Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lantaran tiang pade bareng-bareng begawẽan ngiring Allah, make sanget siq tiang pade tunas ndaq side pade sie-sieang rahmat Allah saq sampun side pade terimaq nike.

² Lẽq Kitab Suci, Allah bemanik, "Lẽq waktu Tiang seneng, Tiang sampun dengahang side, dait lẽq jelo penyelametan, Tiang sampun nulung side." Mangkin niki waktune Allah seneng, mangkin niki jelo penyelametan nike!

³ Tiang pade ndẽq mẽlẽ pelayanan tiang pade tesalaqang, keranaq nike tiang pade berusahe ndẽq ngebẽng ndẽq ngebẽng sopoq dengan juaq jari ngelaksaneang hal nike.

⁴ Sebalikne, dalem selapuq hal, tiang pade nyatayang bahwe tiang pade hambe-hambe Allah. Sẽngaq, segale macem kesulitan sampun tiang pade alamin dait tiang sabar:

⁵ Tiang pade tesiksaq, tebui, tekembul; tiang pade begawẽan Jangke lelah, kereng ndẽq tindoq dait kereng ẽndah ndẽq bedowẽ keloran.

⁶ Secare tulus, bijaksane, sabar dait murah atẽ, tiang pade nyatayang bahwe tiang pade hambe Allah. Tiang pade ẽndah beharep sepenoq angen lẽq pertulungan Roh Allah, dait siq kasih saq ihlas,

⁷ dait dalem kebenaran dait kekuasean Allah, tiang pade nyatayang bahwe tiang pade hambe-hambe Allah. Tiang pade beharep lẽq pekayunan Allah jari senjate tiang pade jari nyerang atao bẽle diriq.

⁸ Tiang pade tehormatin, laguq tehine ẽndah; tepuji, dait tepitnah ẽndah. Timaq tiang pade jujur, tiang pade tetuduh ndẽq jujur.

⁹ Tiang pade ndẽq teanggep kesohor, laguq tiang pade tekenal siq selapuq dengan. Tiang pade teparan matẽ, laguq nyatene tiang pade masih idup. Timaq tiang pade teaniaye, tiang pade ndẽq matẽ.

¹⁰ Timaq angen tiang pade tepiaq asẽq, laguq tiang pade tetep seneng ẽndah. Ruene tiang pade miskin, laguq tiang pade sampun miaq luwẽq dengan jari sugih. Ruene tiang pade ndẽq bedowẽ napi-napi, laguq setetune tiang pade bedowẽ selapuq-lapuqne.

¹¹ Semeton senamian saq tiang kasihin lẽq Korintus! Tiang pade sampun terus-terang lẽq side. Selapuq isi atẽn tiang pade sampun tiang pade sampẽang.

¹² Lẽq dalem atẽn tiang pade, araq taoq saq belẽq umaq side, laguq kodẽq gati taoq umaq tiang pade lẽq dalem atẽnde.

¹³ Mangkin, alurang tiang ngeraos maraq lẽq anak-anak tiang mẽsaq. Pade bukaq atẽnde umaq tiang pade.

¹⁴ Ndaq side bepasangan kance dengan-dengan saq ndẽq beriman lẽq Deside Isa; hal nike ndẽqne paut. Ndẽqne mungkin hal saq kenaq iniq besopoq kance saq jahat! Napi iniq cahaye besopoq kance peteng?

¹⁵ Napi kancen pade antare Almasih dait Belial? Napi kancen pade dengan saq beriman lẽq Almasih dait dengan saq ndẽq beriman lẽq Almasih?

¹⁶ Napi hubunganne antare gedẽng Allah kance berhale? Ite niki gedẽng Allah saq idup. Allah mẽsaq bemanik, "Tiang gen araq lẽq tengaq-tengaq ie pade, dait idup bareng kance ie pade. Tiang gen jari Allah ie pade, dait ie pade gen jari umat Tiang.

¹⁷ Keranaq nike, bilin dengan-dengan saq ndẽq kenal Allah nike, dait kelin diriqde lẽman ie pade. Ndaq gati berubungan kance saq najis, make Tiang gen nerimaq side.

¹⁸ Tiang gen jari Bapa side, dait side gen jari bije-bije Tiang, maraq nike manik Tuhan Saq Mahekuase."

2 Korintus

Video 2 Korintus 6

Ikuti Kami:

KONTAK | PARTISIPASI | DONASI