Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mule ndẽq araq manpaatne banggeang diriq. Laguq tiang mẽlẽ ẽndah banggeang hal-hal saq Allah nyatayang tipaq tiang lẽq dalem wahyu atao dalem penyerioqan.

² Tiang kenal sopoq dengan Nasrani saq empat olas taun saq sampun liwat teangkat ojok langit saq ketelu. (Tiang ndẽq nenaoq napi tetu-tetu awakne saq kerangkatan atao nike cume penyerioqan doang -- cume Allah saq wikan.)

³ Karing sekali tiang sampẽang: Tiang nenaoq bahwe dengan niki teangkat tame ojok Pirdaus. (Tiang ndẽq nenaoq napi tetu-tetu awakne saq kerangkatan atao cume penyerioqan doang -- cume Allah saq wikan.) Lẽq derike dengan nike dengah hal-hal saq ndẽq kanggo teucapang siq manusie dait ndẽq teijinang ẽndah manusie ngucapang hal nike.

⁴ (12:3)

⁵ Mengenai dengan nike saq mẽlẽ tiang banggeang, ndẽqne mengenai diriq tiang mẽsaq. Mengenai diriq tiang, cume hal-hal saq nyatayang kelemahan tiang nike saq mẽlẽ tiang banggeang.

⁶ Seandẽne tiang ẽndah melẽt banggeang sopoq hal, tiang ndẽq mẽlẽ jari dengan saq luwẽq raos saq ndẽq araq isine; tiang ngucapang kebenaran. Laguq tiang tahen diriq tiang, adẽq ndẽq araq dengan saq anggep tiang lebihan lẽman napi saq sampun ie serioq tiang laksaneang atao saq sampun ie dengah lẽman tiang.

⁷ Laguq adẽq tiang ndẽq jari sombong lantaran penyerioqan-penyerioqan saq luar biase nike, tiang teicanin sopoq duwi lẽq dalem awak tiang, nike sopoq utusan Belis jari nyakitin tiang, adẽq tiang ndaq jari sombong.

⁸ Telu kali tiang bedo'e tipaq Tuhan adẽq utusan Belis nike tesediq lẽman tiang.

⁹ Laguq jawab Tuhan, "Rahmat Tiang lẽq side sampun cukup; sẽngaq kuase Tiang malahan jari sempurne lamun side dalem keadaan lemah." Keranaq nike tiang demenan banggeang kelemahan-kelemahan tiang, sẽngaq lamun tiang lemah, make lẽq waktu nike tiang merase Almasih ngelindungin tiang siq kekuatan-Ne.

¹⁰ Jari tiang seneng siq kelemahan-kelemahan tiang. Tiang ẽndah seneng lamun lantaran Almasih tiang tepitnah, tiang ngalamin kesulitan, tepalẽq-palẽq dait tiang ngalamin kesusahan. Sẽngaq lamun tiang lemah, make lẽq waktu nike tiang jari kuat.

¹¹ Mule tetu tiang sampun miaq diriq tiang maraq dengan bodo -- laguq side pade saq maksaq tiang jari maraq nike. Setetune side pade harus puji tiang. Sẽngaq timaq tiang ndẽq bedowẽ arti napi-napi, tiang tetu-tetu ndẽq kalah kance "rasul-rasul" saq luar biase nike!

¹² Keajaipan-keajaipan kance hal-hal saq luar biase dait pegawẽan-pegawẽan saq belẽq-belẽq sampun tenyatayang tipaq side pade secare sabar, jari buktiang bahwe tiang sopoq rasul.

¹³ Lẽq dalem hal napi side pade kurang teperhatiang, tebanding jemaah-jemaah saq lain? Paling-paling cume dalem hal niki: Bahwe tiang ndẽq nyusahang side pade jari ngebẽng tiang biaye. Tiang tunas maap lẽq kesalaqan tiang nike!

¹⁴ Mangkin niki sampun saq ketelu kaline tiang siep jari jangoq side pade. Dait tiang ndẽq mẽlẽ nyusahang side pade, sẽngaq saq tiang melẽtang ndẽqne napi saq side pade ẽpẽang, laguq diriqde. Sẽngaq ndẽqne bije-bije saq harus boyaqang dengan toaqne napkah, laguq dengan toaq saq harus boyaqang bije-bijene napkah.

¹⁵ Keranaq nike, angen tiang seneng dait rẽde ngurbanang selapuq-lapuqne umaq side, malahan diriq tiang mẽsaq ẽndah. Lamun maraq nike rase kasih tiang lẽq side pade, napi patut side pade kurang ngasihin tiang?

¹⁶ Jari, side pade setuju bahwe tiang ndẽq uwah nyusahang side pade. Laguq araq saq bebase bahwe tiang niki licik; bahwe tiang mauq keuntungan lẽman side pade lantaran tiang nipu.

¹⁷ Nike ndẽqne mungkin! Napi langan dengan-dengan saq tiang utus nike tiang bait keuntungan lẽman side pade?

¹⁸ Tiang sampun ngutus Titus lumbar jangoq side pade, dait tiang ngutus semeton seiman saq lain nike lumbar bareng-bareng kance ie. Napi Titus bait keuntungan lẽman side pade? Laguq tiang pade kance due begawẽan siq tujuan saq pade dait napi saq tiang pade laksaneang nike kadu care saq pade!

¹⁹ Iniq doang side pade beranggepan bahwe sengonẽq niki tiang pade kenyeke berusahe bẽle diriq lẽman side pade. Side pade keliru gati! Allah wikan bahwe selapuq saq tiang pade ucapang nike menurut pekayunan Almasih. Dait selapuq saq tiang pade laksaneang nike jari neguqang imande.

²⁰ Tiang kuatir bahwe laun lẽq waktu tiang jangoq side pade, tiang ndait side pade ndẽq maraq napi saq tiang pade harepang. Ndaq-ndaq laun araq saq begejuh, talon atẽ, gedek, mẽlẽ menang mẽsaq, saling pitnah, saling hasut, sombong dait ngorayang.

²¹ Tiang takut lamun tiang dateng malik, tiang gen terendahang siq Allah lẽq julun side pade, dait tiang gen nangis sẽngaq luwẽq lẽq antare side pade saq laẽq bedose, ndẽqman tobat lẽman perbuatan-perbuatanne saq cabul, kotor dait ndẽq patut.

2 Korintus

Video 2 Korintus 12

Ikuti Kami:

KONTAK | PARTISIPASI | DONASI