Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ta’ saapa abidda dhari jareya tantara Mo’ab ban Amon, abareng ban sakutuna iya areya tantara Meunim, nyerrang Yehuda.

² Pas badha oreng se manapa’ kabar jareya ka Rato Yosafat, "Ce’ bannya’na tantara Edom dhari temorra Tase’ Mate aloroga junandalem, Guste. Hazezon-Tamar ampon ekobasae moso gapaneka." (Hazezon-Tamar reya nyama laenna se eangguy ka En-Gedi.)

³ Yosafat pas tako’, sarta laju adu’a nyo’on petodu ka PANGERAN. Saellana jareya ra’yadda eparenge parenta sopaja padha apowasa kabbi.

⁴ Dhari saneyap kottha e Yehuda oreng entar ka Yerusalim kaangguy menta tolong ka PANGERAN.

⁵ Reng-oreng jareya abareng ban reng-oreng Yerusalim akompol e palataran se anyar e Padalemman Socce. Rato Yosafat ngadek e adha’na reng-oreng jareya,

⁶ sarta adu’a epakaja, "Adhu, GUSTE Allah, Pangeranna bangatowa abdidalem sadaja! Junandalem Allah e sowarga sareng marenta sadajana bangsa e bume. Junandalem kobasa sareng kowat; tadha’ oreng settonga se bisa alaban ka Junandalem.

⁷ Junandalem Allah abdidalem. E bakto ommattepon Junandalem, bangsa Isra’il, dhateng ka nagara ka’dhinto, Junandalem ngojuk reng-oreng se e bakto gapaneka badha e ka’dhinto. Nagara ka’dhinto sareng Junandalem laju eparengngagi ka toronanna Ibrahim, sahabattepon Junandalem, epadaddi gadhuwannepon kantos salanjangnga.

⁸ Toronannepon Ibrahim gapaneka ampon enneng e ka’dhinto sareng maddek padalemman se ebadhi kennengnganna oreng abakte ka Junandalem. Reng-oreng gapaneka oneng

⁹ ja’ manabi narema okoman lantaran sa-dusana, sareng ekenneng paperrangan, panyaket otaba kalaparan, reng-oreng gapaneka kengeng nyabis ka Junandalem sareng manjeng e adha’epon padalemman kennengnganna kabakteyan ka’dhinto. Manabi ngadhebbi karekongan, reng-oreng gapaneka kengeng adu’a ka Junandalem, dineng Junandalem tanto meyarsa’agi sareng apareng partolongan.

¹⁰ Samangken bangsa Amon, Mo’ab sareng Edom alorok bangsa ka’dhinto. E bakto bangatowa abdidalem sadaja dhateng dhari Messer, sareng Junandalem ta’ eedine ngennengnge nagarana sa-bangsa gapaneka. Daddi bangatowa abdidalem sadaja lebat jalan se moter. Bangsa Amon ta’ epaancor, jugan bangsa Mo’ab sareng Edom.

¹¹ Samangken, kadi ka’dhinto se ejalannagi sa-bangsa gapaneka ka bangsa abdidalem, ngojuga bangsa abdidalem dhari nagara paparengngepon Junandalem ka’dhinto.

¹² Junandalem Allah abdidalem! Okommagi sa-bangsa ka’issa’, sabab abdidalem ta’ kobasa ngadhebbi tantarana moso se saka’dhinto bannya’epon se nyerranga abdidalem sadaja. Abdidalem ta’ oneng kodu kadi ponapa, daddi abdidalem sadaja nyander ka Junandalem nyo’ona tolong."

¹³ Sabatara jareya reng-oreng lalake’an Yehuda ban binena sarta na’-ana’na padha manjeng e adha’na Padalemman Socce.

¹⁴ E antarana oreng se bannya’ jareya badha oreng Lewi se anyama Yahaziyel, ana’na Zakhariya dhari kaom Asaf e dhalem garis toronanna Benaya, Yeiyel, Matanya. E bakto jareya Yahaziyel ekobasae Errohna PANGERAN,

¹⁵ laju adhabu, "Guste Rato Se Molja sareng tan-taretan sadajana. PANGERAN adhabu sopaja junandalem sareng sadajana ra’yat ja’ sampe’ kaelangan pangarep otabana tako’ ngadhebbi tantarana moso se bannya’ ka’dhissa’. Sabab se aperrang Allah, banne junandalem sareng ra’yat.

¹⁶ Lagguepon, e bakto moso lebat e lorong ga’-ongga’an e Zis, pas serrang. Junandalem badhi tapapaga sareng moso ka’dhinto e konco’na cora se nojju ka sagara beddhi e seddi’na Yeruwel.

¹⁷ Junandalem sareng ra’yat ta’ mabi aperrang e dhalem paperrangan ka’dhinto. Meyos saos sadajana ka kennengngan se ampon etantowagi, pas nante’ e kennengngan gapaneka. Junandalem sareng ra’yat bakal ngoladana PANGERAN apareng kamennangan ka junandalem. He reng-oreng Yehuda ban Yerusalim, ba’na ta’ osa kene’ ate otaba tako’. Mara maso’ ka dhalem paperrangan jareya, PANGERAN tanto nolonge ba’na!"

¹⁸ Rato Yosafat laju asojud. Ra’yadda padha noro’ asojud kabbi nyemba ka PANGERAN.

¹⁹ Reng-oreng Lewi dhari kaom Kehat ban Korah manjeng, laju asorak moji PANGERAN, Allahna Isra’il.

²⁰ Kalagguwanna gi’ petteng, ra’yat kalowar terros ka sagara beddhi e seddi’na Tekowa. E bakto mangkada, Yosafat apessen kantha reya, "Ra’yat Yehuda ban Yerusalim! Paparcaja ka GUSTE Allahna ba’na, tanto ba’na kellar aperrang. Payakin ka sabarang se edhabuwagi bi-nabbina ba’na, tanto ba’na ahasel!"

²¹ Saellana arembak ban ra’yat, rato laju makon reng-oreng se tamaso’ padhuwa sowara ngangguy saragamma se biyasana eangguy e dhalem ra-opacara kusus e dhalem agama. Padhuwa sowara jareya kodu abaris epabagus ban epalebur e adha’na barisanna tantara, sambi anyanye, "Molja’agi PANGERAN! Kataresna’anna tadha’ pegga’na!"

²² E bakto padhuwa sowara jareya molae asorak anyanye, tantarana moso se teppa’na nyerrang bi’ PANGERAN epasalbut.

²³ Tantara Amon ban Mo’ab nyerrang tantara Edom sampe’ tadha’ karena. Saellana jareya tantara Amon ban Mo’ab padha saleng serrang dibi’, aperrang amba’ pate.

²⁴ E bakto tantara Yehuda napa’ ka manara panjaga’an e sagara beddhi ban ngabassagi kennengnganna mosona, reng-oreng Yehuda jareya nangale’e mayyidda mosona ajalamperran e tana. Tadha’ settonga dhari mosona jareya se gi’ odhi’.

²⁵ Yosafat ban reng-orengnga pas padha entar arampas barangnga moso. Se ekenneng rampas ce’ bannya’na; ebin, parlengkaban, kalambi, ban rang-barang laenna se padha arga. Saellana makompol rang-barang jareya tello are abidda, rang-barang laenna gi’ bannya’, daddi tapaksa edina.

²⁶ E are se kapeng empa’ kabbi padha akompol e Cora Pojiyan, laju moji PANGERAN polana sabarang se la elampa’agi Salerana. Lantaran jareya cora jareya enyamae "Pojiyan".

²⁷ Yosafat laju mimpin sakabbinna pasukanna abali ka Yerusalim kalaban gumbira, sabab PANGERAN la makala’agi mosona.

²⁸ Sanapa’na ka kottha, reng-oreng jareya abaris ka Padalemman Socce eerenge calempong ban tarompet.

²⁹ Ra-nagara laenna padha tako’ kabbi e bakto ngedhing baramma PANGERAN se la makala so-mosona Isra’il jareya.

³⁰ Daddi Yosafat bisa marenta nagarana kalaban taremtem, ban PANGERAN marenge rato jareya kataremtemman e saantero nagarana.

³¹ Yosafat jumenneng rato e bakto yuswana tello polo lema’ taon, ban marenta e Yerusalim sagame’ taon abidda. Ebuna iya areya Azuba pottrana Silhi.

³² Yosafat padha ban Asa, ramana, alampa’agi sabarang se bagus e dhalem pangoladanna PANGERAN.

³³ Tape kennengnganna panyemba’anna brahala se badha neng e man-dhimman ta’ epaancor. Ra’yat gi’ ta’ mantep onggu atena se abakte ka Allahna bangatowana.

³⁴ Careta laenna parkara Yosafat, dhari awwal sampe’ ka aherra pamarenta’anna, ecathet e dhalem Caretana Yehu Pottrana Hanani se badha e dhalem ketab Sajarana To-rato Isra’il.

³⁵ E settong bakto Yosafat rato Yehuda akanca ban Ahaziya rato Isra’il, se bannya’ alampa’agi kajahadan.

³⁶ E palabbuwan Ezion-Geber rato se kadhuwa jareya abadhi pal-kapal eangguy alajar ka Tarsis.

³⁷ Tape Nabbi Eliyezer pottrana Dodawa dhari kottha Maresa ngatore parengeddan ka Yosafat, atorra, "Sarrena junandalem akanca sareng Ahaziya, PANGERAN badhi ngancora pa-ponapa se elampa’agi junandalem." Daddi pal-kapal gella’ laju ancor kabbi, sampe’ padha ta’ bisa alajar sakale.

2 Tawarikh

Video 2 Tawarikh 20

Ikuti Kami:

KONTAK | PARTISIPASI | DONASI