Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sababu ngomi miomasidamanarama de ma Jo'oungu ma Dutu, so ngomi mioga'asoko miosigou-gounguku, 'uwa niahalebiru ma Jo'oungu ma Dutu 'awi co-catu ma ngale 'o laha ge'ena.

² 'O Buku 'Itebi-tebinoka ma Jo'oungu ma Dutu wongose 'ato, "Ma 'orasi yadae-daenuku, ngoi tosigisenokau 'ani lahidoa, de ma 'orasi ya'adono ngoi tonisilaha, ngoi toniriwokau." Niosi-singina, ma 'orasi ne'enau 'o silaha ma 'orasi. Ma 'orasi ne'enau, nisilaha ma wange!

³ Naga 'o sagala moi-moioka, ngomi miooluku miodiai 'o nyawa manga singina 'isiri ngomino, la 'amia manarama 'uwa yosisowono.

⁴ So 'ena naga 'o sagala moi-moioka, ngomi miosidumutu 'ato ngomi ne'ena ma gou-goungu ma Jo'oungu ma Dutu mileleani. Sababu 'o sagala sangisara 'i'ini-'inioka 'iodumu miamaokau de miotongosono.

⁵ Ngomi misikisaa, mibui. de 'iruahe ma ngale miringamo, ngomi miomanarama sigado 'amia guata ma rekeni 'ibootoka, ma gudai komima'iduwa, mita ma gudai mia 'inomo koi'iwa.

⁶ De mia singina 'itebi-tebini, mia barija, de mia sabari, de mioduaka 'o nyawa miakiriwo, ngomi miosidumutu 'ato ngomi ne'ena ma Jo'oungu ma Dutu mile-leleani. Mita de mimasinganono 'o Ngomasa 'Itebi-tebinika, de mita de 'amia dora 'iti-tiai,

⁷ miositotara 'o habari ma Jo'oungu ma Dutuno, de mita de ma Jo'oungu ma Dutu 'awi kuasa, ngomi miosidumutu 'ato ngomi ne'ena ma Jo'oungu ma Dutu mile-leleani. Ngomi mimasiga-gao ma Jo'oungu ma Dutu 'awi mauka miadiai matero ka mia dae ma ngale miositaari bolo mimasijaga.

⁸ Ngomi mihoromati, ma misiti-tingoono mita. Misiarene ma de misigurubungu. Ngaro ngomi mioloa, ma yongose 'ato mioelu-eluku.

⁹ Ngomi ne'ena naga munuka yamaoku 'ato ngomi ne'ena ko 'o su-sulokuwa, ma 'o nyawa manga gudai minako. 'O nyawa yongose 'ato ngomi miosongenou, ma minimake ne'ena, ngomi kamio'ahu-'ahuosi. Ngaro ngomi mihalebiru ma komiosongenuwa.

¹⁰ Ngaro 'amia singina yasusa, ma ngomi kaitaurika miomorene. Ngomi mimakeno miosaigalere, ma ngomi manga gudaiou miakisikorago manga ngo-ngakuoka. Mimakeno ngomi komiakia-kiawa, ma yadaene 'ena to ngomi mia sagala moi-moi de ma 'ena.

¹¹ 'Esa moi riaka dodoto tinisiboso-bosono gee niogogere 'o Korintus ma kotaka! Ngomi miositaiwangeku 'amia singina ma doda 'ato minisibosono ma sala ngini.

¹² Ngomi kaminisiboso-bosono ngini, duga nginiou kominisibosonuwa ngomino.

¹³ Ma 'orasi ne'ena ngoi tobi-bicara matero ka to ngoi ma sirete 'ai ngowakika. Tanu niapelenga mita nia singina ngomino, ma ngale minidora ngomino.

¹⁴ 'Uwa ngini ka 'o singina moi de 'o nyawa gee koyongaku-ngakuwa ma Kristusika. Sababu ge'ena koyadaenuwa. Gee yaowa-owa koidadiwa 'imakaganu de 'o dingkai, de 'o darangi koidadiwa 'imakaganu de 'o darusu.

¹⁵ Koidadiwa ma Kristus womarimoi de 'o Tokata ma Koana. 'O nyawa yongaku-ngaku de 'o nyawa koyongaku-ngakuwa ge'ena koimaterowa.

¹⁶ Ma Jou 'awi woa de 'o barahala ma woa ge'ena 'imakaregu ma sala. Ngone ne'ena ma Jo'oungu ma Dutu wo'ahu-'ahu 'awi woa. Ma Jo'oungu ma Dutu ma sirete wongose, "Ngoi 'asa togogere to 'ona manga sigoronaka, de to'ahu de de 'ona. Ngoi 'asa todadi to 'ona manga Jo'oungu ma Dutu, de 'ona 'asa yodadi 'ai 'umati.

¹⁷ Sababu ge'ena, 'uwau niakidomoteke 'o nyawa gee kowinako-nakowa ma Jo'oungu ma Dutu, de nimasitingaka 'onaka. 'Uwa nimasiganu ka ma eta ma gee 'imedi-medirika, la ngoi 'asa tinidawongo.

¹⁸ Ngoi 'asa todadi to ngini nia dea, de ngini 'asa niodadi 'ai ngowa-ngowaka, ma Jou gee wi kuasa ma batingi koi'iwa wongose koge'ena."

2 Korintus

Video 2 Korintus 6

Ikuti Kami:

KONTAK | PARTISIPASI | DONASI