Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Aminna pe la lit gunana, la banci lang meganjang cakapku. Genduari kuturiken kerna pengenehenen ras ketangkasen i bas Tuhan nari.

² Lit kutandai sekalak Kristen; sepulu empat tahun si nggo lewat ia rempet iangkat ku adep-adepen Dibata i Surga. Ntah kulana ikut terangkat ntah lang, la kueteh -- Dibata metehsa.

³ Sekali nari kukataken: kueteh maka ia rempet iangkat ku Pardis. (Ntah kin e jadi ikut ras kula ntah lang, la kueteh -- Dibata si metehsa.)

⁴ I je ibegina kata-kata si la terbelasken, si la banci ibelasken manusia.

⁵ Kerna kalak si bage me si ku megahken tapi kerna diringku jine gegehku si kurang nge cakapku meganjang.

⁶ Bahanlah maka nggit aku meganjang ngerana; aku labo seri ras kalak si la sehsa, sabap si tuhu-tuhu nge si kukataken e. Tapi kutahan kal maka la meganjang cakapku, sabap la ateku ikira kalak aku lebih asa si iidahna i bas aku dingen si nggo ibegina i bas aku nari.

⁷ Gelah ula meganjang ukurku kerna pengenehenen si mejin e, ibereken duri i bas dagingku, eme persuruhen Iblis guna ngeligas aku gelah ula meganjang ukurku.

⁸ Telu kali aku ertoto man Tuhan kerna si enda, gelah ipedauhna min si e i bas aku nari.

⁹ Tapi ngaloi Tuhan, "Cukup kap lias ateKu man bandu; sabap gegehKu serta kap i bas gegeh si kurang." Erkiteken si e meriah kal ukurku meganjang ngerana kerna gegehku si kurang gelah gegeh Kristus mengketi aku.

¹⁰ Emaka senang kuakap i bas gegehku si kurang, i bas aku igombang-gombangi kalak, i bas aku kepiceten, bage pe i bas aku isiksa kalak, i bas kesusahen erdandanken Kristus. Sabap adi gegehku kurang, i je me maka aku megegeh.

¹¹ Perbahanenku enda bali kal ras perbahanen kalak bodoh -- tapi kam nge si maksasa maka aku bage. Kam nge arusna mujiken aku. Sabap aminna gia labo kai pe aku, si tuhuna labo aku sitik pe ketadingen asangken rasul-rasulndu "si mbelin la teralang e".

¹² Tandana maka aku rasul tangkas kap teridah man bandu arah dahinku, eme: megenggeng aku i bas kai-kai pe, idahndu tanda-tanda sengget si kubahan, kulakoken perbahanen-perbahanen si ngelebihi kuasa manusia, bage pe perbahanen-perbahanen si mejin.

¹³ I bas kai kin kam kurang kuperdiateken ibandingken ras perpulungen-perpulungen si deban, seakatan la aku jadi tanggungenndu? Mahapkenlah kesalahenku e.

¹⁴ Enda me petelu kaliken aku nggo ersikap lako ndahi kam, janah i bas si e pe labo ateku aku jadi tanggungenndu. Labo sikerajangenndu, tapi kam kap ateku. Sabap labo metunggung anak-anak pepulung erta guna orang tuana, tapi orang tua nge si pepulung erta guna anakna.

¹⁵ Senang ukurku engkeriken si lit i bas aku, janah lebih asa si e, diringku jine pe nggit aku engkorbankenca guna kam. Reh kurangna kin kekelengenndu man bangku adi sampur kekelengenku man bandu?

¹⁶ Tentu iakuindu nge maka labo pernah kam kuberati. Tapi lit ka nge si ngatakenca maka kusidingi kam alu tipu ras akalku.

¹⁷ Kuga kin? Pernah kin kubuat untung i bas kam nari arah kalak si kusuruh ndahi kam?

¹⁸ Kupindo man Titus gelah idahinandu, bage pe kusuruh senina si deban ikut ras ia. Lit kin Titus muat untung i bas kam nari? Ma bali nge perukuren ras perbahanen kami?

¹⁹ Iakapndu kin kidekah enda iusahaken kami mbela diri kami i adep-adepenndu? Lang! I adep-adepen Dibata, i bas persadan ras Kristus nge si tuhuna kami ngerana. Janah kerina si ilakoken kami e, o si kukelengi, gunana mbangun kam kap.

²⁰ Mbiar aku maka adi reh pagi aku ndahi kam, kudapeti kam la bagi si kuarapken, bage pe aku la bagi si iarapkenndu. Mbiar aku maka kudapeti kam pagi rubat, sician-cianen, gara ukur, pengilas ukur teman alu peganjangken bana, mahan-mahani si la tuhu kerna teman, sicekurak-cekuraken, sigombang-gombangen, ras perpulungen la ratur.

²¹ Mbiar aku maka adi reh pagi aku ndahi kam, mela kuakap ibahan Dibatangku i lebe-lebendu erkiteken kegagalenku. Mbiar ka pe aku maka nterem kalak si nggo erbahan dosa i bas paksa si nggo lewat tangis aku ibahanna sabap lalap ia la nggit jera erlagu la mehuli, erlua-lua, dingen ndalanken perbahanen si la meteh mela.

2 Korintus

Video 2 Korintus 12

Ikuti Kami:

KONTAK | PARTISIPASI | DONASI