Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naendae mekai, meyae rore baemale naei wanen mae maei a huwande? Ro miyae hiwa bumare kolonaimilere homo raitainye molate wanen mare yayembe naeise meyae ro miyae hiware eriyei nane merau hiware yemmile naeise mare eriyei!
2 Mayaebe maei uware kaemale homofae wanen. Nebei homofae maei kena une homo moloumekoke nane merau ro miyae nemene nebei homofaene ikowate.
3 Wali Ondofolole a foi faeu foi mai nolone huwewayembe hee, Allah Walilole Roh elae mokombokembe mai kena ura na hele elaukoke. Mai u mekai neme nekeimeyaube huluinye kelaeumi Wali Ondofolo Naei kaliare maei walora mokole. Nebei homofae tinta yae ban nane merau ruka ranne molaikoke ban, nebeibe mai u mekai wa mekai neme yae.
4 Mai wali neme walora maei kena u hara roroyeume Wali Ondofolo a weume hului mokande yae Allah kena foise mokannele.
5 Nebei kalia mokoiboise maei uwana elae wake yae na hului mokomabonde a yae elei, nebeibe Allahlena elae wake kiteume yae mokande.
6 Allahlena elae wake yae maere kiteumeboke ro miyaere wali himalainyeboke yo yae me baeyeumi are heteungekoke nibi neme a ro miyaere kelemamile. Nebei nibi neme Musale walora wali heere folaikoke a walora ban, nebeibe Allahle Roh walora. Musale walora wali heere folaikoke a huluinye ehakoiboi ro miyae Allah bele wahaeikoke nekate, nebeibe Allahle Roh weumi a huluinye hakainye ro miyae wali hena bona u mekai hubanainyele.
7 Musale walora wali heere folaikoke a huluinye ehakoiboi ro miyae Allah bele wahaeikoke. Nebei a yae na hului ro miyaere beko mokowoumi hororebe, Israel ro miyaere Allah nebei a rukane moloukoke ikeumi hee, Allahle one hengko bele ei aungeboke. Allahle one hengko kitainyeboke hehe yae naeungekokene nebei hehe elae ban yeiboyole hororebe, nebeinye ro miyae Musale be yoise kanenainyebondere kabewainye.
8 Nebei wali heere folaikoke a meke heene Allahle one hengko hehe yae naeungekokebe, nebeibe emekai bele Allahle Roh yae Naei are heteungekoke nibi neme ro miyaere wali himalainyeboke yo yae me baeyeumi ana hului aei kena u einye Allahle hehe naemmele wanen a foi huwemmele.
9 Rabuhine ban nebei ro miyaere wali heere folaikokena mere noyoumi a baengko bele fereufakebe, nibi neme Allah ro miyaere wali himalainyeboke yo yae me baeyeumire emekai bele na baengko fereufake.
10 Nana hesele bena wali heere folaikoke a baengko fereufake yae hubawanne, nebeibe nda hee baengko ban mae elande, rabuhine ban nibi neme ro miyae wali himalainyeboke yo yae me baeyeumi a na baengko hele fereufake.
11 Wali heere folaikoke a na hibi mo ohonoyei nane merau elae ban kiyaere baengko fereufakena, emekai bele yae na hibi mo hononende nane merau elae bele Allahle nibi neme ro miyae wali himalainyeboke yo yae me baeyeumi a baengko hele fereufake.
12 Meyae rabo elae halaende Allah are heteungekoke a huluinye mokonde aerene, meyae be bele rabulandeboke Wali Ondofololena a foi faeu foise huwande.
13 Meyae Musa yae mokouboke wanen ban. Israel ro miyae Musa na be yoi Allahle hehe naeukokere ijoko kanenainyebonde belene, na be yoise malo yae feleuboke.
14 Nebei mo ban, nebeibe Israel ro miyae naei u bene wa bene bele elae mokoumiboke. Meke nda hee bele Israel ro miyae Musale walora wali heere foloukoke ikowatebe, malo feleuboke wanen na kena une namman Allahle nene waewae naeise isaeyeiboi kate, rabuhine ban Yesus Wali Ondofolo hila rabo halemande walora nebei malore obuleuboke wanen Allahle nene waewaere yakanaibonde.
15 Nda hee bele yae Musale walora wali heere foloukoke homone ikowatebe, Allahle nene waewaere isaeyeiboi, malo yae feleumiboke wanen na kena u bele feleumi.
16 Nebeibe ro miyae Wali Ondofolore hila rabo halennele hee, nebei malo obuleuboke wanen na u bene wewe konnekonde.
17 Tuhan Yesus Allahle Roh mbai. Makeinye ro miyae Tuhan Yesusle Roh weumi are hakainye yo, Musale walora wali heere foloukoke huluinye ehee bukulu hainyemikondera me ruboumiboke.
18 Nane merau aei be yoi malo efelei yae be nulune erande merau, Tuhanbe nene waewaere ereyanne ro miyaere mokoume Naei uwa nene waewae bele u mekai wanen ibewande. Tuhan Naei Rohre a weunge aere mahi mokommele walora Nenaeijae u mekai neme imokowoume.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA