¹ Ano dang tininak de wenya, bahem na-en taiblibirida gwen– zini men zen ebon mae onak anakan egu gweꞌan zalye, “Ëe an Alap mo Enho nakore olsa de ebe mae hap ayang gul gwizimdin hip de zi.” Sap yasik tabin hip de zini mes beyakam yaing gwezak. Zep emki akasibirida gwen– dekam de anakan tame tabin hipye, “San ha zeno mae mo tawa tabinni Alap onakorena? San ha Zebon onakore naka hom?”
² Zi de damnak anakan tonbirida gwenna, “Kristus Yesus Zen eiwa zi tangankam hata zaka,” zen dekam de dam tasin, “Zebon eiwa mes Alap mo Enhona ing gwe heka.”
³ Hwena zen de anakan gunkum, “Yesus zen zi tangankam hom hata zaka,” kire zini zen Alap mo olsa hom ayang gul gweꞌara. Zen hwena Kristus mo jal zi mo olsa ayang gul gweꞌara. Emsa mes anakan tawa da gwibik, “Kristus mo jal zini sa hata zala.” Hwena zeno enhona angkam man okamanak syal gwe-gweꞌara.
⁴ Ano walas, nen an hwena Alap mo wei-wik gunnu, nen zebe yasik ta gwibin hip de zi mo tawa tabinni insa ja kul guk kini gwenan. Sap Alap mo Enhona men Zen nesa ing gwe hebiridaka, Zen Zen– soson Zi niye. Dowal mo kigi mo enhona in zen auhu-kama enlala zinik ing gwehe gwenda, zen soson naka hom.
⁵ Yasik ta gwibin hip de zini, zen hwena auhu-kama enlala zi. Zep zeno mae mo ol toranna hen auhu-kama enlala en san. In zep ahakore auhu-kama enlala zini desa i-san i-san neibirida gwenan.
⁶ Nen an hwena Alap mo bi gwibiridanna. Zep neno mae mo ol toranna, zen Alap onakorena. Men zen Alapsa tame dak, zen en zep nesa nasalbirida gwenan. Alap mo walaskam de gubirida gwen srem wenya, zen zep nesa nasalbirida srem gwe-gwenan. Nen dekon zebe anakan kles oso gwenan, “An eiwa Alap mo Enho nakore naka ayang gul gweꞌara,” ahaksa, “An yasik tabin hip de zi.”
⁷ Ano dang tininak de wenya, nen nenaka kwasang gwibirida gwen, sap kwasangna zen Bian zere onakon nep hata gwizimninzal. Tingan men zen kwasang naban lowehe gwenan, zen Alap zere mo wei-wik gun walas hen Zenaka de tame tan wenya.
⁸ Men zen kwasang sremkam lowehe gwenan, zen hom Alapsa tame daꞌan. Sap Alap Zen kwasang-kwasang enna.
⁹ Zen in zep Alap Tane aha-ere zemka nesa dikim ngaya tabin hip zer soneka. In zebe anakan dam ulsuk gwenan, “Eiwa, Alap mo nebe mae hap de kwasangna mam tanganna.”
¹⁰ Nen home orep Alapsa enna ola gweblak. Hwena Zen en serkam nesa kwasang gwibirida gweka, zep hendep Tane aha-ere zemka nebe mae hap de kwasang hap zerguku– neno mae mo kareksa dikim ngan gulsuzimdin hipye.
¹¹ Ano dang tininak de wenya, Alap in kirekam nesa kwasang gwibiridaka, zep nen hen kirekam nen nenaka kwasang gwibirida gwen.
¹² Zini nen hom tangane Alapsa nwekam hla la gwenan. Hwena nen de nenaka kwasang gwibirida gwenkam, dekam zep nwe-mase gwe-gwenan: Alap man nesa goleaha-en gweꞌara, hen zeno kwasangna dekam zep neno mae mo enhonak bil gwe-gwenan.
¹³ Zen mes zere mo Enhona nebe mae hap zerzimki, nen in zebe anakan dam ulsuk gwenan, “Nen mese Deban eraha-en gwek, hen Zen neban mae goleaha-en gweꞌara.”
¹⁴ Ëe zere hon de ang ta gwen wenya, ee kie ere mae mo nwekam Yesussu hla la gwek. In zebe angkam anakan eiwa de gul gwizimꞌin, “Bian Zen eiwa mes Tane zemka zer soneka– okamanak de zisi dikim ngaya tabin hipye.”
¹⁵ Zep men zen anakan gu gwenna, “Yesus Zen eiwa Alap mo Tane,” kire zini zen mes Alap han zeraha-en gweka, hen Alap mes deban zeraha-en gweka.
¹⁶ Zep angkam nen mese tangan Alap mo nebe mae hap de kwasangna tame uk, hen nen angkam ema tangan kwasangna insa blol eibiꞌin. Eiwa, Alap Zen kwasang-kwasang enna. Zep men zen kwasang naban lowehe gwenan, Bian mes deban mae goleaha-en gweka, hen zen mes Bian han neraha-en gwek.
¹⁷ Kirekam de zeraha-en gwenkam, zen dekam zep zere mo kwasangna neno mae mo enhonak saltil gwenan, hendep zen de bil gwenkam dekam saher sremkam esa aumwa hap de klis gunnuk Alapsa ertower. Nen mae hap esa esaher gwe srem gwer: Sap nen kim nenaka kwasang eibirida gwenan, nen dekam Yesus mo kime okamanak lowehe gwenan.
¹⁸ Zep bap nen Alapsa anakan airi gweblan, “Zen sa nesa karek tabiri.” Zi mo enhonak, Alapsa de airiblan naban Alap onakore kwasangna in han bejen siri nen. Alap onakore kwasang de neno mae mo enhonak bil gwenkam, zen dekam zep Alapsa de airiblan hap de enlalana jek-jak gwe-gwenda. Zep zi de nama Alapsa airi gweblanna, dekam man dam gwesinin, “Zeno enhonak de Alap onakore kwasangna hom bil gweꞌan.”
¹⁹ Sap nonola Alap nesa kwasang gwibiridaka. Nen in zebe hen angkam Zebon onakore kwasang naban lowehe gwenan.
²⁰ Zep zi de anakan gunnu, “Ëe ama Alapsa ensa lwa gweblanan,” hwena zen de Kristen bose zemka husus gwibirida gwenna, zen boton tamna. Kristen bose zemka de kwasang gweblan sremkam, zere mo nwekam de hla ta gwen naka, zen ki hwena banakan de hla ta gwen srem Zini Alap ensa enna lwa gweblan hap?
²¹ Sap Bian mes nesa gubiridaka, “Zini men zen Asa enna nola gweblanan, zen diki Kristen bose zemka zen hen kwasang gwibirida gwen.”