Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto ka 'o ngo-ngaku moi tinisiboso-bosono! 'O jaji 'iodumu ge'ena ma dumutu ngoneno. Sababu ge'ena ngone salingou patebini 'o sagala 'imedi-mediri gee yamediri nanga singina de nanga roese. Ngone salingou powihoromati ma Jo'oungu ma Dutu, la ngone 'idadi po'ahu duga kapowileleani 'una de 'idadi potebini 'isoka 'una.

² Tanu kaminisi-singina ngomino de tatapu minidawongo 'ania singina ma dodaka. Ngomi mia sala koi'iwa ka moika ma, de komoiwa miakisirugi. Nago'onaka bato ngomi ka ma eta ma komiakiforikiwa.

³ Ngoi koge'ena tongose ge'ena ma ngale kotinisisalawa. Sababu 'isoka gee ma sira tongosekau, ngomi minisibosono ma sala nginika, de ngone ne'ena 'o giamanai pomasida'ahu de pomasidosongene.

⁴ Ngoi posironga tiningakuoka. Ma ngale ngini, so 'ai singina 'iamoko. Ngaro ngomi ma gudai 'o sangisara midutuku, ma sababu ngini so 'ai singina posironga 'ikuatoka de posironga tomorenoka.

⁵ Gee ngomi miototara 'o Makedoniaka, ngomi koidadiwau miomaomasa. 'O sagala moi-moioka miamaoku 'iodumu kaisusa. Naga midutuku 'okia sonaa 'ini-'inioka. Naga 'o nyawa komisanangiwa, de mita mia singina ma dodaka miamao mimodongo ma sala.

⁶ Duga 'amalaha ma Jo'oungu ma Dutu kaitaurika wosikuata 'o nyawa manga singina 'i'ogu-'ogu. 'Una wosisanangi 'amia singina de 'o Titus 'awi bo-boa.

⁷ 'Amia singina 'isikuata ge'ena duga ka 'o Titusuwa woboakau, ma mita sababu 'una wositotara kokia 'una wi singina 'imorene sababu ngini. 'Una wositotara ngomino 'ato ngini nioduaka ma sala pomakamake; de ngini nimatoduba ma sala ma ngale 'okia naga gee 'idadi-dadiokau ngoneka; de ne'ena ngini ngoino nioboaka. Ma ngale ge'ena ngoi 'ifoloiosi tomorene.

⁸ Ngaro 'ai surati nia singina ya'ogu, ma ngoi kotomatodubawa tolefo ma surati ge'ena. Ma goungu gee ngoi tanako 'ato 'ai surati ge'ena 'ania singina ya'ogu ngaro ka 'o 'orasi moi ma, ngoi mita 'o 'orasi moi tomatodubaka.

⁹ Duga ma 'orasi ne'ena ngoi tosanangi ge'ena ma sababu ko nia singinawa 'isusa, ma 'ena nia singina ma susau ge'ena so niomangali. Ma goungu 'ania singina ma susa ge'ena 'imakamoteke de ma Jo'oungu ma Dutu 'awi mau, so ngomi kominisirugiwa nginika.

¹⁰ Sababu 'o singina ma susa 'isoka koge'ena, ma duanguku pomaogoro 'o sowono podiai so pamake 'o laha. De ngone 'asa kopomatodubawa de 'o singina ma susa koge'ena. Ma 'ena, 'o singina ma susa gee 'imakamoteke de 'o nyawa ma mau, ma du'uruku pomakati-tingaka de ma Jo'oungu ma Dutu.

¹¹ Bika niosi-singina, nia singina ma susa gee 'imakadaene de ma Jo'oungu ma Dutu 'awi mau, ge'ena ma duanguku 'okia 'idadi nginioka. Ma duanguku ge'ena la ngini niomariwo niosigou-gounguku niosidumutu 'ato nia sala koi'iwa, niodu'uduku 'o sowono, niodomodongo 'okia naga 'idadi-dadiokau, nioduaka pomakamakeli de de ngoi, niomagae, de niomodeke niakihukumu 'o nyawa gee de manga salaka. Ne'ena 'iodumoka dau ngini niosidumutokau 'ato ngini nia sala koi'iwa.

¹² So ngaro ngoi tolefokau 'o surati ge'ena, ngoi tolefo ge'ena ma ngale kotowisito-torouwa gee 'o nyawa de 'awi salaka gu'una. De mita kotakisiboawa 'o nyawa yosa-sangisara sababu manga singina wasusakau ge'ena. Ngoi tolefo 'o surati ge'ena la ma Jo'oungu ma Dutu 'awi bionoka, ngini ma sirete nionako 'ato posironga minikalesangioka ngomino.

¹³ Ge'enau so to ngomi mia singina 'isikuata. 'Iregu de mia singina 'isikuata, 'ifoloiosi mia singina 'imorene sababu miamake 'o Titus 'awi morene. To 'una wi singina 'isikuata sababu ngini 'Esa moi nioodumu.

¹⁴ Ngoi ma goungu tinisiie-iekau 'o Titus wi bionoka. 'Amalaha ngini konisimae-maekuwa ngoi. 'Iodumu gee ngomi miongosekau nginika ge'ena ma goungu. Koge'enali mita gee ngomi minisiie-ie ngini 'o Titus wi bionoka ge'ena ma nyo-nyata ma goungu mita.

¹⁵ Ma 'orasi ne'ena 'una kaifoloi monga winisibosono ngini, sababu 'una wanganonie kokia ngini nioodumu niomau niodomoteke 'awi 'aturu, de kokia ngini winidawongo niosidi-diai de winisingounu.

¹⁶ Ngoi tosanangi ma sala, sababu 'o sagala moi-moioka 'idadi tiningaku.

2 Korintus

Video 2 Korintus 7

Ikuti Kami:

KONTAK | PARTISIPASI | DONASI