Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto ka 'o ngo-ngaku moi, ngomi miomau ngini nianako mita ma ngale kokia ma Jo'oungu ma Dutu wokulakau 'o co-catu 'o jamati 'isinoimika 'o Makedoniaka.

² Ngaro 'ona posironga yosangisaraka gee yakitaili 'o sagala sangisara 'itu-tubuso ma sigoronaka, ma 'ona kayomore-morene de yoduaka yakiriwo 'o jamati 'iregu, ngaro 'ona yosaigalere ma sala.

³ Ngoi 'idadi tosiwaiti 'ato 'ona yokula moteke to 'ona manga guata, bolo 'ifoloide. Ka de to 'ona ma sirete manga mau,

⁴ 'ona yoga'asoko yosigou-goungku nako yaowa de 'ona mita yamake 'o co-catu ma ngale yakisidabi yokula 'o ro-riwo ma Jo'oungu ma Dutu 'awi 'umatika 'o Yerusalemuoka 'o Yudea ma daeraaka.

⁵ 'Ona yokula 'ifoloiosi 'iamoko de gee ngomi miongano-nganono. 'Ona 'isira manga 'ahu yokula ma Jouka ma ngale yo'ahu moteke ma Jo'oungu ma Dutu 'awi mau, ge'enau so 'ona yosigisene mita ngomino.

⁶ Ge'enau so ngomi mioga'asoko miosigou-gounguku 'o Titusika gee woku-kurue wosi'aturu 'o ro-riwo yolomu la 'una wosigila 'o manarama ge'ena naga nginioka mita.

⁷ Ngini niodaduie 'o sagala moi-moioka: 'Ania ngo-ngaku 'ikua-kuata, niocawaro niobicara, niobarija niodotoko ma ngale ma Jou, de nioduaka nioriwo, de posironga de nia doraka. Ge'enau so tanu ngini 'ifoloiosi niosidemogaroku niadiai 'o manarama yaowa-owa ne'ena ma ngale nioduaka niakula 'o ro-riwo de 'ania singina 'isa-sanangi.

⁸ Ngoi tosidemo ne'ena ge'ena 'iso ko 'o paretawa moi. Ma 'ena ma ngale tosidumutu 'ato 'o Makedonia ma nyawa yoduaka ma sala yakiriwo 'o nyawa 'iregu. De ge'enau tinisidemo, ngoi mita tomau tanako sigado kokia yaika to ngini nia dora.

⁹ Sababu ngini nianakokau ma Yesus Kristus to ngone nanga Jou 'awi singina ma sure ngoneno. Ngaro 'una wokorago ma Jo'oungu ma Dutu wi bionoka, ma 'una wamada 'awi korago ge'ena de womadiai wosaigalere ma ngale ngini, la de 'awi saigalere ge'ena, ngini niodadi korago 'ania ngo-ngakuoka sababu niomarimoi de ma Kristus.

¹⁰ Moteke to ngoi 'ai di-dibangi, 'isure nako ngini niosiduanga 'o pipi niolomu ma ngale 'o ro-riwo gee niokuruekau 'o taunu 'ipasa-pasa. Sababu nginiou ma di-disiraka niatiba-tibangi de niosikurue 'o manarama ne'ena.

¹¹ Ne'ena ngini salingou niosigila moteke 'ania guata. Salingou niomagae ma ngale niosiduanga 'o manarama ge'ena 'isoka gee ma sira to ngini nia magae niosikadibangi.

¹² Sababu nako ngini niomau niokula, ge'ena ma Jo'oungu ma Dutu 'asa wadawongo 'ania ro-riwo ge'ena moteke 'okia naga gee naga nginioka. So ko ma ngalewa 'ato 'okia naga gee koi'iwa nginioka.

¹³ Ngoi ka ma eta ma kotomauwa 'ato 'o nyawa 'iregu 'uwau yamoku to 'ona manga gina de tinisitubuso ngini, duga sababu ma 'orasi ne'ena to ngini 'akunu, so yadaene ngini niakiriwo to 'ona manga kurangi. Dua nako ngini nisidukuranguku de 'ona 'akunu, ge'ena 'ona 'asa niriwo nginika. Koge'ena ma ngekomo, ngini 'asa kaniomatero.

¹⁴ (8:13)

¹⁵ 'O Buku 'Itebi-tebinoka 'isilefoku, "'O nyawa gee yomadamake 'iamoko, koyofoloidewa, de 'o nyawa gee yomadamake ka ma eta, koyakisidukuranguwa."

¹⁶ Ngomi mio'amalaha ma Jo'oungu ma Dutuka, sababu 'unau so 'o Titus womagae winilelani nginika 'isoka ngomioli!

¹⁷ Sababu 'o Titus wamoteke to ngomi 'amia ga-ga'asoko ma ngale winileleani ngini, ma 'una mita 'ifoloi womagae winileleani, sigado 'unau ma sirete waputusokau wotagi nginika.

¹⁸ Ngomi miakisuloko 'una de nanga 'esa moi wimoiosi gee wi'ise-'isene 'o jamati 'isinoimika sababu 'awi manarama ma ngale wositotara 'o Habari ma Owa ma Jo'oungu ma Dutuno.

¹⁹ De mita, 'o nyawa gu'una 'o jamati wiirikokau, ma ngale mimaka'asa 'amia do-dagi ma sigoronaka. Sababu ngomi 'asa miotagi ma ngale 'o pipi 'ilomu-lomuno ge'ena mio'otaka, la de ge'ena ma Jo'oungu ma Dutu wisiarene, de mita ngini niamake 'ato ngomi miomodeke mioriwo.

²⁰ Ngomi miomasitiari ma sala, la 'uwa sigado 'o nyawa misisala gee mio'otaka 'o ro-riwo ma amokoka ne'ena.

²¹ Ngomi miomau mia manarama 'iloa ma Jou wi bionoka de mita 'o nyawa manga bionoka.

²² Yomatuono de 'o Titus de nanga 'esa moi gu'una, misidingoto mita nanga 'esa moi wimoioli. Ngomi mitaili 'igi-giliou 'unaka, duga 'iwaitokau 'una woduaka woriwo. De ne'ena 'una woduaka ma sala winiriwo ngini sababu 'una wininganonokau 'ato ngini mita dua niakiriwo 'o nyawa yosusa-susaku.

²³ 'O Titus ge'ena to ngoi 'ai manai, gee miomasidamanarama de de ngoi ma ngale miniriwo ngini. De nanga 'esa moi yamididi gee yomote-moteke de 'o Titus, 'ona ge'ena 'o jamati yakisulo-suloko. Ma ngale to 'ona manga di-diai so ma Kristus wisiarene.

²⁴ Ngomi mioga'asoko ngini niosidumutu nia dora 'onaka, la 'o jamati 'iregu-regu 'iodumu yanako 'ato ngini de nia dora de 'okia naga niadi-diai gee miosiie-ie 'o jamatioka ge'ena ma goungu.

2 Korintus

Video 2 Korintus 8

Ikuti Kami:

KONTAK | PARTISIPASI | DONASI