Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Rat ni Simun Pétrus, demulun idi rasul Yésus Keristus— Kuan lemulun luk pangeh nengalap anu, luk mepad letep dengan anu kai, ngaceku siri Allah, Tuhan tau, idi Yésus Keristus Lun Nengulun:
2 Do' katu idi awang amé'-amé' mula' kuan muyuh, ngaceku muyuh ngiti Allah idi Yésus Tuhan tau.
3 Amung-amung luk inan ulek kuan ulun luk meligan pangeh biré kuan tau ngaceku lalud Tuhan, ngaceku tau kali' Neneh lu pangeh nenawar netau dengan rayeh idi do'Neh sebuleng.
4 Dengan dalan ineh Ieh pangeh nemaré amung baré luk pelaba do' idi luk meluun rayeh ineh luk pijani'Neh kuan tau, pad dengan baré ineh muyuh inan babpat bang ulun Tuhan, pad muit burur muyuh ratnan luk melu luk idi bang tana' ngaceku ratnan pinian burur.
5 Ngaceku ineh do' muyuh mekél ngula' anu muyuh dengan kekamen luk do', idi kekamen luk do' ineh miak uen ngula' dengan ileh,
6 idi ileh ineh miak uen ngula' dengan metueh ngimet burur, idi metueh ngimet burur miak uen ngula' dengan lutep niat, idi lutep niat ineh miak uen ngula' dengan ulun luk meligan,
7 idi ulun luk meligan ineh miak uen ngula' dengan éi', idi éi' ineh miak uen ngula' dengan awa.
8 Kudeng bua' ini idi bang nemuyuh dengan mela, idi ineh luk ngedengan nemuyuh, pad muyuh mekél idi kebua' bang ileh ratnan Tuhan tau Yésus Keristus.
9 Iamo' lemulun luk na bua' luk kudeng ineh, dat sier, idi pangeh nekelupan ratnan ieh pangeh biru' ratnan sala'-sala'neh luk atun ineh.
10 Ngaceku ineh, O kinanak-kinanakku, do' muyuh mekél ngeletep tawar idi pili' Allah ineh, pad muyuh tuped meraben. Kudeng muyuh nganau' kudeng ineh, na muyuh meraruh.
11 Dengan dalan ineh muyuh miak simén semuet bang Imet luk meruked, ieh ineh Imet Yésus Keristus, Tuhan tau idi Lun Nengulun.
12 Ngaceku ineh ui megéi' temina' mada' nemuyuh ratnan ini, sagan pana' muyuh kali' bada' ineh, idi muyuh lutep bang luk matu mepad kudeng luk pangeh ilap muyuh.
13 Bang terawéku, seruked ui mulun, do' ui ngegio niat muyuh dengan mada' nemuyuh.
14 Ui kali' bururku ini dengan segageh mo' miak metutu' maya' kudeng luk linio Tuhan tau Yésus Keristus kuanku.
15 Ui sikal mekél, pad bang anid-anid kareb luk muci ratnan atéku muyuh miak ngerawé ratnan bada' ini.
16 Na kai nemaya' dalan ago luk mebalih, kareb kai ngegala' kuan muyuh ratnan lalud idi acing Tuhan tau Yésus Keristus, iamo' kai sebuleng pangeh nenier rayehNeh.
17 Kai idi kareb Ieh nengalap dita' idi rayeh ratnan Allah Taman kareb Ieh neninger aceh tang rat bang langit ratnan Luk Meluun Rayeh, luk nepebala, "Ini AnakKu luk inanKu mawa, idi Ui mawang niat Neneh."
18 Kai sebuleng neninger uni tang ineh rat bang langit kareb kai pad-pad denganNeh luun pegkung luk meligan ineh.
19 Idi kai meluun rapet ku bala luk bida' nabi, idi do' muyuh ngerawé ineh, ngaceku ieh mepad kudeng lapung luk merasat bang su luk medacem, pad Aco masat, idi gituen rat pa busat aco masat idi ngacang bang niat muyuh.
20 Iamo' luk pun-pun, do' muyuh ngerawé ratnan ini, seburur pana' nateh luk miak ngelio bada' luk biré bang Surat Allah dengan ilehneh sebuleng,
21 ngaceku na luk idi bala nabi luk macing maya' pian lemulun, iamo' acingneh ratnan Allah, idi bila lemulun luk tigio Roh Meligan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA