Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E taon se kapeng dhubellas pamarenta’anna Rato Ahas e Yehuda, Hoseya pottrana Ela jumenneng rato Isra’il, ban marenta e Samaria sangang taon abidda.

² Hoseya dusa ka PANGERAN, tape bannya’na dusana ta’ sampe’ akantha bannya’na dusana to-rato Isra’il se marenta sabellunna.

³ Hoseya eperrange sarta epatellok bi’ Salmaneser rato Asyur, daddi sabban taon ewajibbagi majar pesse opet ka rato Asyur jareya.

⁴ Tape e settong bakto, Hoseya ngerem otosan ka So rato Messer nyo’on bantowanna, sarta laju ta’ majar pesse opet taonanna ka Asyur. E bakto Salmaneser ngaonenge bab jareya, Hoseya laju etangkep sarta epenjara.

⁵ Saellana jareya Salmaneser rato Asyur alorok Isra’il sarta ngeppong Samaria. E taon se kapeng tello’ e dhalem pangeppongan jareya,

⁶ iya areya e taon se kapeng sanga’ pamarenta’anna Hoseya Samaria erebbu’ bi’ Salmaneser. Oreng Isra’il laju eangko’ egabay tawanan ka Asyur. Sabagiyan dhari oreng Isra’il se etawan jareya esaba’ e kottha Halah, sabagiyan e seddi’na Songay Habor e dhaera Gozan, ban sabagiyan pole e tha-kottha e nagara Madai.

⁷ Samaria gaggar lantaran oreng Isra’il dusa ka PANGERAN, Guste Allahna, panyalamet bangsa jareya dhari rato Messer, sarta ngeba bangsa Isra’il kalowar dhari nagara jareya. Oreng Isra’il nyemba la’-alla’an

⁸ ban nerowe kabiyasa’anna sa-bangsa se la eojuk PANGERAN e bakto bangsa Isra’il maju merrange sa-bangsa jareya. Bangsa Isra’il norodi adad se eteptebbagi bi’ to-rato Isra’il,

⁹ sarta ngalakone sabarang se elarang PANGERAN, Guste Allahna. Neng e tha-kottha se kene’ otabana se raja bangsa Isra’il maddek kennengnganna panyemba’anna diba.

¹⁰ E attassa saneyap gumo’, ban e babana saneyap kajuwan se rampa’, epaddeggi gu-tugu ban ca-arcana Dewi Asyera.

¹¹ Bangsa Isra’il ngobbar dupa kaangguy diba, se eobbar e sakabbinna mezbana, akantha kabiyasa’anna sa-bangsa se la eojuk PANGERAN dhari nagara Kana’an. Oreng Isra’il nyemba brahala, maske bi’ PANGERAN la elarang. Sakabbinna lalakon se jahat se elakone bangsa jareya maduka panggaliyanna PANGERAN.

¹² (17:11)

¹³ PANGERAN ngotos reng-oreng otosanna ban bi-nabbina ka ommat Isra’il ban Yehuda epakon manapa’ parengeddan reya: "Mara ambuwi lalakonna se jahat ban toro’ sabadhana parenta ban hokom se bi’ Sengko’ ebagi ka bangatowana ba’na ban ka ba’na dibi’ kalaban parantara’anna para nabbi, Tang di-abdi rowa."

¹⁴ Tape Isra’il ban Yehuda ta’ endha’ ngedhingngagi. Sa-bangsa jareya cengkal akantha bangatowana se ta’ parcaja ka PANGERAN, Guste Allahna.

¹⁵ Isra’il ban Yehuda ta’ endha’ atoro’ ka kon-papakonna PANGERAN ban ta’ esto ka parjanjiyan se ebadhi PANGERAN bi’ para bangatowana. Bangsa Isra’il ban Yehuda ta’ parduli maske li-baliyan eparengeddi, ban nyemba la-brahala se tadha’ gunana, sampe’ sa-bangsa jareya dibi’ daddi ta’ aguna keya. Bangsa Isra’il ban Yehuda jareya nero contona sa-bangsa e kangan kacerra, maske bi’ PANGERAN la elarang.

¹⁶ Ta’ atoro’ ka kom-hokomma PANGERAN, Guste Allahna, sarta agabay sape dhari logam dhadhuwa’ se esemba’a. Bangsa se dhuwa’an jareya agabay arcana Dewi Asyera, nyemba tang-bintang ban abakte ka Diba Ba’al.

¹⁷ Na’-ana’na egabay kurban obbaran ka diba. Reng-oreng jareya ngangguy elmo gaib ban menta petodu ka kon-dhukon se tao ahubungan ban roh-erroh, ce’ bajengnga ngalakone pa-apa se ta’ masenneng panggaliyanna PANGERAN

¹⁸ sampe’ PANGERAN ce’ dukana. Bangsa Isra’il ban Yehuda jareya bi’ PANGERAN ta’ eparduli pole, ebuwang dhari nagara se eparengngagi ka reng-oreng jareya; se gi’ badha pera’ kare karaja’an Yehuda.

¹⁹ Reng-oreng Yehuda ta’ ta’at keya ka kom-hokomma PANGERAN, Guste Allahna. Reng-oreng jareya atoro’ ka kabiyasa’an-kabiyasa’anna oreng Isra’il.

²⁰ Daddi PANGERAN ta’ kasokan pole ngakone ommat Isra’il, bangsa jareya eokom epassra’agi ka so-mosona se kejjem. Bangsa jareya ta’ eparduli, la’-mala’ ebuwang dhari tana se la eparengngagi ka bangsa jareya.

²¹ Saellana bi’ PANGERAN Isra’il epesa dhari Yehuda, oreng Isra’il mele Yerobeyam pottrana Nebat epadaddi ratona. Yerobeyam pas daddi lantaranna ra’yadda mongkore PANGERAN sarta ngalakone sa-dusa se raja.

²² Reng-oreng jareya nerowe Yerobeyam sarta terros ngalakone sakabbinna dusa se elakone ratona,

²³ sampe’ dhi-budhina bangsa jareya bi’ PANGERAN ta’ eparduli pole, la’-mala’ ebuwang dhari tana se la eparengngagi ka bangsa jareya. Kadaddiyan jareya cocok ban parengeddanna Pangeran ka bangsa jareya se epanapa’ kalaban parantara’anna di-abdina, para nabbi. Daddi oreng Isra’il egiba ka pambuwangan e Asyur, ban reng-oreng jareya terros neng e jadhiya sampe’ sateya.

²⁴ Menangka gantena reng-oreng Isra’il se eangko’ ka pambuwangan rowa, rato Asyur ngangko’ oreng dhari Babil, Kuta, Awa, Hamat ban Sefarwaim esaba’ e tha-kottha Samaria. Reng-oreng jareya ngobasane tha-kottha jareya sarta neptep e jadhiya.

²⁵ E bakto buru neng e jadhiya reng-oreng jareya ta’ hormat ka PANGERAN; daddi PANGERAN laju madhateng can-macan epanyeppa’ sabagiyan dhari reng-oreng jareya.

²⁶ Rato Asyur narema reppodan ja’ reng-oreng se esaba’ e tha-kottha e Samaria jareya ta’ tao ka kom-hokomma dibana nagara jareya, daddi diba jareya madhateng can-macan epanyeppa’ reng-oreng jareya.

²⁷ Daddi rato Asyur laju adika’agi sopaja nyare imam kasorang dhari antarana para tawanan se ebuwang ka Asyur; imam jareya epakon pabali ka Samaria. "Soro abali imam jareya ka bengkona ban soro neng e jadhiya, soro ngajarragi kom-hokomma dibana nagara jarowa ka reng-oreng dhissa’," dhabuna rato.

²⁸ Daddi badha settong imam Isra’il, se la eangko’ dhari Samaria ka Asyur, imam jareya epamole sarta laju neng e Betel. E jadhiya imam jareya ngajarragi ka ra’yat baramma sabendherra carana nyemba PANGERAN.

²⁹ Tape reng-oreng se neng e Samaria jareya paggun agabay la-brahalana dibi’ se esaba’ e wel-kowel gabayanna reng-oreng Isra’il se lamba’na neng e jadhiya. Saneyap golongan agabay brahalana bang-sebang e kottha se ekennengnge:

³⁰ Oreng Babil agabay arcana Diba Sukot-Benot; oreng Kuta agabay arcana Nergal; oreng Hamat arcana Asima;

³¹ oreng Awa arcana Nibhas ban Tartak; ban oreng Sefarwaim ngobbara na’-ana’na menangka kurban obbaran ka Diba Adramelekh ban Anamelekh.

³² Salaenna nyemba ba-diba jareya, reng-oreng jareya gi’ nyemba ka PANGERAN. Reng-oreng jareya mele reng-oreng se acem-macem e antarana aba’na dibi’ epadaddiya imam ban epangatorragiya kurban e wel-kowella brahala.

³³ Daddi, reng-oreng jareya nyemba ka PANGERAN, tape gi’ nyemba ka ba-dibana dibi’, menorot adadda nagara asalla.

³⁴ Sampe’ are teya reng-oreng jareya gi’ paggun ajalannagi adadda se kantha jareya. Reng-oreng jareya ta’ nyemba ka PANGERAN ban ta’ atoro’ ka kom-hokomma ban kon-papakonna se eparengngagi ka toronanna Yakub, se enyamae keya Isra’il.

³⁵ PANGERAN la abadhi parjanjiyan kantha reya ban ommat Isra’il, "Ba’na ja’ abakte ka la’-alla’an; ja’ asojud nyemba la’-alla’an jareya otaba aladine la’-alla’an jareya, otabana ngeba kurban ka la’-alla’an jareya.

³⁶ Ba’na kodu hormat ka Sengko’, PANGERAN, se ngeba ba’na kalowar dhari Messer kalaban kobasa se raja; ba’na kodu nyemba ka Sengko’ ban ngeba kurban ka Sengko’.

³⁷ Toro’ Tang kom-hokom ban Tang parenta se bi’ Sengko’ la etoles kaangguy ba’na. Ba’na ja’ abakte ka la’-alla’an laen,

³⁸ ban ja’ paloppa ka parjanjiyan e antarana Sengko’ ban ba’na.

³⁹ Pata’at ka Sengko’, Guste Allahna ba’na, ban ba’na bi’ Sengko’ epasalamedda dhari so-mosona."

⁴⁰ Tape pandhudhu’ Samaria ta’ endha’ ngedhingngagi, gi’ paggun neggu’i dad-adadda.

⁴¹ Daddi, reng-oreng jareya nyemba ka PANGERAN, tape gi’ nyemba ka la-brahalana. Sampe’ sateya toronanna gi’ paggun ngalakone se kantha jareya.

2 Raja-raja

Video 2 Raja-raja 17

Ikuti Kami:

KONTAK | PARTISIPASI | DONASI