Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Manga anạ u sěmbaụ ikẹ̌kěndagẹ̌! Patikụ pẹ̌kakakědo e kai pẹ̌tẹ̌timona si kitẹ. Kụ i kitẹ e kěnangko mamurẹ̌si watangeng i kitẹ e wọu patikụ apang nakal᷊amuhụ rohkẹ̌ dingangu ghěsing kitẹ e. Kěnangko i kitẹ e mạtakụ u Mawu Ruata, tadeạu i kitẹ e makapẹ̌biahẹ̌be samatang baug'i Sie ringangu masukụ.
2 Tarimạ bue i kami e su ral᷊ungu naung i kamene. I kami e tawe nẹ̌sal᷊a si sai-sai, ringangu tawẹu sarang sěngkatau niakal᷊eng i kami e. I kami e mamben tawe měngangahěbụ si sai-sai pědeakeng untune.
3 Iạ e měbẹ̌bera kerene wal᷊inewe mědẹ̌deạ aị u mapẹ̌sal᷊ang kamene. Batụu, kerẹewe seng takụ pinẹ̌bera kal᷊amona, u mambeng masaria kakěndagi kami e si kamene, ringangu i kitẹ e kai hapị balạewe su pẹ̌bawiahẹ̌ ore lai su kakate.
4 Iạ e mạngumbala masaria si kamene, tapengu l᷊ai lụl᷊uas'i kamene kahěnga-hěngang. Maningbe i kami masau hombangengu susa sigěsạ! Kaiso i kami e měngkai mạhibor'i kamene. Dal᷊uasẹ̌ku e mambeng masaria!
5 Piạ e i kami narěnta su Makedonia ute, i kami e mamben tawe nakapangirul᷊e. Baẹbe wọu lẹ̌sabe sude, i kami e mang kẹ̌kaěbakengu sigěsạ; bọutewelain sěmběkane wal᷊ine e pẹ̌dararendehẹ̌, dingangu wọu ral᷊ungu naung i kami hala e katatakụ.
6 Kaiso tarimakasẹ, batụu Mawu Ruata e sěntiniạ tạ ědone mapakạsarian naungu taumata kụ apang měngkạpěndụ; i Sie měnẹ̌nahimbologu rarěntan Titus e su naung i kami.
7 Naung i kami e mạhiborẹ̌ bal᷊inewe ual᷊ingu i Titus seng narěntae, kaiso kawe lai ual᷊ingu i sie mạul᷊ịu ral᷊uasu naunge ual᷊ingu i kamene. I sie něhabarẹ̌ si kami u i kamene měkẹ̌karimang u mẹ̌sombang u iạ; u i kamene kai nẹ̌sasěsilu kakanoạ i kamene nạung kal᷊amona kụ su orasẹ̌ ini e i kamene mal᷊uasẹ̌ manumběka wọu iạ e. Hal᷊ẹ̌ ene tangu mapẹ̌dẹ̌dal᷊embong iạ e su ral᷊uasẹ̌ku.
8 Maningbe suratẹ̌ku nakasusa naung i kamene, kai iạ e tawe nẹ̌sasěsilu nẹ̌koạ suratẹ̌ ene. Mamben těngadẹ̌ piạ iạ nakasilo u suratẹ̌ku e kai nakasusa naung i kamene -- u manịeng susan naung i kamene e tumbạeng sěngkakuhuang -- kai iạ e mal᷊aing piạ sěsil᷊ẹ̌ku.
9 Kai ini e sembeng mal᷊uasẹ̌ -- bal᷊inewe ual᷊ingu naung i kamene niapakasusa, kaiso kawe ual᷊ingu kasasusan naung i kamene e kawe makapěmal᷊ui kakanoạ i kamene. U kasasusan naung'i kamene e nẹ̌sěndal᷊engbeng kapulun Duata. Kụ i kami e tawe měndugi si kamene.
10 Batụu kasasusan naung kerene e kai makaual᷊i pěmamal᷊ui naung kụ makạkạděntang kasasal᷊amatẹ̌. Kụ taumata e tawe sarung mẹ̌sasěsilu ene. Arawe kasasusan naung kụ sěndal᷊eng u kapulun taumata e makạual᷊i papate.
11 Kěnang i kamene kakělla měnsang apa ual᷊ine si kamene ual᷊ingu susan naung kụ natuhụ su kapulun Duata! Ual᷊ine ute i kamene mambeng mětẹ̌tawakal᷊i mapakạtilang u karal᷊ěbuhẹ̌! I kamene měngkakoạ mẹ̌bawawinsị u rosa, měngkạtakụ, lẹ̌lahimpuluang, mạhuntinambang kěhage, sadia měhukungu apan němpẹ̌sal᷊a! Su ral᷊ungu patikụ tal᷊imbukune ini i kamene semben nanodẹ u i kamene seng tawẹ sal᷊ane.
12 Kụ manịeng iạ seng bọu namohẹ suratẹ̌ ene, iạ namohẹ tangu wal᷊inewe ual᷊ingu taumata kụ nẹ̌sal᷊a ene. Wal᷊inewe lai ual᷊ingu taumata kụ nasigěsạ u pẹ̌sasal᷊a ene. Iạ e nakapěmohẹ u suratẹ̌ ene tadeạu su těngon Duata e, i kamene semben nakahěngang hala u kai apạe kạsariane ral᷊ungu naung i kamene miěbạ i kami.
13 Kai ene hakịu naung i kami e měngkai mạhiborẹ̌. Sul᷊iun mạhiborẹ̌ e, i kami e limembowen lai mạhiborẹ̌ makạsilo karal᷊uasu naung i Titus; naunge mạhiboreweng kamene kěbị e.
14 Iạ e mang seng lụl᷊esạ i kamene si sie. Tarimakasẹ, u i kamene tawe napakamean iạ. Kěbị apang bọu iwẹ̌berang kami si kamene e mamben těngadẹ̌. Kerene lai apang ilẹ̌lesạ i kami e mạanung kamene si Titus mambelain těngadẹ̌.
15 Tempo ini e i sie mangkeng kạpahuntinambang kakěndage si kamene, u i sie makạtahěndung kereapa i kamene kěbị e mapulu tumuhụ měngangahạ e ringangu kereapa kakakoạ i kamene manarimạ i sie su adate ringangu kasatiane.
16 Iạ e mal᷊uasẹ̌ kahěngang u i kamene pạngimangeng bue su patikụ sabarang.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA