Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ya'ami ira talifusõ si no manõndra famati si mane ya'aga. Yesu Keriso, Ya'ia Lowalangi ba Razo Sangorifi ya'ita, zi no mame'e khõda famati andrõ, me no Ifalua zatulõ. Sura andre moroi khõ Zimoni Fetero, samõsa enoni ba sinenge Yesu Keriso.

² Ba ya Lowalangi zamahowu'õ ya'ami ba same'e khõmi fa'ohahau dõdõ irege fahõna, bõrõ me no aboto ba dõdõmi Lowalangi ba Yesu So'aya ya'ita.

³ No I'oguna'õ wa'abõlõ-Nia Lowalangi ba wame'e khõda fefu ngawalõ hadia ia ni'oguna'õda ba wangalulu khõ-Nia. Ifalua da'e molo'õ fa'aboto ba dõdõda Ia si no mogaoni ya'ita wefao ba wanandra fa'ebua ba fa'asõkhi dõdõ-Nia.

⁴ Ba lala da'õ I'amualagõ Lowalangi khõda howuhowu fondrege zebua ba sebua bõli si no Ifabu'u. Ba howuhowu andrõ te'efa'õ ami moroi ba wangisõ si lõ sõkhi, samakiko ulidanõ andre. Ba fao ami ba wanõndra urakha ba gamuata wa'alowalangi.

⁵ Andrõ bõrõ da'õ, miforege sindruhundruhu ena'õ ituhini wamatimi andrõ fa'auri si sõkhi. Baero wa'auri si sõkhi, moguna so khõmi wa'atuatua,

⁶ ba baero wa'atuatua, si lõ tola lõ wa mifatõrõ gõi wa'aurimi. Ba baero wa tola mifatõrõ wa'aurimi, ya mifamamaha gõi wa'aurimi andrõ ba wanaha tõdõ ba wamaondragõ ngawalõ hadia ia fefu. Baero wanaha tõdõ ba wamaondragõ ngawalõ hadia ia fefu, lõ tola lõ auri gõi ami ba wolo'õ somasi Lowalangi.

⁷ Ba folo'õ somasi Lowalangi andrõ, lõ tola lõ tefõnui ia ba wangomasi'õ awõda Niha Keriso. Ba aefa da'õ, ena'õ si tedou ami ba wangomasi'õ talifusõmi Niha Keriso, ba ba wa ngomasi'õ niha fefu.

⁸ Fefu da'õ no amuata soguna khõmi. Na no fahõna khõmi gamuata si manõ, ba tobali muhi'a dõdõmi dania ba mowua ami, ba tedou gõi wa'aboto ba dõdõmi Yesu Keriso, So'aya ya'ita.

⁹ Ba niha si lõ mangokhõgõ amuata si manõ, ba no sadogodogo fangerangera; lõ i'ila hadia ia ba olifu ia wa horõnia si no numalõ andrõ no muheta.

¹⁰ Bõrõ da'õ, ya'ami ira talifusõ, miforege wohalõw̃õ ena'õ fogaoni Lowalangi ba fanuyu-Nia ya'ami andrõ itugu aro. Na milau zi manõ, ba lõ te'ala ami.

¹¹ Ba zi manõ, tetehegõ dania khõmi we'amõi ba Mbanua si lõ aetu andrõ moroi khõ Zo'aya ba Razo Sangorifi ya'ita Yesu Keriso.

¹² Andrõ wa lõ mamalõ ufasugi ba dõdõmi da'õ fefu, hew̃a'ae no mi'ila ia ba faduhu sibai dõdõmi ba duria soroi Lowalangi andrõ si no mitema.

¹³ Fatua auri nasa ndra'o, u'angeragõ tõdõgu wa si lõ tola lõ ufasugi ba dõdõmi ngawalõ da'õ.

¹⁴ Bõrõ me u'ila wa lõ ara tõ urõi dania gulidanõ andre, me So'aya ya'ita Yesu Keriso zi no mangombakha Ya'ia khõgu.

¹⁵ Ba uforege sindruhundruhu ena'õ na no urõi gulidanõ, ba lõ aetu itõrõ tõdõmi da'e fefu.

¹⁶ Ba ginõtõ ma'ombakha'õ khõmi ha wa'amolakhõmi we'aso Zo'aya ya'ita Yesu Keriso, ba lõ ma'o'õ hikaya fayafaya nifakhai dõdõ niha. Fa'amolakhõmi Keriso andrõ no ma'ila faoma hõrõma samõsa.

¹⁷ So ndra'aga ba da'õ me Ifosumange awõ wa Ifolakhõmi Ia Lowalangi Ama. Ba ginõtõ da'õ terongo li Fondrege Zolakhõmi, sanguma'õ khõ-Nia, "Ono-Gu omasiõ da'e, wa'omasi-Gu Ia!"

¹⁸ No marongo li andrõ si otarai zorugo me so ndra'aga awõ-Nia yaw̃a ba hili ni'amoni'õ andrõ.

¹⁹ Da'õ mbõrõ wa abõlõ faduhu sa'ae dõdõma duria Lowalangi andrõ ni'ombakha'õ ndra sama'ele'õ. Ha wa'asõkhi na mitõngõni duria andrõ, bõrõ me turia andrõ, hulõ wandru sohagaini naha si no ogõmigõmi irugi tohare wa'amoluo, ba haga madala zi haga bakha ba dõdõmi.

²⁰ Ba si ofõna sibai, ya mitõrõ tõdõmi da'e: Turia soroi Lowalangi sanandrõsa ba ngawalõ zalua dania, tebai mufo'eluaha molo'õ sõndra dõdõ zamõsana.

²¹ Bõrõ me lõ irai so niha soroi ba wa'omasinia samõsa, tola ifa'ema duria soroi Lowalangi sanandrõsa ba ngawalõ zalua dania. Sango'ou niha ba wama'ema turia soroi Lowalangi andrõ no Eheha Lowalangi samõsa.

2 Petrus

Video 2 Petrus 1

Ikuti Kami:

KONTAK | PARTISIPASI | DONASI