Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Rato Daud makon sakabbinna pamimpinna Isra’il akompol e Yerusalim. Daddi para kapala suku, para kaom oreng agung orosanna pamarenta’an, la-kapalana kaom, reng-oreng se ngoros ebin ban dhi’-andhi’na rato sarta tra-pottrana — pandha’na para kaom oreng agungnga karaton, parwira ban oreng penting, kabbi padha akompol e Yerusalim.
2 Daud ngadek e adha’anna reng-oreng jareya, laju adhabu, "Tan-taretan se sabangsa, mara padha edhingngagi! Sengko’ la abit aneyat maddegga padalemman se teptep egabaya kennengnganna Petthe Parjanjiyan, panongko’anna padana PANGERAN Guste Allahna sengko’ ban ba’na. Sengko’ la nyadhiya’agi pa-apa se ekaparlo kaangguy maddek padalemman se egabaya kennengngan mon abakteya ka Salerana.
3 Tape bi’ Allah sengko’ ta’ eparengngagi ngalakone jareya sabab sengko’ reya parjurit se la bannya’ magili dharana oreng.
4 PANGERAN, Allahna Isra’il, la mele sengko’ ban tang toronan epamarenta’a Isra’il salanjangnga. Kaangguy nyadhiya’agi settong pamimpin PANGERAN mele suku Yehuda, ban dhari suku jareya PANGERAN mele kalowargana tang rama. Ban dhari sakabbinna anggotana kalowargana tang rama jareya PANGERAN ngarsa’agi mele sengko’ ban madaddi sengko’ ratona saantero Isra’il.
5 Sengko’ eparenge ana’ sabannya’na ban dhari sakabbinna tang ana’ jareya PANGERAN mele Sulaiman se epamarenta’a Isra’il, karaja’anna PANGERAN.
6 PANGERAN adhabu barinna’ ka sengko’, ‘Sulaiman ana’na ba’na se bakal maddeggagiya bengko Sengko’. Ana’na ba’na jareya bi’ Sengko’ la epele epadaddi Tang ana’, ban Sengko’ bakal daddiya ramana.
7 Mon Sulaiman jareya terros kalaban gu-onggu atoro’ ka sakabbinna Tang hokom ban Tang parenta akantha sateya reya, karaja’anna bi’ Sengko’ epakokowa salanjangnga.’"
8 Daud laju adhabu pole, "Daddi sateya, he tang ra’yat, e ajunanna Allah ban e adha’anna kompolanna sakabbinna oreng Isra’il, iya areya ommadda PANGERAN reya, sengko’ menta’a sopaja ba’na kalaban gu-onggu atoro’a ka sakabbinna papakonna Guste Allah. Kalaban cara se kantha jareya ba’na bisa teptep ngaandhi’ nagara se bagus reya ban nyangkollagi tana reya ka toronanna salanjangnga."
9 Saellana jareya Daud laju adhabu ka Sulaiman, "Na’, mara ba’na ngako Allah ka Allah se esemba ramana reya. Ba’na kodu ngabdi ka Salerana kalaban ate ehlas ban sokalella. Sabab Allah reya ngagali ka sakabbinna pekkeran ban pangaterrona atena oreng. Mon ba’na nyare’e Allah, ba’na masthe tatemmo, tape mon ba’na mongkore Salerana, ba’na bakal etolaga salanjangnga.
10 Kaenga’e pagu-onggu ja’ ba’na la epele bi’ PANGERAN epamaddegga bengko se malolo eatorragi ka Salerana. Daddi, mara lakone jareya bi’ ate se mantep."
11 Saellana jareya Daud massra’agi ka Sulaiman rancana geddhong Padalemman Socce jareya, ban dhang-gudhangnga, sakabbinna kamarra ban Rowang Se Mahasoccena, kennengnganna panyapora’anna dusa.
12 Daud massra’agi keya sakabbinna rancana se la eator e dhalem panggaliyanna kaangguy sakabbinna taneyan ban mar-kamar e sakalenglengnga, ban kaangguy dhang-gudhang panyempennanna parlengkabanna Padalemman Socce jareya sarta dhang-gudhang panyempennanna tor-ator ka PANGERAN.
13 Bariya keya epassra’agi rancanana se magiya mam-imam ban oreng Lewi se epapo’-galumpo’a, parkara pa-apa se kodu elakone reng-oreng jareya, iya areya lalakonna e Padalemman Socce ban pameyara’anna sakabbinna pakakas kabakteyan.
14 Salerana apareng petodu parkara baramma carana agarap emmas ban salaka se kodu ekagabay kas-pakakas,
15 se ekagabaya damar ban ko’-tongko’na,
16 kaangguy ja-meja salaka, ban kaangguy saneyap meja emmas baddhana roti sasajin se eatorragiya ka Allah.
17 Bariya keya du-petodu parkara barampa bannya’na emmas morne se kodu ekagabay garpu, tobung ban gendhi, parkara bannya’na salaka ban emmas se ekagabaya reng-pereng,
18 parkara bannya’na emmas morne se ekagabaya mezba kennengnganna pangobbaranna dupa ban se ekagabaya kareta baddhana ca-arcana kerub se kalembangnga epenthang e attassa Petthe Parjanjiyanna PANGERAN.
19 Rato Daud laju adhabu, "Jareya kabbi la badha e dhalem rancana se etoles menorot petodu se eparengngagi PANGERAN dibi’ ka sengko’ se kodu ejalannagi."
20 Saellana jareya Rato Daud laju adhabu pole ka Sulaiman pottrana, "Ba’na payakin ban pabangal. Mara lalakon jareya molae, ban ja’ sampe’ ba’na tako’ ngadhebbi apa’a bai. GUSTE Allah se esemba sengko’ bakal nolongana ba’na. Ba’na ta’ kera edina’agi bi’ Salerana. Salerana bakal teptebba badha e seddi’anna ba’na sampe’ lalakon jareya mare kabbi.
21 Para imam ban reng-oreng Lewi la eberri’ bagiyan lalakon kaangguy kabakteyan e Padalemman Socce jareya. Kang-tokang se ahli e dhalem lalakonna bang-sebang bakal nolongana ba’na kalaban ate senneng, ban para pamimpin bi’ sakabbinna ra’yat bakal atoro’a ka parentana ba’na."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA