Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lanai ndekahsa kenca si e mate Nahas raja Amon, janah anakna Hanun jadi raja.
2 Nina Raja Daud, "Arus kucidahken kesetianku erteman man Hanun, bali ras si ilakoken bapana man bangku." Emaka isuruh Daud persuruhen ncidahken maka ia pe ikut rate ceda. Kenca seh persuruhen e i Amon, janah ngadap man Raja Hanun,
3 ngerana peminpin bangsa Amon man raja nina, "Iakapndu kin nghamati bapandu maka isuruh Daud persuruhen e ncidahken maka ia pe ikut rate ceda ras kam? Lang! Isuruhna persuruhen e ku jenda jadi mata-mata mperdiateken negeri enda, gelah banci ikuasaina!"
4 Emaka itangkap Hanun persuruhen e Daud ndai, icukurna janggutna, ikeretna uisna seh buta-butana jenari ipelawesna.
5 La kalak persuruhen e pang mulih perban melana akapna. Kenca ibegi Daud kai si jadi, itenahkenna kata maka persuruhen e tading lebe i Jeriho, janah ula mulih seh janggutna turah ka.
6 Igejap Hanun ras bangsa Amon maka nggo ibahanna Daud jadi musuhna, emaka iberekenna 34.000 kilo pirak man Mesopotami Gugung, ras man negara Maaka ras Soba i Siria guna gereta kuda ras jelmana.
7 Gereta kuda si 32.000 si isewana e ras tentera raja Maaka reh janah majekken kemahna deher Medeba. Bangsa Amon pe ndarat i belang-belang negerina nari jenari ersikap guna erperang.
8 Kenca ieteh Daud kai si nggo jadi, iperentahkenna Joap ndarat ras kerina tentera.
9 Bangsa Amon pe luar, janah muat ingan i lebe pintu gerbang kota Raba, sedangken raja-raja si nggo reh nampati muat ingan i bas mbalmbal.
10 Idah Joap maka pasuken musuh nandangi nerang ia arah lebe ras arah pudi nari, emaka ipilihna tentera Israel si merawana, janah iaturna ingan tentera petala-tala ras bangsa Siria.
11 Si lebihna iberekenna i teruh pinpinen seninana Abisai, muat inganna guna ngelawan bangsa Amon.
12 Nina Joap man seninana e, "Adi idahndu bangsa Siria naluken aku reh kam nampati aku, bage pe adi bangsa Amon naluken kam reh aku nampati kam.
13 Jadilah megegeh, janah ula mbiar! Erperanglah kita asa gegehta guna bangsanta ras kota-kota Dibatanta. Janah peraten Dibatalah jadi."
14 Asum Joap ras tenterana maju erperang, kiamen bangsa Siria.
15 Kenca idah bangsa Amon bangsa Siria kiam, bangsa Amon pe kiam dingen mundur ku bas kota. Kenca bage mulih Joap ku Jerusalem.
16 Igejap bangsa Siria maka ia nggo talu ibahan bangsa Israel, emaka ibabana pasukenna i negara Siria si i lepar Lau Eprat nari, ipinpin Sadok, puanglima tentera Raja Hadadeser i Soba nari.
17 Kenca ibegi Daud kerna si e ipepulungna kerina tentera Israel, ikeparina Lau Jordan, jenari itamakenna tentera e petala-tala ras bangsa Siria. Pertempuren pe mulai
18 emaka iasak kalak Israel tentera Siria mundur. Daud ras tenterana munuh 7.000 tentera Siria si ergereta kuda bage pe 40.000 tentera si erdalan nahe. Sobak puanglima tentera Siria pe ibunuhna.
19 Kenca raja-raja si ijajah Hadadeser meteh maka ia nggo talu ibahan Israel, ibahanna perdamen ras Daud jenari jadi jajahen Daud ia kerina. Jenari lanai pernah nggit bangsa Siria nampati bangsa Amon.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA