Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca sepulu pitu tahun dekahna Pekah anak Remalia jadi raja Israel, jadi raja ka Ahas anak Jotam i Juda.
2 Paksa e umurna dua puluh tahun, janah dekahna ia erkuasa i Jerusalem lit sepulu enem tahun. Ia la ngikutken usihen si mehuli si ibahan ninina Raja Daud, tapi ilakokenna kai si la ngena ate TUHAN Dibatana.
3 Iikut-ikutna perbahanen raja-raja Israel. Terlebih-lebih pe ipersembahkenna anakna si dilaki jadi persembahen tutungen man berhala-berhala, lako ngusih adat si melket i bas penduduk negeri e, si nggo ipelawes TUHAN asum kalak Israel ku je.
4 I bas ingan-ingan kalak perbegu ersembah, i das uruk-uruk, ras i teruh batang kayu si merabun, Ahas mpersembahken persembahen gelehen ras nutung kumenen.
5 Raja Resin i Siria nari ras Raja Pekah i Israel nari reh nerang Jerusalem dingen ikepungna kuta e, tapi la tertalukenca Ahas.
6 (Paksa e pe, ikuasai raja Edom ka mulihken Kuta Elat, dingen ipelawesna kalak Juda si ringan i je. Kuta Elat iingani kalak Edom, janah tetap denga ia ringan i je.)
7 Kenca bage isuruh Ahas piga-piga kalak njumpai Tiglat Pileser, raja Assur e alu tenah enda, "Aku me suruh-suruhenndu si patuh. Rehlah kam, pulahi aku i bas raja Siria ras Israel nari, si sangana nerang aku."
8 Ibuat Ahas pirak ras emas i bas Rumah Pertoton ras i bas perbendaharan istana nari jenari ikiremkenna man raja e jadi hadiah.
9 Sue ras pemindon Ahas, berkat Tiglat Pileser ras tenterana ku Damaskus: italukenna kuta e, ibunuhna Raja Resin, jenari ibabana rayatna ku Kir jadi tabanen.
10 Asum Raja Ahas lawes ku Damaskus njumpai Raja Tiglat Pileser, idahna batar-batar si lit i jah. Emaka ikiremkenna gambar batar-batar e man Imam Uria, seh ku bagin si kitik-kitikna pe.
11 Emaka ipajekken Uria sada batar-batar seri ras si e, janah nggo dung ibahanna ope denga Ahas reh mulihken.
12 Tupung ia mulih i Damaskus nari idah Ahas batar-batar e nggo dung,
13 emaka itutungna rubia-rubia persembahen ras persembahen pangan i babo batar-batar e, dingen iamburkenna anggur persembahen ras dareh persembahen persadan i babona.
14 Batar-batar tembaga si nggo iendesken man TUHAN inganna kelang-kelang batar-batar si mbaru e ras Rumah Pertoton. Erkiteken si e ipiserken Ahas batar-batar tembaga e ku Utara batar-batarna si mbaru e.
15 Kenca bage iperentahkenna Uria nina, "Pakelah batar-batarku si galang enda man ingan persembahen tutungen erpagi-pagi ras persembahen pangan karaben bage pe man ingan persembahen tutungen ras persembahen pangan raja ras jelma si nterem, ras man ingan anggur persembahen jelma si nterem. Amburkenlah ku je dareh kerina asuh-asuhen si ipersembahken. Tapi batar-batar tembaga e aku saja ngenca banci makesa guna ertendung."
16 Emaka ilakoken Uria bagi si iperentahken raja e.
17 Ipesirang Raja Ahas gereta tembaga si ipake i bas Rumah Pertoton, iaguina baskom-baskom si lit i babona; ibuatna pe kudin tembaga i bas gurung lembu tembaga si sepulu dua e, jenari itamakenna i babo binangun batu.
18 Janah guna muat ukur Raja Assur ipindahken Ahas pe i bas Rumah Pertoton e nari ingan pajek kursi kinirajan, ras itutupna pe dalan bengket si khusus man raja guna bengket ku bas Rumah Pertoton e.
19 Kerina si debanna si ilakoken Raja Ahas isuratken i bas kitap Sejarah Raja-raja Juda.
20 Mate Ahas, jenari ikuburken i bas kuburen raja-raja i Kota Daud, janah anakna Hiskia nggantiken ia jadi raja.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA