Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali a’i-a’i to kuporayang kojo, magaya kojo parajanji-parajanji i mPue Allah resi kita etu! Wali apa saba parajanjiNya etu see naka anu kita mampakayongongika raya ngkita pasi koro ngkita. Batuanginya, posaka yau samparia palaong to maja’a to mampakarikasika koronta pasi rayanta etu. Pasi anu kita kanjo’unjo’u tiduga-dugang mampasilonga lengko ngkita to masipato naika ntau to i Pue Allah Puenya. Ewa wetu lengko ngkita mampalaika i Pue Allah saba manga’angga Ia.
2 Wali kuporapika resi komi pakabae pamporayang ngkomi resi kami. Ne’e mampodongeka gombo ntau to mampakasala kami. Apa tare pasi samba’a tau to mangarata sala to yako to nika mami. Pasi tare pasi samba’a tau to napakaja’aka yau mami katuwunya. Pasi taa seja re’e tau to itipu mami.
3 Wali naka pei aku manganto’oka komi gombo etu, si’a damampakasala komi. Apa ewa to roomo aku manganto’oka komi, kami mamporayang kojo komi, see naka kami buya raya mami nempo tuwu bara mate sindara-ndara pei komi.
4 Wali apa saba aku mamporayang komi see naka aku taa meka-meka rayangku mampogomboka komi. Pasi see naka aku masanang mangabarong komi. Pasi apa saba komi semo naka pei bae kalindo ndayangku pasi bae seja kandende ndayangku ri rayanya samparia kasesa to irata mami.
5 Wali ane mangkonong kasesa to aku manganto’oka komi ngena, tempo kami rata nja’u Makedonia seore, tempo etu kami tare kalindo ndaya. Apa mpangaya-ngaya kasusa to narata mami nja’u ria. Apa ane yako resi tau to yusa, re’e to mangewa kami, pasi ane yako resi koro mami ngkalio re’e kamoru ndaya.
6 Pei nempo ewa wetu, i Pue Allah mangansani ewa wimba raika mampolindo tau to ri raya ngkamawo. Wali Ia mampolindo seja raya mami saba yako karata i nTitus nja’u ria.
7 Pasi si’a ojo karatanya mampolindo raya mami. Pasi kareba to ikeninya to mampolindo kami, apa i Titus mampakarebaka resi kami mangkonong ewa wimba inika ngkomi ri Korintus mampolindo ia seore. Pasi ane ewa to’onya komi mawongko kojo raya ngkomi mampobuuka aku, pasi soso raya ngkomi apa saba dosa to mawali ri oyo ngkomi seore to roomo isekongku ri raya nsurangku to uyunya. Pasi ane ewa to’o i nTitus komi rani kojo mampakasanang aku. Wali apa saba kareba to nakeni i nTitus etu, see naka aku tidugang wo’u kandende ndayangku.
8 Wali sura to aku nangantulis manganseko komi seore, sura etu nampakamawo raya ngkomi. Pasi aku soso rayangku seore mampobuuka kamawo ndaya to nurata ngkomi yako surangku etu. Pei si’i-si’i aku tamo soso rayangku, apa taa masae kojo kamawo ndaya ngkomi etu.
9 Wali aku masanang si’i-si’i. Pei si’a kamawo ndaya ngkomi seore to mampakasanang rayangku. Naka pei aku masanang apa yako kamawo ndaya ngkomi etu, see naka komi mangandolika tango ngkomi yako ri sala to nuika ngkomi seore. Apa kamawo ndaya to nurata ngkomi etu singkonong pei pamporani i mPue Allah, wali manasa resi aku kami taa kojo mampakaja’a yau pangaya ngkomi.
10 Apa kamawo ndaya ntau to singkonong pei pamporani i mPue Allah, kamawo ndaya etu matao. Apa yako kamawo ndaya to etu see naka tau majea, wali see naka sira rapalaes. Wali tau taa soso rayanya mangkonong kamawo ndaya to etu. Pei yusa kamawo ndaya nto lino to taa mangaya. Apa kamawo ndaya ntau etu mampobuuka dosanya, kamawo ndaya etu ojo mangkeni kapate apa saba sira taa mangaya.
11 Wali pobuuka kojo palaong to mawali saba yako kamawo ndaya to singkonong pei pamporani i mPue Allah to nurata ngkomi seore. Gete bae kojo batuanginya! Apa yako kamawo ndaya ngkomi etu, see naka komi mampakakoro mangika anu to masipato raika. Komi rani kojo mampakakonoka palaong to maja’a to nawali ri oyo ngkomi seore. Pasi maja’a kojo raya ngkomi mampobuuka palaong to maja’a etu. Pasi komi mawali meka raya ngkomi mampobuuka palaong etu. Pasi bae kojo kawongko ndaya ngkomi rani mangkita wo’u aku. Pasi bae seja kadota ngkomi mampakaroo palaong to nawali, pasi mangabotus tau to mangika dosa etu. Wali samparia to roomo nuika ngkomi etu mampakanasa tamo re’e sala ngkomi ane mangkonong palaong to nawali seore.
12 Wali tempo aku nangantulisika komi sura etu seore, kamonsonya si’a ojo tau to nangika sala to aku mampobuuka. Pasi si’a seja ojo tau to masusa naika nsala ntau etu naka pei aku mangantulis sura. Pei kamonsonya naka pei aku mangantulis sura etu see damampakanasaka resi samparia komi, ri pangkita i mPue Allah, komi monso pu’u mamporayang kami pasi rani mampakasanang kami apa komi mampakaroo palaong etu.
13 Wali tempo i Titus mampakarebaka resi kami mangkonong komi lindo muni si’i-si’i, tempo etu kami lindo seja raya mami. Pasi i Titus masanang kojo apa komi samparia roomo mampakaroso rayanya. Wali see naka tidugang wo’u kandende ndaya mami.
14 Wali ndende raya mami, apa ri katawanya i Titus nayau resi komi, tempo etu aku re’e mampogomboka ia mangabarong komi. Pasi si’i-si’i miyala resi ia monso pu’u gombongku mangkonong komi, wali aku taa mawali mea. Wali gombo mami resi komi sangkani monso, pasi ewa see seja gombongku resi i Titus mangabarong komi seore. Manasamo monso seja gombongku etu.
15 Pasi pamporayang i nTitus resi komi kanjo’u-njo’u tiduga-dugang kabaenya tempo ia mampobuuka ewa wimba nuika ngkomi mampolaika gombonya seore. Pasi komi masanang tempo ia rata resi komi nempo mekameka raya ngkomi pasi moru-moru mampobuuka dosa to mawali ri oyo ngkomi seore.
16 Wali ndende rayangku apa aku mangansani nempo bara kesaa to mawali, komi masipato kusarumaka.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA