Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sedekia berontak ngelawan Nebukadnesar, raja Babilon. Emaka i bas wari pesepuluhken, bulan pesepuluhken, tahun pesiwahken pemerentahen Raja Sedekia, reh Nebukadnesar ras tenterana i Babilon nari nerang Jerusalem. Ipajekkenna kemahna i darat kota, ibahanna benteng kelewet guna ngkepungsa,
2 janah kota terus-terusen ikepung seh tahun pesepulusadaken pemerentahen Sedekia.
3 I bas wari pesiwahken, bulan peempatken i bas tahun e, asum kelihen nggo mesangat seh maka lanai lit kai pe si man pangan,
4 tembok kota e ipecahken. Aminna gia kota e ikepung kalak Babilon, kerina tentera Sedekia pulah i bas berngi e. Kalak e lawes arah peken raja, mentasi pintu gerbang si mpersadaken tembok si dua e, jenari lompat kempak Baluren Jordan.
5 Tapi iayaki tentera Babilon Raja Sedekia, itundukna ia i kendit deherken Jeriho, jenari kerina tenterana nadingken ia.
6 Sedekia ibaba man Raja Nebukadnesar, si sangana i kota Ripla, janah i je me Nebukadnesar ndabuhken ukumen man bana.
7 I lebe-lebe mata Sedekia, anak-anakna ibunuh. Kenca bage iperentahken Nebukadnesar ncungkil mata Sedekia, jenari ngeranteken ia, emaka ibaba ku Babil.
8 I bas wari pepituken, bulan pelimaken, tahun pesepulusiwahken pemerentahen Nebukadnesar, raja Babilon, sekalak penasehat raja ras puanglima tenterana Nebusaradan, bengket ku Jerusalem.
9 Icilukna Rumah Pertoton, istana, ras kerina rumah i pengulu Jerusalem,
10 janah tenterana ngerontasken tembok kota.
11 Kenca bage ibaba Nebusaradan ku Babilon kalak si tading denga i bas kota e, tukang-tukang si beluh si tading denga, ras kalak si tading denga, ras kalak si gelgel e mihak kalak Babilon.
12 Tapi kalak si musilna kal, si la lit kadena pe, itadingkenna deba i Juda, janah isuruhna erdahin i kebun-kebun anggur ras i juma-juma.
13 Kalak Babilon menggelken tiang tembaga ras gereta-gereta tembaga si lit i bas Rumah Pertoton, rikut ras baskom tembaga si galang, jenari ibabana tembaga ndai ku Babil.
14 Tambah si e ibuatna pe sekop ras ingan abu si ipake mbersihken batar-batar, perkekas-perkekas guna ngurus lampu, mangkuk-mangkuk si ipake guna nareken dareh persembahen, mangkuk-mangkuk ingan nutung kumenen, ras kerina barang-barang tembaga si debanna si ipake tupung kebaktin i bas Rumah Pertoton.
15 Kerina barang-barang si ibahan i bas emas ntah pirak nari pe ibuatna, subuk mangkuk kitik ras talam si ipake guna maba arang si merara denga.
16 Barang-barang tembaga si ibahan Raja Salomo guna Rumah Pertoton e, eme dua tiang, gereta-gereta, ras mangkuk galang, la terkira beratna.
17 Tiang si dua e seri tempasna: ganjangna waluh meter sada tiang, i babona lit takal tiang si ibahan i bas tembaga nari, ganjangna 1,3 meter. I sekelewetna tiap takal tiang-tiang e lit sada jerijak tembaga si ihiasi alu galiman tembaga.
18 Tambah si e, ibaba puanglima Nebusaradan pe tertaban Imam si Mbelin Seraya, Sepanya wakil Imam si Mbelin, ras telu kalak nari pengurus Rumah Pertoton.
19 I bas kota Jerusalem nari ibabana bekas puanglima tentera lima kalak i bas penasehat pribadi raja si tading denga i bas kota e, wakil puanglima tentera, si ertugas jadi sekretaris tentera, ras enam puluh kalak pengulu si debanna.
20 Kerina ibaba Nebusaradan ngadap raja Babilon, si sangana i kota Ripla
21 i bas daerah Hamat. I je isuruh raja gelah kalak ndai ipekpeki, jenari ibunuh. Dage bage me kalak Juda iangkut i bas negerina nari, janah ibuang ku negeri Babilon.
22 Raja Nebukadnesar i Babilon nari ngangkat Gedalya anak Ahikam, kempu Sapan jadi Gubernur Juda. Ia itugasken ngaturken kerina kalak si langa ibaba ku Babilon.
23 Kenca kepala-kepala tentera Juda ras anak buahna si langa nerahken bana, megi kerna si enda, ijumpaina Gedalya i Mispa. Kepala-kepala tentera ndai eme Ismael anak Netania, Johanan anak Kareah, Seraya anak Tanhumet, i kota Netopa nari, ras Jesania i Maaka nari.
24 Nina Gedalya, "Labo kam perlu mbiar man pegawai-pegawai Babilon e. Ringanlah kam alu tenang i negeri enda, patuhlah man raja Babilon maka sikap sikerajangenndu."
25 Tapi pitu bulan kenca si e, reh Ismael anak Natania kempu Elisama, anggota keluarga raja-raja, ku Mispa ras sepuluh kalak temanna; ibunuhna Gedalya. Kalak Israel ras kalak Babilon si ras ia i je pe ikut ibunuhna.
26 Kenca bage kerina kalak Israel si musil ras bayak, rikut ras kepala-kepala tentera, kerina lawes ku Mesir, erkiteken mbiar man kalak Babilon.
27 Kenca Ewil-Merduk jadi raja Babilon, i bas tahun e ka minter mehuli perbahanenna man Raja Joyakin i Juda nari, alu mulahi ia i bas penjara nari. Si enda jadi kenca Joyakin telu pulu enem tahun, sepulu sada bulan, dua pulu dua wari dekahna ringan i bas pembuangen.
28 Mehuli kal perbahanen Ewil-Merduk, ipehaga ia lebih asangken raja-raja si deban si ibuang ras ia i Babilon.
29 Emaka Joyakin lanai perlu make paken penjara, janah banci ia man i bas meja raja kidekah geluhna.
30 Tiap wari, asa dekah geluhna, ibereken man bana belanja si tetap guna nutupi keperlunna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA