Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri taung makasampulo anrua ammarentana Karaeng Ahas ri Yehuda, anjo wattua Hosea ana’na Ela a’jari karaeng Israel, siagang ammarentai ri Samaria salapang taung sallona.
2 Dorakai mae ri Batara, mingka tena nasangkamma jaina dosana siagang dosa-dosana sikamma karaeng Israel ammarentaya rioloanganna.
3 Nibunduki siagang nibetai ri Salmaneser karaeng Asyur, sa’genna tunggala’ taungi musti a’bayara’ passare mae ri ia.
4 Mingka ri se’reang wattu, akkiringi Hosea tunisuro mange ri So karaeng Mesir untu’ appala’ bantuang. Nampa ammarimi Hosea a’bayara’ passare taung-taung mae ri Asyur. Ri wattunna naasseng Salmaneser anjo panggaukanna Hosea, najakkala’mi Hosea nampa napantama’ ri tarungkua.
5 Nampa battumo Salmaneser karaeng Asyur ambunduki Israel siagang angkurungi Samaria. Ri taung makatallunamo nikurung anjo Samaria,
6 iamintu ri makasalapannamo taung ammarenta Hosea, naempoimi Salmaneser Samaria. Nampa naengka’ tu Israel salaku tunitahang mange ri Asyur. Sipa’gang battu ri ke’nanga nitampakkangi ri kota Halah, sipa’gang maraengannaya ri ampi’na Binanga Habor ri daera Gozan, nampa sipa’gang pole ri kota-kota niaka ri pa’rasangang Madai.
7 Tu’guruki Samaria lanri dorakai tu Israel mae ri Batara, Allata’alana ke’nanga, ia le’baka ampasalamaki ke’nanga battu ri kakoasanna karaeng Mesir, siagang angngerangai ke’nanga assulu’ battu ri anjo pa’rasanganga. Anynyombai ke’nanga ri rewata-rewata maraengannaya,
8 siagang naturuki kabiasanna bansa-bansa le’baka Nabongka Batara ri wattunna maju bansa Israel ambunduki anjo bansa-bansaya. Naturuki bansa Israel kabiasang le’baka napattantu karaeng-karaeng Israel,
9 siagang nagaukangi apa-apa tenaya Napa’biangi Batara, Allata’alana ke’nanga. Ambangungi ke’nanga tampa’-tampa’ panynyombang rewata ri sikontu kotana ke’nanga, baji’ ri kota ca’dia kammayatompa ri kota lompoa.
10 Irate ri sikamma bontoa, siagang irawanganna sikamma poko’ kayu lompoa, ambangungi ke’nanga tembo’-tembo’ batu siagang patung-patung Dewi Asyera.
11 Attunu tongi ke’nanga dupa ri sikontu tampa’ pakkoro’bangnganga untu’ rewataya, sangkamma kabiasanna bansa-bansa le’baka Nabongka Batara battu ri butta Kanaan. Anynyombai ke’nanga barhala, manna pole nipisangkai ri Batara. Sikontu anjo panggaukang ja’dala’na ke’nanga ampanaiki larroNa Batara.
12 (17:11)
13 Akkiringi Batara siapa are tunisuro siagang na’bi-na’biNa mae ri umma’ Israel siagang Yehuda untu’ ampabattui anne pappakainga’ kammaya: "Ammarimako a’gau’ ja’dala’ siagang turukimi parenta siagang hukkung le’baka Kupassareang mae ri boe-boenu siagang mae ri kau tete ri sikamma anjo atangKu, na’bi-na’bia."
14 Mingka taerokai tu Israel siagang tu Yehuda mappilangngeri. Kapala batui ke’nanga sangkamma boe-boena ke’nanga tenaya natappa’ mae ri Batara, Allata’alana ke’nanga.
15 Taerokai tu Israel siagang tu Yehuda anturuki parenta-parentaNa Batara siagang tena namajarre’ ri parjanjiang le’baka napare’ siagang boe-boena ke’nanga. Tena najampangi sikamma pappakainga’Na, passangalinna anynyombai ke’nanga mae ri barhala-barhala tenaya matu-matunna, sa’genna manna kalenna ke’nanga tena tommo matu-matunna. Naturuki ke’nanga panggaukanna bansa-bansa niaka ri ampi’na ke’nanga, manna pole nale’ba’mo nipisangkai ke’nanga ri Batara.
16 Nadakkai kabusuki sikamma hukkunNa Batara, Allata’alana ke’nanga siagang appareki ke’nanga ruang kayu sapi tambaga untu’ nasomba. Appareki ke’nanga patung Dewi Asyera, anynyombai bintoeng siagang mae ri Rewata Baal.
17 Napassareangi ana’na ke’nanga a’jari koro’bang nitunu mae ri rewataya. Ammakei ke’nanga pangngissengang siagang appalaki pangngunju’ battu ri sanro-sanroa ia akkullea sipa’bicara siagang roh-roh tenaya naniciniki. Teai sipato’ batena anggaukang ngasengi anjo apa-apa tenaya Nangai Batara,
18 sa’genna larro sikalimo mae ri ke’nanga siagang tenamo Naparhatikangi ke’nanga. Napelaki ke’nanga battu ri butta le’baka Napassareang mae ri ke’nanga. Ia ammantanga tassesa iamintu kakaraengang Yehuda mami.
19 Manna tu Yehuda tena todong namannuruki ri hukkung-hukkunNa Batara, Allata’alana ke’nanga. Naturuki ke’nanga kabiasanna tu Israel,
20 jari tenamo Naani Batara sikontu umma’ Israel. Nahukkungi siagang Napassareangi ke’nanga mae ri musu-musunna ke’nanga sannaka palla’na. Tenamo naNaparhatikangi ke’nanga, passangalinna Napelaki ke’nanga battu ri butta Napassareanga mae ri ke’nanga.
21 Le’ba’na Nasa’la’ Batara tu Israel battu ri tu Yehuda, naangka’mi tu Israel Yerobeam ana’na Nebat a’jari karaenna ke’nanga. Nampa naerammo Yerobeam anjo bansaya ambokoi Batara siagang anggaukangi dosa-dosa lompoa.
22 Naturuki ke’nanga panggaukanna Yerobeam siagang tuli nagaukangi sikontu dosa nagaukanga Yerobeam,
23 sa’genna kale’bakkanna tenamo naniparhatikang ke’nanga ri Batara, passangalinna nipela’mi ke’nanga battu ri butta nipassareanga mae ri ke’nanga. A’rupami anjo kajariang kammaya situru’ pappakainga’ le’baka Napassareang Batara mae ri ke’nanga tete ri ata-atanNa iamintu na’bi-na’bia. Kammami anjo nanierammo tu Israel mange ri butta pammelakkanga ri Asyur, siagang anjoremmi ammantang ke’nanga sa’genna anne alloa.
24 Salaku sambenna tu Israel le’bakamo niengka’ mange ri anjo butta pammelakkanga, natampakkangi karaeng Asyur tau battua ri Babel, Kuta, Awa, Hamat, siagang Sefarwaim, anjoreng ri kota-kotana Samaria. Ammantang kabusu’mi anjo taua ri anjo kota-kotaya.
25 Ri wattu pakaramula ammantanna ke’nanga anjoreng, tena napakalompoi Batara; lanri kammanami anjo naNapabattumo Batara siapa are jaina singa untu’ angkanrei sipa’gang battu ri ke’nanga.
26 Nampa napaumi taua mae ri karaeng Asyur angkanaya anjo tau nibolika ammantang ri kota-kotana Samaria tena najampangi rewatana anjo pa’rasanganga. Lanri kammanami anjo nappabattumo rewataya anjoreng singa untu’ angkanrei ke’nanga.
27 Lanri kammana anjo naparentakammi karaeng Asyur sollanna nikiring ammotere’ mange ri Samaria sitau imang battu ri kalase’renna anjo tau le’baka nitahang siagang nipela’ mange ri Asyur. Nakana karaenga, "Suroi ammotere’ siagang ammantang anjoreng sollanna akkulle naajara’ taua anjoreng ri passala’na hukkung-hukkunna rewatana anjo pa’rasanganga."
28 Jari nia’mo sitau Imang Israel, ia le’baka niengka’ battu ri Samaria mange ri Asyur, ammotere’ siagang ammantang ri Betel. Anjoreng naajaraki ra’yaka angkana antekamma musti batena taua anynyomba ri Batara.
29 Mingka anjo tau ammantanga ri Samaria tuli napare’na barhala-barhala kalenna ke’nanga siagang naboliki lalang ri balla’-balla’ nabangunga tu Israel le’baka ammantang anjoreng riolo. Tunggala’ golongang massing napapparekangi kalenna barhala ri kota massing napammantangia ke’nanga:
30 Tu Babel appareki patung Rewata Sukot-Benot, tu Kuta appareki patung Nergal, tu Hamat appareki patung Asima,
31 tu Awa appareki patung Nibhas siagang Tartak, siagang tu Sefarwaim napassareangi ana’ kalenna ke’nanga a’jari koro’bang nitunu mae ri Rewata Adramelekh siagang Anamelekh.
32 Pantaranganna anjo rewata-rewataya nasomba, nasomba tongi ke’nanga Batara. Napilei battu ri alla’na ke’nanga a’rupa-rupa tau untu’ anggaukangi tugasa’ imanga siagang untu’ ampassareangi koro’banga ri balla’-balla’ barhalaya.
33 Jari, anynyombai ke’nanga ri Batara, mingka anynyomba tongi ri rewata-rewata kalenna ke’nanga, situru’ ada’ kabiasanna pa’rasangang kabattuanna ke’nanga.
34 Sa’genna anne alloa tuli nagaukanna ke’nanga ada’ kabiasanna ke’nanga. Tena nanynyomba ke’nanga ri Batara siagang tena todong naturuki hukkung-hukkunNa siagang parenta-parentaNa Napassareanga mae ri jari-jarina Yakub, Naarenga todong Israel.
35 Le’ba’mi appare’ parjanjiang Batara siagang umma’ Israel kamma anne: "Teako anynyombai mae ri rewata-rewata maraenga; teako su’juki anynyomba ri ke’nanga yareka nulayani ke’nanga, yareka assare koro’bang mae ri ke’nanga.
36 Pakala’birikKa’, iNakke Batara, le’baka angngerangko assulu’ battu ri Mesir lalang koasa malompoKu; anynyombako ri Nakke siagang angngerangko passare mae ri Nakke.
37 Tuli mannurukiko ri hukkung-hukkungKu siagang parenta-parenta le’baka Kutulisi’ untu’ ikau. Teako anynyombai mae ri rewata-rewata maraenga,
38 siagang teako kaluppai parjanjiangKu siagang ikau ngaseng.
39 Mannurukiko ri Nakke, Karaeng Allata’alanu, nampa laKulappassangko battu ri musu-musunnu."
40 Mingka tena namappilangngeri anjo pandudu’na Samaria; tuli manna’gala’na ke’nanga ri ada’ kabiasanna ke’nanga.
41 Jari anynyombai ke’nanga ri Batara, mingka anynyomba tongi mae ri barhala-barhalana ke’nanga. Manna sa’genna anne alloa tuli nagaukanna jari-jarina ke’nanga anjo gau’ kammaya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA