Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ne'ena ge'ena ko ma ngalewa 'ato ngomi ma sirete mimasiie. De komioparaluuwa 'o surati nginino bolo nginika gee 'isinyata 'ato 'okia sonaa yaowa-owa 'o gudai miadiaiokau, 'isoka gee 'o nyawa 'iregu yanonu-nonu. Ngomi komiosidumutuwa de komioparaluuwa.

² Nginiou ma sirete matero ka 'o surati gee 'isinyata 'ato ngomi ne'ena miadiaiokau 'okia sonaa yaowa-owa 'o gudai, gee mianako 'amia singinaka de 'o nyawa 'iodumu 'idadi yanako de yamake 'ania 'ahuoka.

³ 'Ona ma sirete 'idadi yamake 'ato ngini ge'ena matero ka 'o surati gee ma Kristus wotulisi, gee 'isidingoto ma ngekomo ngomi. 'O surati ge'ena 'isitulisi ko de 'o tintawa, ma 'ena de ma Jo'oungu ma Dutu wo'ahu-'ahu wi Ngomasa 'Itebi-tebini ma manarama, de mita ko 'o teto 'i'alu-'alusukuwa 'isitulisi, ma 'ena 'o nyawa ma singinaka.

⁴ De 'amia ngo-ngaku 'ikua-kuata ma Jo'oungu ma Dutuka ma ngekomo mimarimoi de ma Kristus, ngomi miomoroini miosidemo ge'ena 'iodumu.

⁵ Ngomi komiongosewa 'ato ngomi mia'akunu miadiai 'o manarama ne'ena, ma 'ena ma Jo'oungu ma Dutu ma sirete mikulano 'o guata.

⁶ 'Unau so ngomi mia'akunu mileleani 'una ma ngale miosihabari 'o jaji ma sungi, 'o jaji gee ma titi ma Jo'oungu ma Dutu wi Ngomasa 'Itebi-tebini gee 'imanarama 'o nyawa manga singinaka, so ko 'o besesonginowa gee 'isilefo-lefoku 'o teto 'i'alu-'alusoka. Sababu gee 'ilefo-lefoku 'o teto 'i'alu-'alusoka, ge'ena koinasi'ahuwa, ma 'o Ngomasa 'Itebi-tebini ge'ena 'inasi'ahu.

⁷ Ma 'orasi 'o besesongo gee koinasi'asa-'asawa 'o 'ahu 'ika-kakalika ge'ena 'isilefo 'o teto 'i'alu-'alusuku, 'ena ma Jo'oungu ma Dutu 'awi darangi 'isiwara posironga 'iletongoka 'o Musa wi bionuku ma ngale ma Jo'oungu ma Dutu woboano. 'Awi cahaya ge'ena koge'enau ma letongo sigado 'o Israeloka koya'akunuwa yaungini 'o Musa 'awi bionika, ngaro ma 'orasi ge'ena 'o Musa wi bionoka ma letongo ge'ena 'ikurueu 'irongo ma. Aa, nako yodiai 'o besesongo gee koinasi'asa-'asawa 'o 'ahu 'ika-kakalika ge'ena ma yositatapu de ma siwara koge'ena ma ginitara,

⁸ ma raiokau 'ifoloiosi ma cahaya 'ikinitara ge'ena la gee 'isitatapu 'o besesongo ma du'uru gee 'o Ngomasa 'Itebi-tebinino.

⁹ Nako 'o besesongo gee ma duanguku 'o nyawa yakihukumu, ge'ena la 'o jaji ma sira, ma koge'ena ma kumati, ma raiokau 'o besesongo gee 'isidadi 'o nyawa yomarimoioli de ma Jo'oungu ma Dutu ge'ena la 'o jaji ma sungi 'ifoloi 'ikumati.

¹⁰ 'Idadi pongose 'ato 'okia naga gee ma sira 'iku-kumati, ge'ena ma 'orasi ne'ena koikumatiwau sababu 'o besesongo ma sungi 'ifoloi 'ikumati.

¹¹ 'O besesongo ma sira gee koikakaliwa ma de ma kumatioka, ge'ena ma rai 'o jaji ma sungi 'ifoloiosi ma kumati 'iamoko sababu 'ena 'ika-kakali.

¹² Sababu ngomi miongano-nganonou 'o jaji ma sungi ge'ena 'ika-kakali, so ngomi miomo-moroini miositotara 'o Habari ma Owa.

¹³ Ngomi 'iso ko 'o Musawa gee wi biono waluunuku de 'o lu-luunu, la 'o Israeloka 'uwa yamake ma Jou wi karamati ma darangi, gee rekeni 'iisangoka 'o Musa 'awi bionoka.

¹⁴ Ma 'una salingou wodiai koge'ena sababu to 'ona manga singina 'i'opini. De 'ona koyasahewasi 'o Besesongo 'o Musa wi bukuoka sababu sigado ne'ena to 'ona manga singina koipelengawasi. 'Okia naga gee yatatoko manga di-dibangi ge'ena 'idadi 'ipelenga, nako la yongaku de yomarimoi de ma Kristus.

¹⁵ Ma 'orasi ne'ena mita, nako 'ona yabaca 'o Musa wi buku, 'ona manga singina koipelengawasi, matero ka 'o lu-luunu ge'ena kayatamunosi to 'ona manga di-dibangi.

¹⁶ Ma nako moi yomaogoro 'o sowono yodiai de yolio ma Jouka, ge'ena manga di-dibangi 'asa 'ipelenga matero ka 'o lu-luunu 'i'aikokau.

¹⁷ Sababu ma Jou ge'ena la 'o Ngomasa. De kiaka naga 'awi Ngomasa 'imanarama, 'o nyawa gee 'isoka 'inapusuika 'asa 'inasipidili.

¹⁸ Ma 'orasi ne'ena ngone poodumu matero ka nanga biono ma lu-luunu 'i'aikokau so kapamake ma Jou 'awi kumati, de posidumutu ma Jou Yesus 'awi kumati ge'ena nanga 'ahuoka. De sababu ge'ena ngone kaitaurikau 'inangali podadi 'isoka 'una. Gee 'ito'ingo monga de kaifoloi monga posidumutu ma Jou 'awi kumati. 'O kumati ge'ena ma Jou 'awi Ngomasa 'Itebi-tebinino.

2 Korintus

Video 2 Korintus 3

Ikuti Kami:

KONTAK | PARTISIPASI | DONASI