Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Amung ini pangeh biré kuan tau, O lun rurumku. Ngaceku ineh do' tau ngeligan burur tau ratnan amung luk ngelutak burur idi niat, idi ngeriput ligan tau dengan matot inan Allah.
2 Ngukab niat muyuh kuan kai. Idi seburur pana' nateh pidereh kai, seburur pana' nateh inusag kai, idi seburur pana' nateh sinaluk kai.
3 Ui na pebala kudeng ini pad ngesala' nemuyuh, ngaceku atun ui nepebala, kai mawa nemuyuh idi perurum nemuyuh, sagan pana' mulun, kian maté lek.
4 Ui merapet nemuyuh, idi ui mawang niat ku muyuh. Bang amung-amung susa' kai ui mawang niat idi mekuu'.
5 Kareb kai nacing déi' Makedonia pana', na kai miak ngato erur kai, iamo' kai pidereh iapeh-iapeh pana'. Idi inan kedaluh rat nelun baken idi tot bang niat kai sebuleng.
6 Iamo' Allah luk ngubuk lemulun luk mebeneh niat, Ieh ineh teh nengubuk nekai dengan acing Titus;
7 idi baken dengan acingneh ineh mo', iamo dengan ubuk luk ilapneh rat nemuyuh. Kareb ieh nemada' nekai ratnan muyuh pian papu' negku, idi ratnan inuud idi tangi' muyuh, idi ratnan muyuh pian ngedengan negku, idi ui pelaba awang niat.
8 Sagan pana' ui nengesusa' nemuyuh ku surat ineh, na ui nginuud ratnan ineh. Atun ui lélé nginuud, kareb ui kali' surat ineh nengesusa' nemuyuh segageh mo' kinioneh.
9 Iamo' nekini ui mawang niat, baken ngaceku muyuh pangeh nesusa' niat, iamo' ngaceku muyuh mesusa' niat pad macing uren. Susa' niat muyuh pangeh pikai Allah, pad na muyuh merugi' ngaceku luk inau' kai.
10 Ngaceku susa' luk maya' pian Allah ineh nguit uren macing inan ulun luk meruked, idi na tau miak mesusa' niat ku ineh. Iamo' susa' niat ratnan tana' ini ngacing até.
11 Ngerawé luk inau' Allah ratnan susa' muyuh. Nekini muyuh pelaba kél ngegala' ratnan muyuh na mesala'. Kudeng apehké gateh, tot, tueh, idi kél muyuh, pad muyuh pelaba pian ngukum kekamen luk dat. Bang amung-amung ineh muyuh pangeh nengegala' nemuyuh matu.
12 Sagan pana' ui pangeh nengayud surat ineh, baken ui nengayud ngaceku lemulun luk nenganau' sala' mo', idi baken ngaceku lemulun luk medereh ku sala' ineh, iamo' pad ngegala' kuan muyuh ratnan rayeh awa muyuh nekai pa kiung Allah.
13 Ineh punneh kai pangeh inubuk. Iamo' baken kai inubuk mo'. Kai pelaba awang niat ngaceku awang Titus ineh, ngaceku muyuh pangeh nengawang niatneh.
14 Atun ui nengubur nemuyuh pa kiungneh, idi na muyuh nengigu' negku. Kai megéi' mala luk matu kuan muyuh. Kudeng ineh teh megala' ratnan luk bila kai pa kiung Titus ineh pangeh ginala' matu.
15 Idi awaneh kuan muyuh amé' mula', ngaceku ieh nengerawé ratnan baya' muyuh, idi kudeng apeh muyuh nengalap neneh dengan matot idi megegker.
16 Idi ui mawang niat ngaceku ui miak merapet nemuyuh!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA