¹ Suratna an kitak de Tesalonikak de Kristen zi hip, Bian Alap ne Teipsin Zini Kristus Yesus nik mo bi eibiridan wenya kip, Paulus, Silas, hen Timotius mae onakon: Dawem! Diki Alap Zen sa kwasang-kwasang zemka mamkam ebe mae hap gol gwizimdi. Hen nen zeno taha terenak esa lowehe gwer.
² Aya wal oso wal, ee hen-henkam ebon mae onakone dawemna Bian Alap hap olbla tine gwenan. Eno mae mo bosem-sesa de gubin nibane etan-etankam anakan en sone gweblanan, “Bian, ee dawemsa ebe hap ol gweblaꞌan, sap Tesalonikak de zini zere mae mo Bian Yesussu de taibliblansa dawemkam aha zi hip noltrei gwizimꞌin, hen zeno mae mo kwasangna mes aha zisi de mas gwibirida gwenkam wet sozimk. Hen zen Kristus de lwahal zannak dep dawemkam kara ne gweblaꞌan, in zep tatem ezauk gweꞌan.” In zebe kirekam nere mae mo Bian hap dawemna ebon mae onakon ol gweblanan.
³ (1:2)
⁴ Aya wal oso wal, ee orep mese anakan dam ulsuk, “Alap man emsa kwasang gwibiridaka, in zep hendep emsa hlil inki.”
⁵ Sap ee kime ol dawemkam emsa tawa la gwibik, em mese dekam anakan dam ulsuk, “An totore olsa hom. An Alap mo ol, soson tanganna.” Dekam zep hen Alap mo Enhona ebon mae ing gwe heka, in zep ola in eno mae mo enhonak dawemkam saltik. Ena hen tawana: Ëe men kirekame ebon mae onak enaka erak makan kang ul gwekye.
⁶ Zep em dekam zebe Bian Yesus mo erak san, hen ano mae mo erakna in san ang tak. Em hen aha zi hip ere mae mo Alapsa de taibliblanna ema oltrei gwizimk. Zao zep hen emsa Desa de taibliblan srem wenyik serkam karek da gwibik. Sap man ki emsa neibirida gwek, hwena em home dekam Yesussu de ang gweblan hap baes tak. Sap Alap mo Enhona man ebon mae isrip-srina ing gul sone gwizimki, zebe ola insa dawemkam urensik gwek.
⁷ In zep Makedonia hen Akaya mo langnak de Kristen zini ebon mae onakon anakan hla nul gwek, “Kristen zini diki kirekam zere mae mo eini noltrei gwizimnin.”
⁸ Bian Yesus onakore ol dawemna insa dekam zep ebon mae onakon Makedonia hen Akaya san dep nolteisik. Hwena desan en hom. Tingare zi-e zi-e san eno mae mo Alapsa de taibliblanna insa mes nolteisik. Zep ee etan enda kore zisi asa anakan gubiridal? – “Zen mes dawemkam eKristen gwek.”
⁹ Sap ee kime desa oletowe gwenan, zen man kitak asa anakan aisil neibirida gwenan, “Tesalonikak de zini dawemkam emsa dokwa-kwak nuk. Zere mae mo ensasa srem dowal yang tabinni dekam zep hli nulidak. Dekam zep hwena Ngaya Zini eiwa de Alapsa betek neblak.”
¹⁰ Zen man hen asa nenbirida gwenan, “Tesalonikak de zini dawemkam Yesussu lwahal zannak dep kara ne gweblanan.” In eiwa, aya wal oso wal, sap Alap eiwa tin nikon Tane zemka ngaya taka, zep Zen eiwa ngatan zi mo lang nakon sa nesa kwang guluda hala– nen de Alap mo jalsa okamana awe hlaun srem hap. Sap Alap mo jal de okamanak hatan hap dena man tangan golek de gweꞌan.