Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Puari-puari, sekam mirak keti pandai juga tentang injuk repa betik-Ni Allah jama jemaah-jemaah di Makedonia.

² Tian radu diuji jama kesulitan-kesulitan sai biak. Kidang di tengah kesulitan-kesulitan udi, tian riang rik murah hati nihan ngeniko sumbangan untuk nulung jelma bareh, meskipun tian mejerih nihan.

³ Nyak dapok mastiko bahwa tian ngeni semampu tian, bahkan lebih. Tanpa wat sai ngayun,

⁴ tian ngilu nihan jama sekam kik ngasi tian nutuk ngebantu ngeni sumbangan jama umat-Ni Allah di Yudea.

⁵ Tian ngeni jaoh lebih jak sai sekam harapko. Tian mula-mula nyerahko diri jama Tuhan, kak raduni jama sekam juga, nutuk kehaga-Ni Allah.

⁶ Udi sebabni sekam nganjurko nihan Titus -- sai ngemulai usaha inji -- in ia ngelanjutko usaha sai betik inji di hantara keti juga.

⁷ Keti unggul delom sunyinni: Keti unggul delom hal percaya, delom hal nyatako pendapat, delom hal pengetahuan, delom sunyin macam usaha, rik delom kasihmu jama sekam. Ulihni seno, betikdo keti juga unggul delom usaha sai helau inji.

⁸ Nyak mak nganjurko ano sebagai perintah. Kidang jama nunjukko hara giatni ulun bareh nulung peperda tian, nyak juga mirak pandai sampai di dipa kasihmu.

⁹ Mani keti pandai nihan bahwa ram dikasihi nihan ulih-Ni Isa Almasih Tuhan ram. Ia mebatin, kidang Ia nyani diri-Ni jadi mejerih untuk kepentinganmu, in jama kejerihan-Ni ano, keti jadi mebatin.

¹⁰ Nutuk pendapatku, di rangnido keti nyelesaiko api sai radu keti mulai tahun sai tumbai. Mani ketido sai mula-mula mikerko rik mulai usaha inji.

¹¹ Nah, tano hagani keti ngelanjutkoni nutuk kemampuanmu. Hagani keti besemangat untuk nyelesaiko usaha udi, injuk repa keti tumbai pun besemangat ngerencanakoni.

¹² Kik keti rila ngeni, maka Allah haga nerima pengenianmu ano bedasarko api sai wat jama niku, lain bedasarko api sai mak ngedok jama niku.

¹³ Nyak sama sekali mak bemaksud untuk ngebebasko ulun bareh jak tanggung jawab, rik ngebiakko keti. Kidang mani keti tano inji delom keadaan serba cukup, maka radu sepatutnido keti nyukupi kekurangan tian. Kanah kik keti kekurangan rik tian delom keadaan serba cukup, maka tian haga ngebantu keti. Jama injuk reno kerua-ruani jama-jama dilayani.

¹⁴ (8:13)

¹⁵ Delom Alkitab tetulis, "Jelma sai bepenghasilan lamon, mak berlebihan, rik jelma sai bepenghasilan cutik, mak kekurangan."

¹⁶ Hara syukorni sekam jama Allah mani Ia radu nyani Titus segiat sekam untuk nulung keti!

¹⁷ Mani Titus lain gaoh rila memenuhi kiluan sekam, kidang ia juga injuk reno giatni haga nulung keti sampai atas kehagani tenggalan ia mutusko untuk mik jama niku.

¹⁸ Jejama jama ia sekam ngirim juga puari sai dihormati nihan di sunyin jemaah mani guaini ngabarko Kabar Betik jak Allah.

¹⁹ Di samping ano, jelma tersebut radu dipilih juga rik ditantuko ulih jemaah-jemaah untuk ngerik sekam delom lapahni sekam. Mani sekam haga ngadako lapahni untuk nyampaiko sumbangan ano, in Tuhan dimuliako rik in keti ngeliak bahwa sekam rila nulung.

²⁰ Sekam behati-hati nihan in dang wat jelma sai nyalahko sekam delom hal nyampaiko sumbangan sai balak inji.

²¹ Sekam haga betindak jujor lain angkah di hadap-Ni Allah, kidang di hadap manusia juga.

²² Jejama jama Titus rik puari tersebut, sekam juga ngirim sai puari sai bareh. Sekam radu nguji ia bekali-kali rik ternyata ia risok gering nulung. Rik tano, ia lebih-lebih haga nulung keti mani ia ngeharap sai balak jama niku.

²³ Tentang Titus, iado kantikku, sai beguai jama nyak nutuk nulung keti. Rik tentang kerua puari ano, sai mik jejama ia, tiando jelma-jelma sai diutus ulihni jemaah-jemaah rik jadi kebanggaan bagi Almasih.

²⁴ Sekam harap keti nunjukko kasihmu jama tian, in sunyin jemaah pandai bahwa keti mengasihi tian rik bahwa api sai sekam banggako tentang keti ano benor.

2 Korintus

Video 2 Korintus 8

Ikuti Kami:

KONTAK | PARTISIPASI | DONASI