Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton-semeton saq tiang kasihin! Ndaq percaye lẽq sebilang roh, laguq uji juluq roh-roh nike, napi roh nike asalne lẽman Allah atao ndẽq. Sẽngaq luwẽq nabi palsu sampun begerame ojok mbẽ-mbẽ.

² Maraq niki entane adẽq side pade nenaoq napi nike Roh Allah atao ndẽq: Sebilang roh saq ngaku bahwe Deside Isa rauh ojok dunie jari manusie, roh nike dateng lẽman Allah.

³ Laguq roh saq ndẽq ngakuq Deside Isa, roh nike ndẽqne dateng lẽman Allah. Roh nike roh penentang Almasih. Side pade sampun dengah bahwe roh nike gen dateng, dait mangkin ie sampun araq lẽq dalem dunie niki.

⁴ Laguq bije-bije tiang, side pade asalne lẽman Allah. Side pade sampun ngalahang nabi-nabi palsu, sẽngaq Roh saq araq lẽq side belẽqan kuasene kance roh saq araq lẽq dalem dunie.

⁵ Nabi-nabi palsu nike bebaos mengenai hal-hal dunie, dait dunie dengah napi saq ie pade sampẽang, sẽngaq ie pade asalne lẽman dunie.

⁶ Laguq ite niki asalne lẽman Allah; dait dengan saq kenal kance Allah, dengah ucapante. Dengan saq asalne ndẽq lẽman Allah, ndẽqne dengah ucapante. Siq care nike ite nenaoq bẽdene antare Roh kebenaran dait roh saq nyesatang.

⁷ Semeton senamian saq tiang kasihin! Silaq ite saling kasihin sopoq kance saq lain, sẽngaq kasih nike asalne lẽman Allah. Sebilang dengan saq bedowẽ rase kasih, asalne lẽman Allah dait kenal kance Allah.

⁸ Dengan saq ndẽq bedowẽ rase kasih, ie ndẽq kenal kance Allah; sẽngaq Allah nike kasih.

⁹ Siq care niki kasih Allah nike tenyatayang lẽq ite, siq care ngutus Bije-Ne saq nunggal ojok dalem dunie adẽq ite mauq idup langan Bije-Ne nike.

¹⁰ Niki kasih nike: Ndẽqne ite saq sampun ngasihin Allah, laguq Allah saq ngasihin ite dait saq sampun ngutus Bije-Ne adẽq langan Ie, ite tedamẽang lẽman dose-dosente.

¹¹ Semeton senamian saq tiang kasihin, lamun maraq nike belẽqne kasih Allah lẽq ite, ite ẽndah harus saling kasihin sopoq kance saq lain.

¹² Ndẽq araq sopoq dengan juaq saq sampun serioq Allah. Laguq lamun ite saling kasihin, Allah tetep araq lẽq dalem ite dait kasih-Ne jari sempurne lẽq dalem ite.

¹³ Sẽngaq Allah sampun ngicanin Roh-Ne tipaq ite, make ite nenaoq bahwe ite sampun araq lẽq dalem Allah, dait Allah lẽq dalem ite.

¹⁴ Tiang pade sampun serioq Bije-Ne, dait tiang pade beriteang bahwe Ie teutus siq Bapa jari Juruselamet dunie niki.

¹⁵ Sai-sai saq ngaku bahwe Deside Isa nike Bije saq asalne lẽman Allah, Allah araq lẽq dalem dengan nike, dait dengan nike ẽndah araq lẽq dalem Allah.

¹⁶ Ite sampun nenaoq dait percaye mengenai kasih Allah tipaq ite. Allah nike kasih. Dengan saq idupne tekuasein siq kasih, dengan nike araq lẽq dalem Allah, dait Allah lẽq dalem ie.

¹⁷ Siq care niki kasih Allah tejariang sempurne lẽq dalem ite, adẽq ite parek tipaq Allah siq keyakinan saq pasti lẽq Jelo Pengadilan, sẽngaq idupte lẽq dunie niki pade maraq idup Almasih.

¹⁸ Lẽq dalem kasih, ndẽq araq rase takut, sẽngaq kasih saq sempurne nelangang selapuq rase takut. Sẽngaq lẽq dalem rase takut araq siksaq hukuman dait dengan saq takut ndẽqman sempurne lẽq dalem kasih.

¹⁹ Ite ngasihin, sẽngaq Allah sampun juluan ngasihin ite.

²⁰ Lamun sopoq dengan bebase, "Tiang ngasihin Allah," laguq ie ndẽq ngasihin semetonne, dengan nike penduste. Sẽngaq dengan saq ndẽq ngasihin semetonne saq ie serioq, ndẽq mungkin bau ngasihin Allah saq ndẽq ie serioq.

²¹ Niki prẽntah saq teicanin siq Almasih tipaq ite: Sai juaq saq ngasihin Allah harus ẽndah ngasihin semetonne.

1 Yohanes

Video 1 Yohanes 4

Ikuti Kami:

KONTAK | PARTISIPASI | DONASI