Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Erroh Allah ngobasane Nabbi Azarya pottrana Oded,
2 sampe’ nabbi jareya meyos nyabis ka Rato Asa, laju adhabu, "Rato Asa, ngereng peyarsa’agi, ban oreng Yehuda sarta Benyamin kabbi, mara padha edhingngagi! GUSTE, Pangeran semma’ ka junandalem manabi junandalem semma’ ka Salerana. Manabi junandalem nyo’on petodu ka PANGERAN, tanto eparenge. Namong manabi junandalem ta’ parduli, junandalem ta’ kera eparduli jugan.
3 Ampon abit onggu Isra’il ta’ ngabdi ka Allah se lerres, ta’ gadhuwan kom-hokom se kodu etoro’, sareng ta’ gadhuwan mam-imam se ngajara ommat gapaneka.
4 Namong e bakto manggi kasossa’an, ommat Isra’il padha nyo’on tolong ka PANGERAN, Allahna Isra’il. Bangsa Isra’il nyo’on petodu dhari Pangeran, sareng Pangeran laju eparenge.
5 E jaman gapaneka oreng ta’ aman ajalanan, sabab e saneyap nagara badha baridhu.
6 Bangsa se settong nendhes bangsa settonganna, kottha se settong nendhes kottha settonganna, sabab Allah madhateng baridhu ka sa-bangsa gapaneka.
7 Namong junandalem kodu kowat sareng bangal. Ehteyarrepon junandalem tanto ahasel."
8 E bakto Asa meyarsa dhabuna Azarya pottrana Oded jareya, samangadda rabbang pole. La-brahala laju epanyengla kabbi dhari nagara Yehuda ban Benyamin, ban dhari tha-kottha se la epakala e Pagunongan Efraim; mezbana PANGERAN se badha e taneyanna Padalemman Socce laju epateppa’.
9 Bannya’ oreng Efraim, Manasye ban Simeyon noro’ Asa, laju aenggun e dhaera karaja’anna, sabab reng-oreng jareya nangale’e ja’ PANGERAN nolonge Asa. Asa makon reng-oreng jareya kabbi ban ra’yat Yehuda sarta Benyamin
10 akompol e Yerusalim. Daddi reng-oreng jareya padha akompol e bulan se kapeng tello’ taon se kapeng lema bellas pamarenta’anna Asa.
11 E are jareya reng-oreng jareya ngatorragi ka PANGERAN sape pettong atos meggi’ ban dumba pettong ebu meggi’, ollena rampasan perrang se egiba mole.
12 Reng-oreng jareya ajanji ka PANGERAN odhi’a menorot kasokanna PANGERAN, Allahna bangatowana, kalaban ate ban sokmana.
13 Sapa’a bai, towa ngodha, lalake’ babine’, se ta’ abakte ka PANGERAN masthe eokom mate.
14 Reng-oreng jareya asompa ka PANGERAN, sowarana epakaja, neptebbana janji jareya. Saellana jareya laju padha asorak sarta nope tarompet.
15 Ra’yat Yehuda padha perak kabbi polana la asompa bi’ ate se mantep. Reng-oreng jareya abakte ka PANGERAN, ban PANGERAN kasokan narema reng-oreng jareya, sarta apareng kataremtemman e nagarana.
16 Saellana jareya Rato Asa maambu emba bine’na se anyama Ma’akha, dhari pangkadda menangka Rato Ebu sabab Ma’akha abadhi arcana brahala se cemmer kaangguy Asyera, dibana kalandhuwan. Arca jareya bi’ Asa epagujur ban epaancor, laju eobbar e Cora Kidron.
17 Maske ta’ sakabbinna kennengnganna panyemba’anna brahala e nagara jareya epaancor bi’ Asa, tape saomorra Asa paggun esto ka PANGERAN.
18 Emmas ban salaka sarta rang-barang laenna ollena rampasan perrang kaagunganna ramana ban salerana dibi’ esaba’ kabbi e Padalemman Socce, eatorragi ka PANGERAN.
19 Sampe’ taon se kapeng tello polo lema’ e dhalem pamarenta’anna Asa ta’ tao badha perrang pole e nagara jareya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA