Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali kamonsonya tare batuanginya aku tabaro, pei aku taa maya taa manganto’oka komi mangkonong anu to napapokitaka pasi to napaponsanika i mPue aku.
2 Wali ewa si’i. Re’e samba’a tau to aku mangansani, ia samba’a seja pei i Kerisitu. Wali sampuyu pei opo nto’u to liu, tau etu naokotaka i mPue Allah nto’u tampa to bae kojo kayawanya to malangan kojo ndate yangi. Tampa etu rato’oka yangi to katogo ntampenya. Wali tempo ia raokotaka etu aku taa kunsani bara koronya bara ojo toniinya to raokotaka etu. Ojo i Pue Allah semo to mangansani.
3 To aku mangansani, tau etu raokotaka nto’u tampa to bae kojo kayawanya etu, panewa ndate ria ia mangandonge anu to taa mawali nto lino manganto’o, pasi to taa rawaika resi to lino mangansarita. Pei aku taa kunsani bara koro ntau etu bara ojo toniinya to raokotaka etu.
4 (12:3)
5 Wali masipato ane rapanya aku tabaro mangkonong pangkita to magaya to napapokitaka i mPue aku etu. Pei ane mangkonong korongku aku taa databaro kasimbalinya yako mangkonong palaong to mampakanasa kayu’u ndayangku.
6 Pei ane rapanya aku rani tabaro, ane ewa see, gombo to to’ongku mangabarong korongku etu si’a ewa gombo ntau to bea to mampoanika palaongingku, apa gombo nsira taa monso pei gombo to si aku monso pu’u. Pei aku taa damangabarong korongku naka ne’e tau mayabimo panga’angga nsira aku. Wali ane ewa see sira ojo manga’angga aku singkonong pei palaongingku to nakita nsira pasi gombongku to nadonge nsira.
7 Wali apa saba boros kojo anu to magaya to napaponsanika i mPue Allah aku etu, see naka i Pue Allah mangajagai naka ne’e aku damawali mangei. Wali see naka aku rawaika panyaki to raporapaka ewa rui to nja’u raya nu wombongku to taa maya rayali yau. Pasi panyaki to etu napake i ngKepala nto pantipu mangansesai aku. Wali ewa wetu naika i mPue Allah mangajagai naka ne’e aku damawali mangei.
8 Wali aku togo ngkani mamporapika resi i Pue see Ia damampakaroo muni panyaki to etu.
9 Pei Ia manganto’oka aku, to’oNya, “Aku taa damampakaroo muni panyaki etu, pei Aku manoto kojo resi korom, wali kanotongKu etu gana kojo damangansawang korom ri raya ngkasesa. Apa tempo koromu mayu’u, tempo etu semo damiyala kojo karosongKu.” Ewa wetu nato’o i mPue Allah. Wali see naka aku mangepe masanang kojo apa saba kayu’u ngkorongku, apa kayu’u ngkorongku etu, etu semo sabanya naka pei kuasa i ngKerisitu mangararamaka aku.
10 Wali see naka aku masanang rayangku mangarata kasesa apa saba mangika palaong i ngKerisitu. Aku masanang mangarata kayu’u pasi kasiasi, pasi kasusa. Pasi aku masanang ane narunes ntau pasi ane nasesai ntau. Apa tempo korongku mayu’u, tempo etu semo aku napakaroso i ngKerisitu.
11 Wali gete, monso pu’u aku ewa tau bea apa saba gombongku to tabaro etu. Pei saba komi semo naka pei aku magombo ewa wetu, apa komi taa mampasimbalika aku tempo tau manto’o maja’a aku. Apa to taotao komi semo to mampakanasaka sira monso pu’u aku tare anggangku ri pangkita nto lino, pei nempo ewa see tiroowa aku to bae-bae anggangku pei sira to mampoanika pomakau to bae angganya etu.
12 Wali tempo aku re’e ri oyo ngkomi seore, tempo etu aku mangepe taa mosa mangika palaong to taa rapobiasa pasi to mampakaipu raya ngkomi pasi to mawali tondong resi komi. Wali palaong to inikangku etu, etu semo tondong to mampakanasaka komi aku monso pu’u pomakau i ngKerisitu.
13 Wali palaong to inikangku ri oyo ngkomi sewaju ewa palaong to inikangku ri oyo ntau i mPue to siromu nja’u lipulipu to yusa. Ojo sangaya palaongingku to yusa, etu semo aku taa mampakasusa komi apa aku tare mamporapi yako resi komi anu to dakupake. Wali wimba, bara madosa aku mangika ewa wetu? Ane komi mangepe aku madosa, gete, jamo komija!
14 Wali tempo si’i aku mampakaroso dayau mayunu resi komi katogo ngkaninya. Pasi tempo aku re’e resi komi aku taa damampakasusa komi apa taa damarapi bara kesaa resi komi. Apa si’a ngaya-ngaya ngkomi to kuporani, komi semo. Aku mangepe komi ewa ngana ngkorongku. Pasi kita tansani si’a ngana mayunu to mamporomung anu to danapake mampiara to tu’anginya. To tu’anginya semo to mamporomung anu to danapake mampiara ananya.
15 Wali apa saba aku mangepe komi ewa ngana ngkorongku, see naka nempo komi kanjo’u-njo’u kakodi-kodi pamporayangimo resi aku, pei aku kanjo’u-njo’u kabae-bae pamporayangingku resi komi. See naka aku masanang kojo mangawaika samparia to re’e resi aku pasi mangampake yau samparia karoso ngkorongku damangansawang komi.Wali ane ewa see, maka pei bata-bata raya ntau mampobuuka aku bara si’a kamonsonya pomakau i ngKerisitu?
16 Wali manasa resi komi aku taa mampakasusa komi. Pei bara re’e komi to manganto’o, “Monso pu’u i Paulus taa mampakasusa kita, pei ia tau to pande mangakal sa’e, wali ia mangantipu kita see naka kita seja ra’akal.” Bara ewa see panto’o ntau.
17 Wali gete, maka pei tau manganto’o ewa wetu? Wimba, bara re’e tau to ipokaungku yau resi komi to mangantipu komi see ia damangarata kasugi?
18 Pasi wimba seore tempo aku nampokau i Titus yau resi komi sindara-ndara pei samba’a a’i ngkita. Wimba, i Titus etu bara re’e mangantipu komi see ia damangarata kasugi? Ia taa kojo mangika ewa wetu. Apa kami dua sewaju songka mami pasi sewaju seja lengko ngkatuwu mami. Wali kami dua taa kojo rani mangantipu komi.
19 Wali ri rayanya komi mangabasa samparia gombongku si’i bara re’e komi to mampobuuka, “I Paulus pasi yununya taa rani mea see naka sira manganto’o noto nsira ri tango ngkita.” Ewa wetu pampobuuka ngkomi. Pei kamonsonya si’a ewa see. Apa si’a komi to mawali to pobotus mami. Kami samba’a seja pei i Kerisitu, wali i Pue Allah semo to mangangkita pasi mangandonge kami. Pasi a’i-a’i to kuporayang, samparia to kami mangika pasi to kami manganto’o, naka pei kami mangika pei manganto’o see damampakaroso pangaya ngkomi.
20 Apa aku moru rayangku mampobuuka temponya aku darata wo’u resi komi. Apa tempo etu bara re’e lengko ngkomi to taa singkonong pei pamporaningku resi komi. Pasi ane ewa see, lengko to si aku taa dasingkonong pei pamporani ngkomi apa aku ojo damanganseko komi. Wali moru rayangku apa aku taa rani mangarata komi masibanta, timopo pei kaloo, pasi maja’a raya ngkomi samba’a pei samba’a. Pasi aku taa rani mangarata komi matingka, manto’o maja’a sa’e, bawiwi, mangei pasi marotai.
21 Wali aku moru rayangku mampobuuka temponya aku darata wo’u resi komi. Apa aku mampobuuka tempo aku darata ri oyo ngkomi i Pue Allah ngkita bara damanganto’oka aku tamo masipato aku mangepe masanang mangkonong komi apa lengko ngkomi tamo singkonong pei Ia. Wali ane ewa see aku damawali mea. Pasi aku bara damawo kojo rayangku mangkita boros komi to roomo mangika dosa pei tawa mangandolika muni tango ngkomi yako ri palaong to maja’a to nuika ngkomi etu. Etu semo palaong to mampakarikasika raya komi, magoyal pasi masala, pasi palaong to masipato rapokea. Wali tuwu-tuwuja si’a ewa wetu lengko ngkomi tempo aku rata resi komi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA