Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton senamian saq sampun nerimaq iman saq pade solahne kance iman tiang pade, lantaran napi saq kenaq, saq asalne lẽman Deside Isa Almasih, Junjungante Saq Mulie dait Juruselamette. Surat niki lẽman Simon Petrus, salaq sopoq hambe dait rasul Deside Isa Almasih.

² Rahmat dait damẽ sejahtere Allah melimpah tipaq side, sẽngaq side pade kenal kance Allah dait Deside Isa, Junjungante Saq Mulie.

³ Selapuq hal saq bemanpaat jari idup saq solẽh sampun teicanin tipaq ite siq kuase Ilahi-Ne, langan napi saq ite taoq mengenai Deside Isa Almasih saq sampun ngemanikang ite siq kuase-Ne saq mulie dait ajaip.

⁴ Siq care nike Allah ngicanin ite janji-janji saq luar biase dait beraji. Siq janji-janji nike side pade bau lepas lẽman hawe napsu saq jahat saq nyẽdaq dunie niki, dait side pade nerimaq sipat ilahi.

⁵ Keranaq nike, side pade harus pacu-pacu berusahe adẽq side pade tetep percaye lẽq Almasih dait percayende nike tenyatayang siq idup saq solah. Selain idup saq solah, side pade perlu jari dengan saq bedowẽ penenaoq,

⁶ dait selain penenaoq, side pade harus ẽndah tao nguasein diriq. Dait selain tao nguasein diriq, side pade harus ẽndah berusahe miaq diriq jari tabah ngadepin selapuq hal. Selain tabah ngadepin selapuq hal, side pade harus ẽndah idup menurut pekayunan Allah.

⁷ Dait idup menurut pekayunan Allah harus ẽndah telengkapin siq kasih tipaq semeton-semeton seiman. Beterus kasihde tipaq semeton-semeton seiman harus teromboq siq kasih tipaq selapuq dengan.

⁸ Lamun sipat-sipat nike araq lẽq side pade secare belimpah-limpah, side pade gen jari sayan rajin dait berhasil, dalem hal kenal kance Deside Isa Almasih Junjungante Saq Mulie.

⁹ Laguq dengan saq ndẽq bedowẽ sipat-sipat saq maraq nike, pikiranne kontẽq, ie ndẽq tao nyerioq sẽngaq ie lupaq bahwe dose-dosene saq laẽq sampun teapus.

¹⁰ Keranaq nike, semeton senamian, pacu-pacu berusahe adẽq maksut Allah ngemanikang dait milẽq diriq side pade jari sayan teguq. Lamun side pade ngelaksaneang hal nike, side pade ndẽq gen murtat.

¹¹ Siq care nike side pade gen teicanin hak sepenoqne jari tame ojok Kerajaan saq kekel, nike Kerajaan Junjungante Saq Mulie dait Juruselamette Deside Isa Almasih.

¹² Keranaq nike, tiang tetep ingetang side pade mengenai hal nike, timaq side pade sampun nenaoq dait tetep teguq lẽq dalem kebenaran saq sampun side pade terimaq nike.

¹³ Sengonẽq tiang masih idup, tiang merase wajib ngingetang side pade mengenai hal-hal nike.

¹⁴ Sẽngaq tiang nenaoq bahwe ndẽqne ngonẽq malik tiang gen bilin dunie niki, lantaran Junjungante Saq Mulie Deside Isa Almasih sampun nyatayang secare jelas lẽq tiang.

¹⁵ Make tiang gen berusahe adẽq side pade tetep inget hal-hal nike timaq tiang sampun lalo.

¹⁶ Lẽq waktu tiang pade badaq side pade mengenai kuase dait kerauhan Junjungan Saq Mulie Deside Isa Almasih. Selapuq nike ndẽqne dongẽng-dongẽng saq tepiaq siq kepinteran manusie. Keagungan Almasih nike sampun tiang pade serioq mẽsaq.

¹⁷ Tiang pade serioq mẽsaq sewaktu Ie nerimaq kehormatan dait keagungan lẽman Allah Bapa. Waktu nike kedengahan suare lẽman Saq Mahemulie, saq bemanik lẽq Ie, "Niki Bije Tiang saq Tiang kasihin. Ie saq nyenengang Tiang."

¹⁸ Tiang pade dengah suare nike dateng lẽman sorge sewaktu tiang pade araq bareng kance Ie lẽq atas gunung saq suci nike.

¹⁹ Keranaq nike tiang pade sayan yakin malik lẽq Manik Allah saq tesampẽang siq pare nabi. Bagusan side pade merhatiang manik nike maraq merhatiang dilah saq besinar lẽq taoq saq peteng jangke tiwoq jelo, dait cahaye bintang timuq mulai besinar lẽq dalem atẽnde.

²⁰ Hal utame saq harus side pade taoq: Bahwe ndẽq araq sopoq juaq nubuat lẽq dalem Kitab Suci bau tetapsirang menurut pendapet mẽsaq.

²¹ Sẽngaq ndẽq uwah araq nubuat saq tehasilang cume lantaran kemẽlẽq manusie. Laguq Roh Suci nguasein dengan nike jari nyampẽang manik saq asalne lẽman Allah mẽsaq.

2 Petrus

Video 2 Petrus 1

Ikuti Kami:

KONTAK | PARTISIPASI | DONASI