Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Appala’ doangi Karaeng Salomo angkana, "O Batara, la’bi Kingaiangngangi ammantang lalang ri sassanna rammanga.

² Kamma-kamma anne kubangungangKi’ se’re bangunang lompo, untu’ tampa’ pammantanganTa satunggu-tungguna."

³ Le’baki appala’ doang, nagilimmi kalenna karaenga mae ri sikontu ra’yaka niaka ammenteng anjoreng, nampa napappalakkang barakka’Na Allata’ala ke’nanga.

⁴ Nakana, "Riolo le’baki a’janji Batara mae ri manggeku Daud, angkana, ‘Baku’na Kuerang assulu’ ummakKu battu ri Mesir sa’genna anne alloa, tena manna se’re kota ri Israel le’ba’ Kupile untu’ a’jari tampa’na nibangung balla’ panynyombang mae ri KalengKu, siagang tena manna sitau Kupile untu’ ampimpingi ummakKu Israel. Mingka kamma-kamma anne Kupilei Yerusalem untu’ a’jari tampa’ panynyombang mae ri KalengKu. Na ikau Daud, Kupileko untu’ ammarenta mae ri ummakKu.’ Nipujimi arenNa Karaeng Allata’alana Israel le’baka anrupai anjo janjinNa!"

⁵ (6:4)

⁶ (6:4)

⁷ Nampa nakana pole Salomo, "Manggeku Daud, le’ba’ anrancanakangi untu’ ambangung balla’ tampa’ panynyombang mae ri Karaeng Allata’alana Israel.

⁸ Mingka Nakana Batara ri ia, ‘Anjo pattujunnu bajiki.

⁹ Mingka, teai ikau, passangalinna ana’nuji lambangungi anjo BallakKu.’

¹⁰ Kamma-kamma anne Narupaimi janjinNa Batara. A’jari karaemma’ ri tu Israel ansambeangi manggeku, siagang le’ba’ tommi kubangung balla’ sambayanga untu’ Batara, Allata’alana Israel.

¹¹ Lalang ri anjo Balla’Na Batara le’ba’mi kupasadia tampa’na Patti Parjanjianga iamintu napammantangngia batu parjanjianNa Batara siagang umma’ Israel."

¹² Le’ba’mi appare’ Salomo balla’-balla’ tinggi ri tangnga-tangngana paranglakkenna Balla’Na Batara. La’buna siagang sangkara’na massing-massing 2,2 metere’, tinggina 1,3 metere’. Nai’mi Salomo ri anjo balla’-ballaka ri dallekanna ngaseng ra’ya’ niaka hadere’, siagang a’dalle’ mangei ri tampa’ pakkoro’bangnganga. Akkullei nicini’ ri sikontu taua. Nampa akkulantu’, napatara rua-rua limanna nai’ ri langika, nampa appala’ doang angkana,

¹³ (6:12)

¹⁴ "O Batara, Allata’alana Israel! Tena sangkammanTa ri langika yareka ri buttaya! Kirupai janjinTa siagang Kipappicinikangi pangngamaseanTa mae ri ummatTa majarreka siagang attojeng-tojenga pa’mai’na mannuruki mae ri Katte.

¹⁵ Le’ba’mi Kirupai janjinTa mae ri manggeku Daud. Anjo apa Kipa’janjianga le’ba’mi Kirupai anne alloa.

¹⁶ Le’ba’ tommaKi’ a’janji mae ri manggeku angkanaya punna attojeng-tojengi jari-jarina mannuruki ri hukkung-hukkunTa sangkamma todong ia, ma’nassa nia’ sitau battu ri anjo jari-jarina lammarenta salaku karaeng ri Israel sa’genna satunggu-tungguna. Kamma-kamma anne, o Karaeng Allata’alana Israel, poro Kirupai ngaseng tollalomi apa le’baka Kipa’janjiang mae ri anjo manggeku Daud, atanTa.

¹⁷ (6:16)

¹⁸ Mingka o Allata’ala, maka ma’nassa ero’ tojenjaKi’ ammantang ri anne tompo’na buttaya, ri tangnga-tangngana rupataua? Manna sikontu langika tagannaki luara’na untu’ Kipammantangngi, la’biangampa naanne balla’ sambayang kubangunga!

¹⁹ O Batara, Allata’alaku, anne inakke atanTa’! Mingka poro Kipilangngeri laloi pappala’ doangku, siagang Kiturukianga’ pappalakku.

²⁰ Dasi-dasi naKijagai allo bangngi anne balla’ le’baka Kipile a’jari tampa’ panynyombang mae ri Katte. Dasi-dasi nabattu rate ri pammantanganTa ri suruga naKipilangngeria’ siagang Kipamopporang dosaku siagang umma’ Israel, iamintu ummatTa, punna andallekang ri anne ballaka siagang appala’ doang mae ri Katte.

²¹ (6:20)

²² Punna nia’ se’reang tau nikapang sala mae ri paranna tau siagang nierang mange ri tampa’ pakkoro’bangnganTa lalang ri anne BallatTa untu’ assumpa angkanaya tena nasala,

²³ o, Batara, poro Kipilangngeri laloi battu ri suruga nampa Kitappuki parkarana anne ata-atanTa. Kihukkungi salaya nampa Kilappassang tenaya nasala.

²⁴ Punna nibeta ummatTa Israel ri musu-musunna lanri dorakana ke’nanga, nampa assesse’ lalang siagang napakala’birikKi’ ammotere’ salaku Batara, nampa battu mae ri anne BallatTa kammayatompa appala’ doang appala’ popporo’ mae ri Katte,

²⁵ dasi-dasi naKipilangngeri ke’nanga battu ri suruga. Dasi-dasi naKipamopporang dosana anne ummatTa, siagang Kierang ammotere’ mange ri pa’rasangang le’baka Kipassareang mae ri boe-boena ke’nanga.

²⁶ Punna doraka ummatTa mae ri Katte nampa Kihukkung ke’nanga iamintu tena Kippaturung bosi, nampa toba’ ke’nanga battu ri dosana siagang ammotereki ke’nanga ampakala’birikKi’ salaku Batara, nampa andallekang mae ri anne BallatTa, siagang appala’ doang ri Katte,

²⁷ o Batara niaka ri suruga, poro Kipilangngeri laloi ke’nanga. Siagang Kipammopporangi dosana ata-atanTa umma’ Israel. Kiajaraki ke’nanga anggaukangi apa tojenga. Le’baki anjo, o Batara, Kipaturummi bosia naung ri anne pa’rasanganTa, iamintu pa’rasangang le’baka Kipassareang mae ri ummatTa untu’ a’jari pa’rasanganna sa’genna satunggu-tungguna.

²⁸ Punna nituju anne pa’rasanganga siagang bala kacipurang yareka garring, yareka nipanraki lamung-lamunna ri anging bambang, nipanraki ri olo’ yareka katimbang, yareka punna nibunduki ummatTa ri musu, yareka nitujui ri garring,

²⁹ poro Kipilangngeri laloi pappala’ doanna ke’nanga. Punna nia’ battu ri UmmatTa Israel si’na pa’mai’na appala’ doang ampatarai limanna mae ri anne BallatTa,

³⁰ poro Kipilangngeri battu ri pammantanganTa ri suruga siagang Kipamopporangi ke’nanga. IKatteji bawang angngassengi atinna rupataua. Lanri kammana anjo Kibalasa’mi mae ri tunggala’ taua situru’ massing panggaukang-panggaukanna,

³¹ sollanna tuli malla’ siagang mappilangngeri mae ri Katte lalang ammantanna ke’nanga ri pa’rasangang Kipassareanga mae ri boe-boena ikambe.

³² Punna nia’ bansa maraeng ri pa’rasangang bellaya allangngereki passala’ kalompoanTa siagang kakoasanTa, siagang angkanaya tuli sadiaKi’ untu’ annulung, nampa battu mae ri anne BallatTa untu’ appala’ doang mae ri Katte,

³³ dasi-dasi naKipilangngeri anjo pappala’na battu ri pammantanganTa ri suruga siagang Kiturukiang anjo pappala’na. Lanri kammana anjo sikontu bansaya ri anne linoa lanaasseng maKi’ siagang lamannuruki mae ri Katte sangkamma ummatTa Israel. Lanaassengi ke’nanga angkanaya iaminne Balla’ kubangunga tampa’ untu’ anynyomba mae ri Katte.

³⁴ Punna Kiparentakang UmmatTa untu’ a’lampa mange a’bundu’ angngewai musua, nampa manna pole kemae ammantang ke’nanga, na’dalle’ mae ke’nanga ri anne kota Kipilea siagang appala’ doang a’dalle’ mae ri anne Balla’ le’baka kubangung untu’ iKatte,

³⁵ dasi-dasi naKipilangngeri ke’nanga battu ri suruga anjo pappala’na, siagang Kisarei ke’nanga pammetang.

³⁶ Punna doraka UmmatTa mae ri Katte — sikontutojenna tena manna sitau tadoraka — lanri Kibalang parekang ke’nanga nibeta ri musua lanri larroTa, nampa nierang ke’nanga ri musunna salaku tunitahang mange ri se’reang pa’rasangang bella yareka ambani,

³⁷ dasi-dasi naKipilangngeri pappala’ doanna ke’nanga. Punna anjoreng ri pa’rasanganga nabokoi ke’nanga dosa-dosana, nampa appala’ doang mae ri Katte siagang namangakui angkanaya dorakami siagang a’gau’ ja’dalaki ke’nanga, o Batara, Kipilangngeri laloi pappala’ doanna ke’nanga.

³⁸ Punna anjoreng ri pa’rasanganga attojeng-tojengi siagang tulusuki pa’mai’na ambokoi dosa-dosana, siagang appala’ doangi ke’nanga a’dalle’ mae anrinni ri pa’rasangang Kipassareanga mae ri boe-boena ikambe, a’dalle’ mae ri kota le’baka Kipile siagang ri anne Balla’ le’baka kubangung untu’ iKatte,

³⁹ poro Kipilangngeri laloi siagang Kikamaseangi ke’nanga battu ri pammantanganTa ri suruga. Kipamopporangi sikontu dosana ummatTa.

⁴⁰ Kamma-kamma anne, o Allata’alaku, poro Kiparhatikang laloi ikambe siagang Kipilangngeri laloi sikamma pappala’ doang nipabattua mae ri Katte battu ri anne tampaka.

⁴¹ Ammenteng maKi’ nai’ kamma-kamma anne, o Karaeng Allata’ala! Kammayatompa antama’ maKi’ anrinni ri anne BallatTa siagang anjo Patti Parjanjiang pammatei kakoasanTa na Kiammantang anrinni sa’genna satunggu-tungguna. Kibarakkaki laloi sikontu jama-jamanna imang-imanTa, siagang dasi-dasi namate’ne sikontu ummatTa lanri bajitTa mae ri ke’nanga.

⁴² O Karaeng Allata’ala, tea’ laloKi’ sorongbokoi anne karaeng le’baka Kipile. Kiu’rangi laloi pangngamaseanTa mae ri Daud atanTa."

2 Tawarikh

Video 2 Tawarikh 6

Ikuti Kami:

KONTAK | PARTISIPASI | DONASI