Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kapolana, sampesuvu-sampesuvu, kami mompopaisani ka komiu anu najadi ri sii ri propinsi Makedonia. Alatala nabelo mpuu ka todea topomparasaya ri sii sampe ledo natove rarara nombatulungi tona ntanina.

² Nandasa mpuu kasusa bo kapari nirasaira, bo ira mboto napakasi mpai. Tapi naupa ivesia, ira bate-batena nadamba ntoto sampe ledo mpuu natove rarara nombadekei ka tona ntanina.

³ Nikitaku mboto ira nodekei, ledo aga nangoseaka pompakulera, tapi nelabi lako ri pompakulera.

⁴ Dotara mboto, ira nerapi nte kami ante rarara mpuu-mpuu ala ira muni radekeika loga mombatulungi topomparasaya napakasi ri bagia Yudea.

⁵ Anu nidekeira nelabi mpuu lako ri anu nisarumaka kami. Ledo aga doi nidekeira. Tapi nidekeira ntani ruru katuvura ka i Pue. Ira natundu nte Ia bo natundu muni nte kami, sabana haitumo dota nu Alatala.

⁶ Jadi kami nerapi nte i Titus ala ia manjili tou nte komiu. Iamo anu nompamula bago nompasiromu doi petulungi haitu nte komiu bara ipia. Jadi haitumo sabana ia nitudu kami mompapola pokarajaa nabelo haitu.

⁷ Sampesuvu-sampesuvu, nabelo pura anu nipoviamiu. Pomparasayamiu mpuu-mpuu naroso. Napande mpuu komiu notesa. Nisanimiu pepatuduki nakana, naoge raramiu nombatulungi tona ntanina, bo naoge mpuu pompotovemiu kami. Jadi ivesia muni mabelo rapasimbukumiu mombatulungi tona napakasi.

⁸ Ledo niparentaku komiu kana mombadekei maoge. Yaku aga mompopaisani ka komiu kambaso pepotove ntoMakedonia nantulungi tona ntanina. Patujuku ala kusani ane komiu muni mpuu-mpuu nompotove tona ntanina.

⁹ Ledo paraluu kuparenta komiu apa nisanimiu mboto kambaso pepotove nTuputa i Yesus Kristus ka kita. Naupa Ia mpuu-mpuu nakalumana, nikabasakaNa pura-pura kakalumanaNa haitu ala mantulungi kita. Ia najadi manusia napakasi ala kita mamala majadi nakalumana ri panggita nTupu.

¹⁰ Ivei panggavaku pompasiromu doi petulungi haitu. Nabelopa komiu mompakaupu bago nipamulamiu mpae naliu. Komiu tona pamulana nompekirika mompasiromu doi petulungi haitu bo komiu muni tona pamulana nompamula nompasiromu doi haitu.

¹¹ Jadi hitupa papolamo bago haitu sampe maupu. Mabelo ane kadotamiu mompapola bago haitu sampe maupu, masimbayu ante kaoge nu raramiu nompamula bago haitu bara ipia. Dekeimo nangoseaka pompakulemiu.

¹² Apa ane rarata mpuu-mpuu mombadekei, pedekeita haitu ratarima nu Alatala nangoseaka anu naria nte kita, ledo nangoseaka anu ledo ria nte kita.

¹³ Patujuku ala katuvumiu masimbayu. Patujuku ledo mompakantamo komiu sampe komiu mapepa bo tona ntanina mangaa.

¹⁴ Sii-sii komiu nelabi nagana bo nipakulemiu mantulungi ira. Bo tempo bara maipia ane komiu makura bo ira melabi, ira muni mamala mombatulungi komiu. Ivesiamo katuvumiu masimbayu.

¹⁵ Nisanita haitu nakana apa nitulisi riara Buku Gasa ivei: "Tona nompasiromu nadea, ledo nelabi, bo tona nompasiromu sakide ledo muni nakura."

¹⁶ Kami nosukuru nte Alatala sabana Ia nompakaoge rara i Titus mompekirika kabelomiu nasimbayu mpo kami mboto.

¹⁷ Naoge rara i Titus nombatulungi komiu sampe ia nompoiyo pomperapi kami mompapola pompasiromu doi petulungi haitu. Bo ledo aga haitu, ia mboto nompakatantu kana tou nte komiu.

¹⁸ Bo nitudu kami muni saito sampesuvuta ntanina momporoa i Titus riara polipana tou nte komiu. Sampesuvuta haitu mpuu-mpuu nibila ntopomparasaya sabana pokarajaana nompatolele Kareba Belo.

¹⁹ Ledo aga haitu, tapi ia muni nipelisi ntodea topomparasaya momporoa kami riara polipa kami hau ri bagia Yudea manggeni doi petulungi haitu. Patuju nu polipa kami haitu ala Alatala rabila bo ratoiya ntona, bo ala rasani ntona kaoge nu rara kami mantulungi sampesuvuta napakasi.

²⁰ Patuju kami nantudu sampesuvuta haitu nosanggani-nggani nte i Titus ala nee maria tona manguli kami ledo nanoa nompasiayu pedekei nadea haitu.

²¹ Apa kami madota movia anu nanoa ri panggita nu Alatala, bo muni ri panggita nu manusia.

²² Nitudu kami munimo saitopa sampesuvu ntanina mosangganika gi Titus. Nadea ngganimo nipopakitana kaoge nu rarana mantulungi tona ntanina. Bo sii-sii naoge mpuu rarana mantulungi komiu mompasiayu pompasiromu doi petulungi haitu, sabana ia mpuu-mpuu nanjarumaka komiu muni madota mombatulungi tona napakasi.

²³ I Titus hii roaku sampokarajaa mantulungi komiu. Bo randua sampesuvuta ntanina anu nomporoa ia, nisuro ntodea topomparasaya, bo nadea mpuu tona nombabila bo nombatoiya i Kristus sabana katuvu nu sampesuvuta randua haitu.

²⁴ Jadi kuperapi nte komiu popakitamo tovemiu ka ira tatalu ala rakita ntodea topomparasaya pepotovemiu, bo rasanira muni tesa-tesa kami nombatoiya komiu ri ngayora bara ipia, mpuu-mpuu nakana.

2 Korintus

Video 2 Korintus 8

Ikuti Kami:

KONTAK | PARTISIPASI | DONASI