu gereta ku Jerusalem. Ikuburken i kuburen raja-raja i Kota Daud.

²⁹ Ahasia jadi raja Juda kenca sepulu sada tahun dekahna Joram anak Ahap jadi raja Israel.

³⁰ Seh me Jehu i Jesreel. Kenca ibegi Isebel kai si nggo jadi, icelakna matana, ersuri ia, jenari tedis deherken jendela istana, janahna natap ku dalan i teruh.

³¹ Asum Jehu bengket arah gerbang, erlebuh Isebel nina, "O, Simri! O, pemunuh tuanna! Erkai kam ku jenda?"

³² Itare Jehu ku das, emaka nina alu sora si megang, "Ise si arah aku?" Dua telu kalak pegawai istana natap ku teruh i bas jendela nari kempak Jehu.

³³ Emaka nina Jehu man kalak e, "Sampetken ia ku teruh!" Isampetken kalak ndai ia ku teruh, emaka marpar darehna ngkenai tembok ras kuda. Mait Isebel iperjaki kuda Jehu.

³⁴ Bengket Jehu ku istana, jenari man ras minem ia i je. Kenca elah man nina, "Angkat diberu si kebilangen e, kuburkenlah, sabap anak raja kap ia."

³⁵ Tapi kai pe lanai lit idapeti kalak si atena ngkuburkenca ndai, seakatan takal-takalna, tulan-tulan tanna ras nahena nari ngenca.

³⁶ Kenca ilaporkenna si enda nina Jehu, "Kai si jadi genduari payo kal bagi si nggo ikataken TUHAN arah suruh-suruhenna Elia: 'Ipangani biang me mait Isebel i daerah Jesreel.

³⁷ Tading maitna merap desken kotoren rubia-rubia, seh maka ise pe lanai si nandaisa.'"

2 Raja-raja

Video 2 Raja-raja 9

Ikuti Kami:

KONTAK | PARTISIPASI | DONASI