Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ya'ami ira talifusõ, omasi ndra'aga na ma'ila gõi hewisa wa'ebua dõdõ Lowalangi ba mbanua Niha Keriso ba Makedonia.
2 No oya wanandraigõ sagafõkhõ si gõna ya'ira! Ba gotalua wa'afõkhõ andrõ, la'omusoi'õ dõdõra ba labe'e game'ela, ebua ma'ifu, ba wanolo niha bõ'õ, hew̃a'ae numana sibai ira.
3 No u'ila samõsa ira me labe'e zi khamõ fa'abõlõra, ma na'i tõra moroi ba da'õ. Lõ hadõi sango'ou ya'ira.
4 Ba la'andrõ sibai khõma na tola fao ira ba wame'e ame'ela fanolo ba mbanua Lowalangi si so ba Yudea.
5 Ya'ira labe'e manõ da'õ, tenga bõrõ wa no matõtõna da'õ moroi khõra. Si ofõna latou'õ ira ba danga Zo'aya, aefa da'õ ba khõma gõi me no omasi Lowalangi zi manõ.
6 Da'õ mbõrõ wa mafarou sibai Dito -- samõrõtaigõ halõw̃õ da'e -- ena'õ itohugõ halõw̃õ si sõkhi andre ba khõmi gõi.
7 No fahõna khõmi fefu hadia ia. No fahõna khõmi wamati, he fa'onekhe ba wehedehede, he ba wa'atuatua, he ba ngawalõ halõw̃õ, ba he fa'omasimi ndra'aga. Bõrõ da'õ, ena'õ gõi sia'a ami ba halõw̃õ si sõkhi andre.
8 Lõ uw̃a'õ khõmi sambua oroisa da'õ. No ba wangoroma'õ ha wa'aterou dõdõ niha ba wame'e tolotolo ba niha, omasido gõi u'ila heza ndrege irugi fa'omasimi andrõ.
9 Noa sa aboto ba dõdõmi wa no I'omasi'õ sibai ita Yesu Keriso, So'aya ya'ita: Hew̃a'ae no fahõna khõ-Nia, ba no Ifa'anumana Ia bõrõ ami, ena'õ ba wa'anumana-Nia andrõ, fahõna khõmi.
10 Molo'õ era'eragu, enahõi na mi'asiwalisi hadia zi no mifobõrõ ba ndrõfi si no numalõ. No ya'ami zi ofõna sibai wamõrõtaigõ wo'angeragõ halõw̃õ si mane da'e.
11 Me si manõ, ba mitohugõ wamalua iada'e, molo'õ si tola ami. Ya terou dõdõmi ba wangasiwalisi halõw̃õ da'õ, si mane fa'aterou dõdõmi me luo mifa'anõ lala gera'era ba mbõrõta.
12 Na so khõmi wa'aohagõlõ ba wame'e, ba Itema dania Lowalangi mbe'elõmi dali zi so khõmi, tenga dali zi lõ'õ khõmi.
13 Lõ manõ ohitõ dõdõgu ba wangefa'õ niha bõ'õ moroi ba noro dõdõ, ba mutambuasi khõmi. Lõ tola lõ fagõlõgõlõ.
14 Ba me ya'ami na iada'e bakha ba wa'afahõna, no sinangeania ya'ami zombõnõkhi so'ambõta ira. Na mo'ambõta gõi dania ami, ba ya'ira, ba wa'afahõnara, latolo gõi dania ami. Bõrõ da'õ faoma falali fanolo.
15 Bakha ba Mbuku Ni'amoni'õ no tesura, "Niha soya manõndra, ba lõ fa'atõra, ba ba niha si lõ oya'oya manõndra, ba lõ fa'ambõ."
16 Ba masuno Lowalangi, me no Ibe'e ba dõdõ Dito wa'owõlõ'õlõ si mane ya'aga ba wanolo ya'ami.
17 Me Tito andre tenga ha mamalua somasi ndra'aga manõ, no ya'ia gõi zabõlõbõlõ terou tõdõ ba wanolo ya'ami, irege ba wehulu dõdõnia samõsa ihalõ gangetula we'amõi khõmi.
18 Ba no mafatenge awõnia samõsa dalifusõ si sõkhi turia ba mbanua Niha Keriso misa fefu, sanuriaigõ Turia Somuso Dõdõ si otarai Lowalangi.
19 Ba zi tambai da'õ nasa, no latuyu gõi dalifusõ andrõ banua Niha Keriso awõma ba wofanõma. Mofanõ ndra'aga ba wama'ema tolotolo andrõ, ena'õ tefolakhõmi Zo'aya, ba ena'õ mi'ila wa omasi gõi ndra'aga manolo.
20 Mangenanõ sibai ndra'aga ena'õ bõi so niha samõbõgõ si lõ duhu khõma, ba wama'ema tolotolo sebua andrõ.
21 Si sõkhi sa mafalua, tenga ha tanõ fõna Zo'aya, no tanõ fõna niha gõi.
22 Fao khõ Dito ba talifusõ andrõ, mafatenge zui samõsa dalifusõ tanõ bõ'õ. No asese matandraigõ ia, ba oroma khõma wa no somasi manõ manolo ia. Ba iada'e, owõlõ'õlõ sibai ia wanolo ya'ami, me manõtõna dõdõnia khõmi.
23 Sanandrõsa khõ Dito, ba awõgu ia, si fao khõgu wohalõw̃õ ba wanolo ya'ami. Ba sanandrõsa khõ ndra talifusõda si darua, si mõi awõnia fao, ba no niha nifatenge mbanua Niha Keriso -- lakhõmi khõ Keriso.
24 Matõtõna khõmi wa mi'oroma'õ wa'omasimi khõra, ena'õ la'ila fefu banua Niha Keriso wa mi'omasi'õ ira ba wa si duhu hadia ia zi no masunosuno ba khõmi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA