¹ Zen in zep, aya-wal oso-wal, sap Alap kirekam nesa gu-gubiridaka, zen zep nere mae mo enlala naban enho naban tingare karek-karek nakon nen lalak ta gwibin. Enho lalak enkam nen lowehe gwen, hen Alapsa bap nen asyas makan enlala gwe-gweblan.
² Hwena aya-wal oso-wal, ere mae mo abe mae hap de kwasang-kwasangna emki esek gulsen. San kie ebon mae onak zini karek lak? Ahaksa aha maena san kie yasik lak? Hen san kie emsa te-ala mae hap aberbe la gwibik?
³ Ëe kirekam em dikim esaher gwen hap home ki ale gulzim– anakan dikim eenlala gwen hap, “Eiwa, diki te-alasa emaka olzimk.” Sap men kirekame emsa gubiridal, ee serkame emsa kwasang eibirida gwenan. Hendep ee de juwen maekam ahaksa nama de lowehe gwenkam, ee molye emsa de kwasang gwibirida gwenna olzausuk.
⁴ Ëe, Paulus, mese emsa dawemkam anakan taiblibiridak, “Ëe de zeno mae mo lowe hensa de oto gulsun hup gubiridankam, zen molya asa jal neblak.” Hen ee namae emsa anakan sam gwesibirida gwenan, “Zen ano walas dawem-dawemna.” Ëe sap ere mo wal bose walya ban kareksae zigoltowe gwenan. Hwena emsa de enlala gwibiridankam, ee dekam zebe enlala nakon esewehe gwenan, hen ano mae mo isrip-srina dekam tangan zep taman kini gwenan.
⁵ Hwena eiwa, ee kime Makedonia mo langnak yaing gwek, dekam ano mae mo enhona hom sewe heka. Sap ee karekna da-en home ze oltowe gweꞌak. Dekam zewe de zini man asa husus neibirida gweꞌak, hen man asa karek da gwibik. Hen deban ebon mae onakore ola home esane gweꞌak, zebe enlala nakon esewehe srem gwek.
⁶ Hwena enlala dowe hanan zi hip Alap enho tatetesa zer gwizimnira. Zep Titus Bak kim ebon mae onakon abon mae onak hata zaka, dekam zep ano mae mo enlalana sewe hezimki.
⁷ Zeno hatazan en hap home etatete gwek, hwena zen kim anakan aisil gwe zakake, “Korintusk de zini ano enhona dawemkam ap se da soneblak, hen zen dawemkam edwam gwe-gweꞌan– Paulussu de etan zertowen hapye. Zen man angkam damnak anakan ekira-kla gwe-gwenan, ‘Eiwa, ee ama Paulussu kirekam karek lak.’ Hwena zen angkam eno tahasa de tri so gweblan hap edwam gwe-gweꞌan.” Ëe kime kirekam Titus hon emsa salbiridak, ama tangan serkam isrip-sri gwek.
⁸ Ëe nonol ama sap enlala gwe-gweꞌak, “Ëe ba habe zeno mae mo kareksa de dri yulzimdin hip de suratna insa ale gul sonezimk? Zen sa hwena enlala nik edowe hanal.” Sap eiwa kirekame enlala gwe-gweꞌak, hwena angkam mese dam gulsul, “Ëe ama sam gwesik– kirekam de emsa jal gwibiridankamye.” Ëe eno mae mo enlala dowe hananna in kon home sam gwesiꞌin. Hwena ena dekone ehaleꞌan. Hen angkam enlala dowe hananna in mes tap gwizimdi. Zep kirekam airis. Ëe home kim emsa karek tabik. Alap Zen kirekam nesa dwam gwibirida gwenda, “Zen dikire zere mae mo enlala dowe hanan nakon ehale gwek.”
⁹ (7:8)
¹⁰ Sap Alap mo dwam gwibin sin de enlala nik dowe hanankam, zen dekam zebe ehale gwenan, hendep zep esa engaya gwer. Desa bejen gubin, “Zen karekna.” Hwena Alapsa de tame tan srem zini zere mae mo karek-karek gol gwen nakon sap ki enlalana edowe hana gwenan, hwena dekon hom ehale gwenan. Hwena dekam nama juwen ora san ang ta tine gwenan. Zep auhu-kama enlalakam de dowe hananna, zen eiwa karekna.
¹¹ Em zebe esam gwesik, sap em Alap mo dwam gwibin sine enlalana edowe hanak, hen zebe ehalek. Em zebe ewet gwesin hip edwam gwek. Hen men zen ekarek gwek, em zebe desa anakan jal eibiridak, “Em ba habe Paulussu kirekam karek lak?” Em zebe Alap mo jala airibik. Hen dekam zebe edwam gwek– ee de etan emsa amjanbin hipye. Hen zebe ano titi tabin sin de ang tan hap esyal-syal gwek. Dekam zebe anakan ola aha-en uk, “Men zen ekarek gwek, kirekam esa halen labir.” Dekam zebe dawemkam tingare zi mo nwenak anakan oltrek, “Ëe home karek gol gwen zi niban ola aha-en uk– dekam de karekna insa syal gwibin hipye.”
¹² Zep suratna insae nonol ale gulzimk, zen anakan dikim emsa klis gun hup hom, “Zen karek gweka,” ahaksa, “Zini in desa karek taka.” Hwena ee anakare enlala nabane ale gulzimk, “Zen kim de ano suratnak de ola an san Alap mo nwe kara gwennak ang taꞌak, dekam sa zen anakan dam nulsul, ‘Nen eiwa Paulus mae mo ol san de ang tan hap ema tangan esyal-syal gweꞌan.’”
¹³ Sap em ano ol san kirekame ang tak, ano mae mo emsa de ngalap gwibiridanna dekam zebe esewehek. Sap em dekam Titus Bak mo enlalana mese se la soneblak. Zep zen kim ebon mae onakon hata zaka, isrip-sri naban zep ebe mae hap dena asa aisil gwibirida zaka. Ëe dekam zebe hen mamkam eisrip-sri gwek.
¹⁴ In kim Titus emsa amjanbir srem gweꞌanka, ee ama dekam hamal hap gubluk, “Korintusk de Kristen zini in dawem- dawemna. Zen sa dawemkam eno titi tabin sin ang tal.” Zep angkam ee home saher gweblaꞌan. Sap men kirekame ebe mae hap dena Titussu gubluk, hendep em kire enkame eblak. Ena tawana: Ebon mae onak kime gwe gwek, ee home emsa boton ta gwibik. Zep hen Titussu home boton tak– ebe mae hap denaye.
¹⁵ Titus mo kwasangna angkam ebe mae hap dena mam tanganna, sap zen anakan emsa enlala gwibirida gweꞌara, “Zen dawem enkam asa blikip gwesiblin naban neirink, hen zen kitak ano ol san dawemkam ang ta gwek.”
¹⁶ Zep angkam ee ama tangan emsa sam gwesibiridaꞌan, sap mes tangan dam gwesil: Em in taiblibiridan tanganna.