Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Siapa are wattu ribokoanganna, matemi Nahas, Karaeng Amon, nampa Hanun ana’ bura’nena ansambeangi a’jari karaeng.
2 Nakanamo Karaeng Daud, "Anjo Nahas iami sahabakku tamamminraya, jari musti kamma tonga’ anjo mae ri Hanun ana’na." Jari akkirimmi Daud tunisuro mange ri pa’rasangang Amon untu’ ansaleori lanri matena manggena. Ri wattunna anrapi’ ke’nanga mange ri Amon,
3 nakanamo sikamma pamimpinna anjo pa’rasanganga ri Karaeng Hanun, "Teaki’ appikkiriki angkanaya nakiringi Daud battu anjo tunisurona, lanri napakala’biri’na manggeta! Nakiringi anjo sikamma taua mae anrinni salaku mata-mata untu’ ansalidiki pa’rasanganta, sollanna akkulle narampasa’!"
4 Jari najakkala’mi Hanun anjo sikamma tunasuroa Daud, nacukkuruki janggo’na ke’nanga, napolong-polongi pakeanna ke’nanga sa’genna ri aya’na mami bodona. Nampa nasuro ke’nanga a’lampa.
5 Mingka siri’-siri’mi ke’nanga ammotere’. Jari a’lampami ke’nanga mange ri Yerikho. Ri wattunna nipabattu anjo passalaka mae ri Daud, akkirimmi pasang sollanna ammantang ri Yerikho anjo sikamma tau nasuroa sa’genna attimbo ammotere’ janggo’na ke’nanga.
6 Nampa naassemmo kalenna Karaeng Hanun siagang tu Amon angkanaya passala’ panggaukanna ke’nanga nanimusu ke’nanga ri Daud. Lanri kammana anjo akkirimmi ke’nanga 34.000 kilo battala’na pera’ mange ri Mesopotamia Bageang Rate, kammayatompa mange ri Maakha siagang Zoba ri Siria untu’ assewa 32.000 kareta pa’bundukang siagang tantara a’jarang. Jari battumi tantarana Maakha siagang sikamma anjo kareta pa’bundukang nisewaya, nampa appare’ kema ri ampi’na Medeba. Kammayatompa tu Amon, battu ngaseng tommi ke’nanga battu ri kota-kotana ke’nanga untu’ a’bundu’.
7 (19:6)
8 Ri wattunna nalangngere’ Daud anjo passalaka, nasuromi Yoab siagang sikontu tantarana untu’ maju mange a’bundu’ angngewai musua.
9 Assulu’mi tu Amon na naatoro’ barisanna ke’nanga ri dallekang pakke’bu’ lompona Raba, iamintu ibukotana pa’rasanganna ke’nanga. Nampa sikamma karaeng niakamo battu untu’ ambantui ke’nanga, naatoro’ tommi barisanna ke’nanga ri paranga.
10 Nacini’mi Yoab angkanaya niparitangngami ri pasukanna musua battu ri dallekang siagang battu ri boko. Lanri kammana napileimi tantara Israel kaminang bajika nampa naboli’ ke’nanga assidallekang siagang tantara Siria.
11 La’binnaya battu ri tantara Israel napassareammi mae ri andi’na iamintu Abisai, na naatoro’ barisanna ke’nanga assidallekang tantara Amon.
12 Nakanamo Yoab ri anjo andi’na, "Punna tenamo nakukkulle attahang andallekangi tantara Siria, akkaro-karoko battu ambantua’. Mingka, punna ikau tenamo nuttahang andallekangi tantara Amon, inakke labattu ambantuko.
13 Sa’barakko! Umba kibarjuang siagang barani untu’ bansata siagang untu’ kota-kotaNa Allata’alata. Tapporo Nagaukang Batara apa Nakaerokia."
14 Majumi Yoab siagang pasukanna mange a’bundu’, sa’genna larimo tantarana Siria.
15 Nacini’na tu Amon angkanaya larimi tantarana Siria, lari tommi ke’nanga ambokoi Abisai nampa ammunduru’ antama’ ri kotaya. Le’baki nabunduki Yoab tu Amon, ammotere’mi ri Yerusalem.
16 Naassemmi kalenna tu Siria angkanaya nibetami ke’nanga ri tu Israel. Jari nakio’mi tantarana ke’nanga battua ri daera bageang rayanganna Binanga Efrat, nampa nasuro anjo tantarana ke’nanga a’bundu’ na nipimping ri Sobakh, panglima tantarana Hadadezer Karaeng Zoba.
17 Nalangngere’na Daud anjo passalaka, napasse’remi sikontu pasukang Israel, nampa a’limbang ri Binanga Yordan siagang naatoro’ barisanna sidallekang siagang tu Siria. Na’bundu’mo ke’nanga,
18 sa’genna nitunrummo ammunduru’ tantarana Siria ri tantarana Israel. Nabunomi Daud siagang pasukanna 7.000 jaina tau paerang kareta pa’bundukang siagang 40.000 jaina tantara a’jappa bangkeng. Sobakh, panglimana tantara Siria nibuno tommi.
19 Ri wattunna nacini’mo sikamma karaeng nikoasaia ri Hadadezer angkanaya nibetami ke’nanga ri tantarana Israel, appala’ damemi ke’nanga mae ri Daud, natundu’ mae ri ia. Le’baki anjo taerokami tu Siria ambantui pole tu Amon.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA