Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ra’yat Yehuda mele ban ngangkat Yowahas epajumenneng rato e Yerusalim epagante Yosiya, ramana.
2 Yowahas yuswana tello lekor taon e bakto jumenneng rato Yehuda, ban marenta e Yerusalim tello bulan abidda.
3 Nekho rato Messer nawan Yowahas, se pas egiba ka Messer. Yehuda esoro majar pesse opet bannya’na tello ebu pa’ ratos kilo salaka ban tello polo empa’ kilo emmas. Saellana jareya Elyakim, taretanna Yowahas, bi’ Nekho epajumenneng rato; asmana Elyakim eoba epadaddi Yoyakim. Saellana jareya Yowahas pas ebakta ka Messer.
4 (36:3)
5 Yoyakim yuswana sagame’ taon e bakto jumenneng rato Yehuda, ban marenta e Yerusalim sabellas taon abidda. Yoyakim jareya dusa ka Guste Allahna.
6 E bakto Nebukadnezar rato Babil arebbu’ Yehuda, Yoyakim etangkep, laju ebakta sambi ekalenthong ka Babil.
7 Sabagiyan dhari rang-barang se larang argana e Padalemman Socce bi’ Nebukadnezar eangko’ laju esaba’ e karatonna e Babil.
8 Careta laenna parkara Yoyakim, tamaso’ sabarang lalampa’anna se juba’ sarta sakabbinna kajahadanna, la ecathet e dhalem ketab Sajarana To-rato Isra’il ban Yehuda. Pottrana, iya areya Yoyakhin, jumenneng rato, agante ramana.
9 Yoyakhin yuswana ballu bellas taon e bakto jumenneng rato Yehuda, ban marenta e Yerusalim abidda tello bulan sapolo are. Yoyakhin dusa keya ka PANGERAN.
10 E bakto taon agante, Rato Nebukadnezar ngangko’ Yoyakhin ka Babil ekagabay tawanan; rang-barang se larang argana e Padalemman Socce egiba keya. Saellana jareya majadhi’na Yoyakhin, iya areya Zedekiya, bi’ Nebukadnezar epajumenneng rato Yehuda ban Yerusalim.
11 Zedekiya yuswana salekor taon e bakto epajumenneng rato Yehuda, ban marenta e Yerusalim sabellas taon abidda.
12 Zedekiya jareya dusa keya ka PANGERAN, Guste Allahna. Ta’ kasokan marendha ban ta’ kasokan atoro’ ka Nabbi Yeremiya se manapa’ dhabuna PANGERAN ka salerana.
13 Rato Nebukadnezar maksa Zedekiya asompa kalaban asmana Allah estowa ka salerana. Tape dhi-budhina Zedekiya aberonta’ ka Nebukadnezar. Zedekiya paggun cengkal ka PANGERAN, Allahna Isra’il; ta’ kasokan atobat dhari sa-dusana, ban ta’ kasokan abali ka PANGERAN.
14 Laen dhari jareya, Padalemman Socce se bi’ PANGERAN la eteptebbagi kaangguy Salerana malolo, epanajjis bi’ pin-pamimpinna Yehuda, bi’ mam-imamma ban ra’yadda, sabab reng-oreng jareya noro’ nyemba brahala ban nerowe cara odhi’na sa-bangsa se dusa e sabingkerra.
15 PANGERAN, Allahna bangatowana, li-baliyan ngerem otosan-otosan maenga’a ommadda, sabab Salerana neser ka ommadda jareya ban eman ka Padalemmanna.
16 Tape otosan-otosan jareya egabay en-maenan bi’ reng-oreng gella’, bi-nabbina ekala’-gella’ ban ta’ eparduli dhabuna. Dhi-budhina PANGERAN ce’ dukana ka reng-oreng jareya, sampe’ reng-oreng jareya ta’ bisa lopot dhari okomanna.
17 Daddi PANGERAN maguli atena rato Babil epalorok reng-oreng Yehuda jareya. Rato Babil laju mate’e reng-oreng Yehuda se gi’ dha-ngodha, tamaso’ se badha e dhalem Padalemman Socce. Tadha’ settonga se ekaneserre, towa ngodha, lake’ bine’, sake’ otaba baras. Reng-oreng jareya kabbi bi’ Allah epassra’agi ka rato Babil.
18 Kas-pakakassa Padalemman Socce, ban rang-barang se arga, bariya keya dunnyana rato ban ba-ponggabana, erampas kabbi bi’ rato Babil, laju egiba ka nagara Babil.
19 Geddhungnga kottha Yerusalim epagujur, kottha jareya eobbar, tamaso’ Padalemman Socce ban sakabbinna karaton se badha e kottha jareya, ban rang-barang se larang argana se gi’ badha e ton-karaton jareya.
20 Ra’yat se salamet eangko’ ka Babil. E jadhiya reng-oreng Isra’il ekadunor bi’ rato Babil sarta bi’ toronanna sampe’ bakto Karaja’an Persiya neggu’ kakobasa’an.
21 Daddi kalakon apa se dhabuwagi PANGERAN kalaban parantara’anna Yeremiya ja’ nagara jareya bakal ta’ ekennenga tamenne pettong polo taon abidda menangka gantena on-taon Sabat se ta’ eparduli.
22 E taon se kapeng settong pamarenta’anna Kores, rato Persiya, PANGERAN alampa’agi apa se la edhabuwagi kalaban parantara’anna Nabbi Yeremiya. PANGERAN maguli atena Kores kaangguy makalowar papakon se ebaca’agi e saantero karaja’anna. Monyena kantha reya:
23 "Areya’ parentana Kores, rato Persiya! PANGERAN, Allah se ngobasane sowarga madaddi sengko’ rato se marenta saantero dunnya, ban makon sengko’ maddek padalemman se eatorragi ka Salerana e Yerusalim e dhaera Yehuda. Daddi ba’na kabbi se daddi ommadda Allah kodu abali dha’ essa’! Moga-moga ba’na elindhungana bi’ GUSTE Allahna!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA