Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton senamian, tiang pade mẽlẽ side pade nenaoq ẽndah mengenai rahmat Allah tipaq jemaah-jemaah lẽq Makedonia.

² Ie pade sampun teuji siq kesulitan-kesulitan saq berat. Laguq lẽq tengaq-tengaq kesulitan-kesulitan nike, ie pade gembire dait murah atẽ dalem hal ngebẽng sumbangan jari nulung dengan lain, timaq ie pade miskin gati.

³ Tiang bau mastiang bahwe ie pade ngebẽng semampu ie pade, malahan lebih. Timaq ndẽq araq saq suruq,

⁴ sanget siq ie pade tunas lẽq tiang pade lamun bau ie pade teijinang milu ngebẽng sumbangan tipaq dengan-dengan saq tehususang bagi Allah lẽq Yudea.

⁵ Ie pade ngebẽng jaoq luwẽqan lẽman saq tiang pade harepang. Penembẽq ie pade nyerahang diriq tipaq Tuhan, beterus tipaq tiang pade ẽndah, pade maraq pekayunan Allah.

⁶ Keranaq nike tiang pade sanget nganjurang Titus -- saq baruq mulaiang usahe nike, adẽqne ngelanjutang usahe saq solah niki lẽq antare side pade ẽndah.

⁷ Side pade mule lebihan dalem selapuq-lapuqne: Side pade lebihan dalem hal percaye, dalem hal nyatayang pendapet, dalem hal penenaoq, dalem segale macem usahe, dait dalem hal kasihde tipaq tiang pade. Keranaq nike, side pade ẽndah lebihan lẽq dalem usahe saq solah niki.

⁸ Tiang ndẽq nganjurang nike jari sopoq prẽntah. Laguq siq nyatayang berembẽ semangetne dengan lain nulung sepade manusie, tiang ẽndah melẽt nenaoq seberembẽ kasihde.

⁹ Sẽngaq side pade sampun nenaoq rahmat Junjungante Saq Mulie Deside Isa Almasih. Ie sugih, laguq Ie piaq diriq-Ne miskin jari kepentingande, adẽq siq kemiskinan-Ne nike, side pade jari sugih.

¹⁰ Menurut pendapet tiang, sepatutne side pade nutuqang napi saq sampun side pade piaq taun saq juluan. Sẽngaq side pade saq penembẽq gati mikirang dait mulaiang usahe niki.

¹¹ Jari, mangkin side pade harus ngelanjutang menurut kemampuande. Side pade harus besemanget jari nutuqang usahe nike, maraq semangetde laẽq miaq rencane nike.

¹² Lamun side pade ihlas ngebẽng, make Allah gen nerimaq sumbangande nike siq dasar napi saq araq lẽq side, ndẽqne siq dasar lẽq napi saq ndẽq araq lẽq side.

¹³ Tiang tetu-tetu ndẽq bemaksut jari bẽbasang dengan lain lẽman tanggung jawab, dait miaq side pade sayan berat. Laguq, lantaran mangkin side pade dalem keadaan cukup, make sampun sepatutne side pade nulung ie pade. Laun lamun side pade kekurangan, dait ie pade dalem keadaan cukup, make ie pade gen nulung side pade. Siq care nike deduaqne pade-pade tetulung.

¹⁴ (8:13)

¹⁵ Lẽq dalem Kitab Suci tetulis, "Dengan saq ngumpulang luwẽq, ndẽqne belebihan, dait dengan saq ngumpulang sekediq, ndẽqne kekurangan."

¹⁶ Tiang pade tetu-tetu besyukur lẽq Allah sẽngaq Ie sampun ngicanin rahmat tipaq Titus adẽqne besemanget maraq tiang pade jari nulung side pade!

¹⁷ Sẽngaq Titus ndẽqne cume rẽde lẽq napi saq tiang pade tunas, laguq ie ẽndah semanget gati mẽlẽ nulung side pade jangke siq kemẽlẽqne mẽsaq ie mutusang lumbar ojok side.

¹⁸ Bareng kance ie, tiang pade ngirim ẽndah sopoq semeton saq tehormatin gati lẽq selapuq jemaah sẽngaq pegawẽanne nyampẽang Kabar Solah lẽman Allah.

¹⁹ Selain nike, dengan nike sampun tepilẽq ẽndah dait tetentuang siq jemaah-jemaah jari bareng kance tiang pade lẽq dalem kelampan tiang pade. Sẽngaq tiang pade gen lampaq jari nyampẽang sumbangan nike, adẽq Tuhan temulieang, dait adẽq side pade serioq bahwe tiang pade rẽde nulung.

²⁰ Tiang pade onyaq-onyaq gati adẽqne ndaq araq dengan saq nyalahang tiang pade dalem hal nyampẽang sumbangan saq belẽq niki.

²¹ Tiang pade mẽlẽ jujur ndẽqne cume lẽq arepan Tuhan, laguq lẽq julu manusie ẽndah.

²² Bareng-bareng kance Titus dait semeton nike, tiang pade ngirim ẽndah sopoq semeton saq lain. Sampun pire kali tiang pade nguji ie, ternyate ie tetep seneng nulung. Dait mangkin, ie tetu-tetu mẽlẽ nulung side pade sẽngaq ie percaye gati lẽq side.

²³ Mengenai Titus, ie batur tiang, saq begawẽan kance tiang jari nulung side pade. Dait mengenai kedue semeton nike, saq lumbar bareng kance ie, ie pade dengan-dengan saq teutus siq jemaah-jemaah dait jari kebanggean umaq Almasih.

²⁴ Tiang pade harep side pade nyatayang kasihde lẽq ie pade, adẽq selapuq jemaah nenaoq bahwe side pade ngasihin ie pade dait napi saq tiang pade banggeang mengenai side pade mule tetu.

2 Korintus

Video 2 Korintus 8

Ikuti Kami:

KONTAK | PARTISIPASI | DONASI