Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali si’i-si’i komi bara mangepe kami si’i ojo tabaro wo’u mangkonong palaong mami etu. Pei si’a ewa see. Apa kamonsonya kami monso pu’u pomakau i ngKerisitu, nempo kami tare mangkenika komi sura yako resi sa’e to mampatimonso kami pomakauNya. Kami si’a ewa tau to yusa to mampotundeka komi. Apa ane tau etu komi taa mangantima ane tare sura to nakeni nsira to mampaponsanika komi mangkonong lengko nsira. Pasi ewa see seja ane sira yau ri lipu to yusa, sira taa natima ntau ri lipu etu ane sira taa mangkeni sura yako resi komi.
2 Pei kami nempo tare sura to ewa wetu apa komi semo ewa sura to mampaponsanika samparia tau mangkonong kami apa komi semo wua mpalaong mami. Wali sira mangkita lengko ngkatuwu ngkomi, panewa katuwu ngkomi etu mawali tondong to mampakanasaka sira kami monso pu’u pomakau i ngKerisitu. Wali nempo taa ratulis ri raya nsura taa mawei, apa komi semo ewa sura ri raya mami.
3 Wali komi ewa sura to nato’oka i ngKerisitu kami mangantulis. Pasi i Nosa i mPue Allah anu tuwu, Ia ewa tinta to rapake mangantulis sura etu. Pasi sura etu si’a ratulis ri woto mbatu ewa naika i mPue Allah tempo Ia mangawaika i Musa porentaNya. Sura etu ratulis ri raya ntau.
4 Wali naka pei kami maya manganto’o ewa wetu apa bae pansarumaka mami resi i Pue Allah apa saba palaong to naika i ngKerisitu.
5 Pei taa masipato kami mampobuuka re’e yami kapande mami mangika bara kesaa. I Pue Allah semo to pu’u ngkapande to re’e resi kami.
6 Apa Ia semo to mangawaika kami gana kapande see kami mangkoto mampakarebaka resi sa’e parajanji i mPue Allah to bou. Wali si’amo porenta to natulis i Musa tempo owi to napakarebaka mami. Apa porenta to etu ojo mampakanasaka tau masipato rahuku mate. Pei to kami mampakarebaka, etu semo kareba to yako resi i Nosa Mapasing. Apa i Nosa Mapasing semo to mangawai katuwu.
7 Pei porenta to ratulis etu, etu semo porenta i Musa to natulis i mPue Allah ri woto mbatu tempo owi. Wali tempo i Musa nawaika i mPue Allah porenta etu, bae kojo kayawa i mPue Allah to nakita i Musa etu. See naka lio i Musa makilo kojo naika ngkayawa etu. Wali yako etu i Musa nayau muni damampakarata porenta etu resi to Israel. Pei rata resi sira lionya mamulamo makurang muni karemenya. Pei nempo ewa see, to Israel tawa nakoto mangalo’aka yau ri lionya etu apa saba tiroowa makilo. Wali bae kojo kayawa to rakita ri tempo i Pue Allah mangawaika i Musa porenta, nempo porenta etu ojo mampakanasaka tau masipato rahuku mate. Pasi yako ri kayawa etu kita mangansani bae kojo batuanginya porenta etu.
8 Wali ane ewa see, bae wo’u kayawa ri tempo si’i, tempo i Nosa Mapasing maroo ri raya ntau.
9 Apa ane bae batuanginya porenta to masae etu, to ojo mangahuku tau, ane ewa see, taa manto’o to tempo si’i to bae-bae wo’u batuanginya pei porenta to masae etu. Etu semo songka to mampakanasaka tau jaya see maya nato’o i mPue Allah tare dosanya.
10 Apa kamonsonya porenta to bae kayawanya pasi bae batuanginya tempo owi etu, porenta etu tamore batuanginya apa roomo rabolosika yau songka to bae wo’u kayawanya pasi bae wo’u batuanginya.
11 Pasi ane porenta to taa singkasaenya etu pei bae kayawanya pasi bae batuanginya, ane ewa see, taa manto’o songka to singkasaenya etu to bae-bae wo’u kayawanya pasi to bae-bae wo’u batuanginya.
12 Wali a’i-a’i, songka to bou to singkasaenya etu monso pu’u bae kayawanya! Wali kami mangansarumaka kojo songka etu, see naka maroso kojo raya mami mampakanasaka tau anu to kami mampakarebaka. Tare to kami mangawuni resi komi.
13 Wali palaong mami si’a ewa palaong i Musa tempo owi. Apa tempo etu i Musa mangabombongika kain lionya to makilo etu naka ne’e nalo’a-lo’aka nto Israel ri rayanya dapaya yau kayawa i mPue to re’e ri lionya etu. Pei ri tempo si’i tare to kami mangawuni resi komi. Kami mampakanasaka kojo tau mangkonong kayawa i mPue Allah.
14 Pei to Israel tempo owi etu, pampobuuka nsira raporapaka ewa rabombongika seja kain sewaju ewa lio i Musa apa sira taa nansani batuanginya parajanji to masae etu. Pasi ewa see seja rataka ri tempo si’i. Apa tempo si’i, tempo to Yahudi mangabasa parajanji to masae, pampobuuka nsira tiroo ewa rabombongika kain etu apa sira tawa seja mangansani batuanginya. Wali kain etu tawa rayali yau yako ri pampobuuka nsira, apa ojo tau to samba’a pei i Kerisitu to rayali yau kain etu yako ri pampobuukanya.
15 Pei sira tawa samba’a pei i Kerisitu, see naka rataka tempo si’i sira tawa mangansani batuanginya tempo mangabasa porenta i Musa apa pampobuuka nsira tiroo ewa rabombongika kain etu.
16 Pei tempo tau mangandolika tangonya resi i Pue, tempo etu anu to mangabombong pampobuuka nsira etu rayali yau.
17 Wali i Pue to rato’o etu, batuanginya Nosa i mPue Allah. Pasi i sema-sema tau to re’e Nosa i mPue Allah resi ia, tau etu roomo ralapa yako ri ara mporenta to masae.
18 Wali apa saba tamo re’e to mangabombong pampobuuka ngkita to mangaya, see naka kita samparia maya mampobuuka kojo kayawa i mPue. Pampobuuka ngkita etu raporapaka ewa mangalo’a kayawa i mPue ri raya nsami. Wali ri rayanya kita mampobuuka kayawa i mPue etu, kanjo’u-njo’u lengko ngkita darawali si-singkodi kasae-sae dasewaju ewa Ia. Pasi kanjo’u-njo’u tiduga-dugang kayawa ngkita yako resi Nosa i mPue.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA