Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ O senina-senina, ate kami gelah ietehndu kai si nggo ibahan Dibata arah lias AteNa nandangi perpulungen-perpulungen si i Makedoni enda.

² Perpulungen-perpulungen e nggo iuji alu mesangat alu kiniseran-kiniseran si inanamina. Tapi keriahenna si simpar dingen kemusilenna si la teralang e erbahanca ia melumbar mere, tempa-tempa ia bayak.

³ Pang aku ngatakenca, maka perpulungen e nggo mere asa ngasupna -- lebih nge pe asa ngasupna -- alu ukurna ersuruh.

⁴ Alu meseksek ipindokenna man kami gelah ibereken kesempaten man bana guna ikut muat bagin i bas nampati kalak Kristen si i Judea.

⁵ Labo terjeng si iarapken kami e saja! Si pentingna eme iendeskenna dirina man Tuhan. Jenari, alu peraten Dibata, iendeskenna pe dirina man kami.

⁶ Ngidah si e, emaka ipindo kami man Titus gelah ia mulihken ndahi kam guna nerusken dahin keleng ate si nggo ibenakenna emaka idungina.

⁷ Kam sampur kap i bas kai pe: i bas kiniteken, i bas ngerana, i bas pemeteh, i bas ketutusen i bas kai-kai pe, bage pe i bas keleng atendu nandangi kami. Emaka sampur ka lah min kam i bas dahin keleng ate enda pe.

⁸ Si enda kukataken labo selaku perentah. Tapi alu encidahken kuga kalak si deban ergiah-giah i bas nampati, ateku nguji ntah kin kekelengenndu e tuhu-tuhu tulen.

⁹ Ietehndu uga liasna Tuhanta Jesus Kristus: maka aminna bayak gia Ia, tapi guna kiniulinndu, IpemusilNa BaNa, gelah arah KemusilenNa e jadi bayak kam.

¹⁰ Rikutken pengakapku: guna kiniulinndu, dungilah dahin si nggo ibenakenndu tahun nderbih. Kam me si pemenana kal ndahiken dahin e, labo saja ndahikenca, tapi pe ukur ersuruh ndahiken dahin e i bas kam me si pemenana turah.

¹¹ Genduari teruskenlah, dingen dungi dahin e! Ergiah-giahlah ukurndu ndungisa, bagi ergiah-giah nai ukurndu menakenca. Dahikenlah e rikutken kai si lit i bas kam genduari.

¹² Adi litlah ukur ersuruh guna mere, maka ialoken Dibata me pemere e erpalasken kai si lit i bas kita, labo erpalasken kai si la lit i bas kita.

¹³ Labo ateku mpenahangi kalak si deban alu nambahi babanndu; tapi gelah ula si tualen

¹⁴ kelebihen si lit i bas kam genduari ras kekurangen si lit i bas kalak e genduari. Kune denggo kelebihen ka kalak e, ia ka denggo encukupi kekurangenndu. Alu bage lanai situalen.

¹⁵ Bagi si lit tersurat i bas Pustaka Si Badia, "Kalak si mbue ipepulungna la ia kelebihen, janah kalak si sitik ipepulungna la ia kekurangen."

¹⁶ Bujur ningkami man Dibata si erbahanca maka bali ras kami ergiah-giah ukur Titus erdahin guna kiniulinndu.

¹⁷ Labo saja meriah ukurna ngaloken pemindon kami, tapi pe ergiah-giah ukurna seh maka alu ukurna ersuruh nggo itetapkenna ndahi kam.

¹⁸ Isuruh kami pe ikut ras ia sekalak senina si ipujiken perpulungen-perpulungen i japa pe erdandanken dahinna meritaken Berita Si Mehuli.

¹⁹ Labo e saja, tapi pe ia nggo ipilih dingen itetapken perpulungen-perpulungen jadi teman kami i bas perdalanen ndahiken dahin keleng ate e. Si e ilakoken kami guna kiniulin Tuhan dingen guna encidahken ukur kami ersuruh ndahiken dahin e.

²⁰ Isilahken kami kal maka ise pe la nalahken kami i bas kami ngurus pemere si ibereken alu melumbar e.

²¹ Tujun kami eme guna ndalanken si mehuli, labo saja i lebe-lebe Tuhan, tapi pe i lebe-lebe manusia.

²² Bage pe isuruh kami sekalak nari seninanta ikut ras kalak e duana. Nggo megati ia iuji kami alu erbage-bage cara, janah teridah maka tetap ergiah-giah ukurna. Janah genduari reh ergiah-giahna ia perbahan bage belinna kinitekenna kerna kam.

²³ Adi kerna Titus, ia kap temanku sada dahin kal guna kam. Adi senina-senina si dua kalak nari e, ia me utusen perpulungen-perpulungen si jadi kemulian Kristus.

²⁴ Cidahkenlah keleng atendu man kalak enda, gelah arah ia kerina perpulungen-perpulungen meteh kerna kekelengenndu e. Alu bage kai si ipujiken kami kerna kam teridah maka tuhu kap.

2 Korintus

Video 2 Korintus 8

Ikuti Kami:

KONTAK | PARTISIPASI | DONASI