¹ Hwena ee de kire hap denaka ebe mae hap ale gul sonezimdinkim, dekam san ha anakan esa etan asa enbiridal? – “Zen kirekam man zenaka ben-jana dabiꞌin.” Hwena ee ama emsa enlala sobiridaꞌan: Eno mae mo ngirinnik de ano mae mo syala bahem eititi gwibin. Ahakore zini men zen namjanbiridanda gwenan, zen zenaka dikim anakan tame tabin hip de suratsa noltrei gwizimnin, “Zini an mo tawa tabinni dawemna. Sap esa asalblal.” Hen ahakon emsa kirekam de surat hap abe da gwibirin– aha enak de hwena desa goltrei gwizimdin hip. Hwena ee home kirekam de suratsa de goltreizimdin hip edwam gwe-gwenan.
² Sap em in zene enwe-mase gwe-gweꞌan– ano mae mo surat makanye. Sap eno mae mo lowe hensa de kara gul gwizimdinkim, dekon zep tingare zini asa hen tame da gwibirin, “Zeno mae mo Alap hap de syala zen dawemna.” Zep eno mae mo lowe henna angkam, san de Kristus onakore suratna kiye– tingare zi de ze karatda gul gwen hap. Zen tintakam de ale gunsu hom, hen kasonak de ale gunsu hom. Zen hwena Ngaya Zini Alap Zen zere mo Enhokam suratna insa ale gul gwenda– eno mae mo enhonakye. Hwena Zen dekam zep hen ano mae mo enhonak ebe mae hap de kwasangna dawemkam ale gulku.
³ (3:2)
⁴ Ëe Alap mo nwe kara gwennake kirekam ep ale gulzim, sap ee ere mae mo syal hap dena kitak mese Kristus onak blol eibik.
⁵ Ëe a en bejene anakan egun, “Ëe asa ang hap de syala ansa ol gwer.” Hwena ano mae mo sosonna, ba maesa dikim syal gwibin hip dena, zen kitak Alap onakon hata gwenan.
⁶ Zen Zen abe mae hap sosonna gol gwizimnira– dekam de zere mo zi niban de ol ziaha-en gun esena insa golluwe gwen hap denaye. Ol ziaha-en gun esena in, zen epba titi tabin ol ale gunsu dikim syal gwibin hip denaka hom. Zen hwena Alap mo Enho dikim ing gwe hebiridan hap dena. Sap zini men zen epba titi tabin ol san anakare enlala naban ang ta gwenan, “Tahakam de syala ansa de syal gwe-gwibinkim, ee dekam asa Alap mo nwenak dakastil,” zen hwena dekam nama juwen ora san ang ta gweꞌan. Zen diki Alap mo Enho naban de zergwenkam esa engaya gwer.
⁷ Zep epba titi tabin ola in, zen san de juwen orana kiye. Sap desan de ang tankam dekam hom Alap mo Enho nakore ngatanna nulin gwek. Hwena sap kirekam, zen sap hen nonol lone sennak Alap mo ngatan naban hatak– orep kim Alap Musa Bak hap kaso dak-daknak ale gulblukaye. Musa dekam holokam Alap han e gweka. Zep Alap onakore ngatanna zebon onak makan gweblak, hendep nwe-masena zep lilingtilblika. Dekam Israel Bak mo ausu nakore zini nwe-masenak bejen hla tan, sap man tangan yakla nwe mo kim ngatan gweblaka. Hwena Musa mo nwe-masenak de ngatanna in man sangankam tap gwebla song gwek.
⁸ Hwena Alap insa etan ner hom ol ziaha-en gun esena nebe mae hap golzimki, zen hwena zere mo Enho de ing gwe hebiridankam de eliwehe gwen hap dena. Zep zen diki zen– nebe mae hap de ngatanna mam tangan wenyaye, san de ngatan zi mo lang nakore ngatanna kiye.
⁹ Ëpba titi tabin ola in sap airis, hen zen sap ngatan zi mo lang nakore ngatan naban hatak. Hwena anakare enlala naban de desan ang ta gwenkam, “Ëe dekam en asa Alap mo nwenak edakastil,” dekam hwena man nwe-mase gwe-gwenan– san de juwen ora san de nama ang tanna kiye. Sap desan en de ang tan hap kim ealp gwe-gwek, zen hwena dekam hom mae enho nakon eliwehe gwek. Hwena angkam Alap mo ol ziaha-en gun esena an, zen zen tangan ngatan makan nebe mae hap lwazimꞌin. Sap nen desan de ang tankame Alap mo nwenak edakastiꞌin.
¹⁰ Zep neno mae mo nwenak, nonol ngatanna in mo sosonna mes tangan tap gwek. Hwena angkam de ngatanna an serkam tangan nesa zilbir ane gweꞌan.
¹¹ Sap nonol ngatanna in zen Musa Bak ensa zilbli ine gwek, ki zep hendep tap gwebla song gwek. Zep hen kirekam– epba titi tabin ola inye. Zeno sosonna angkam mes tap gwer. Hwena Alap mo ol ziaha-en gun esena an, zeno ngatanna hendep denaban sa nesa zilbir ane gwer.
¹² Ëe kirekame Alap onakore ol esena insa laiblibik, ee zebe udobe naban tingare zini Kristus hup dena kim damnak lonbirida gwenan.
¹³ Ëe Musa mo kim home udobe sremkam egwe gwenan. Zen man kaen hakkam zere mo nwe-masena tahale gweka– dekam de Israel Bak mo ausu nakore zini in zeno nwe-masenak de ngatanna insa anakan hlaul gweblan srem hap, “Angkam man tap gwebla song gweꞌan.”
¹⁴ Hwena zen in zep Israel mo zi ausuna enol drak-drak gwek, hendep angkam nama. Zen kim Musa mo epba ola insa baca nul gwenan, dekam hwena man nwe-mase gwe-gwenan– san de Musa mo kaen hakna inkam de zere mae mo nwesa tatak sonna kiye. Zen in zep hendep angkam enlala nakon ekawesik. Hwena Kristussu de taibliblankam, zen dekame enlala nakon engatan gwe-gwenan– san de kaen hakna insa de nwe nakon hil gilsinni kiye.
¹⁵ Israel mo ausu nakore zini zep hendep nama kirekam lowehe gweꞌan– san de nwe diminni kiye. Musa mo alena insa sap karatda nul gwenan, hwena zeno eini hom dam nulsuk gwenan.
¹⁶ Hwena Musa Bak kim olsa de gu soneblan hap Biansa golek de ta gweka, zen dekam man kaen hakna insa nwe-mase nakon hil gilsik gweka. Zep hen kirekam nebe mae hap angkam lwa gwizimꞌin: Men zen Bian Yesussu neirin gwenan, zen dekam zep zeno mae mo nwenak de kaen hakna ehil gwe hana gwenan. Enho nakon hen dekam zep engatan gwe-gwenan.
¹⁷ Ngatanna in zen Bian Yesus onakon zil ine gweꞌan, zen apdenak zere mo Enho naban. Men zebon Bian Yesus mo Enhona in ing gwe henna, zen dekam zep Musa mo epba titi tabin ola kon ehil gwe hana gwenan. Sap zen zen zini nesa hulen makan gweibirida gwenan.
¹⁸ Zep nen an angkam nwenak de kaen hak srem nike lowehe gweꞌan. Nen in zebe enho nakon Biansa dam-dam enkam kara la gwenan. Zep neno mae mo enhonak san de Yesus zere mo ngatan dekon litil ine gwenna kiye. Zep neno mae mo enhona man Yesus, zere mo Enho naban de apde nen hap wet gwesik zahe gwenda. An kitak Bian Yesus zere mo Enho nakon ki kirekam nebe mae hap jowe gwizimnin.