Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sanggah hundul-hundul sahali si Daud ibagas rumahni, nini si Daud ma dompak nabi Natan, “Tonggor ma, marianan do ahu ibagas rumah na humbani hayu ares, tapi anggo poti parpadanan ni Jahowa i toruh ni lampolampo do.”
2 Nini si Natan ma dompak si Daud, “Pasaud ham ma sagala na ibagas uhurmu ai, hasomanan ni Naibata do ham!”
3 Tapi bornginni ai roh ma hata ni Naibata hubani si Natan,
4 “Laho ma ho, hatahon ma hubani juakjuak-Ku si Daud: Sonon do hata ni Jahowa: Seng bulih ho pajongjong Bangku sada rumah bahen ianan-Ku.
5 Ai seng ongga ope Ahu marianan ibagas rumah singgan ni ari dob Huarahkon tangkog halak Israel ronsi sadari on, sai minsah-insah do Ahu tong humbani lampolampo na sada hubani lampolampo na sada nari, humbani ianan na sada hubani ianan na sada nari.
6 Barang ija pe Ahu minsah-insah rap pakon ganup halak Israel, mintor ongga ma Huhatahon age sangkababah hata hubani atap ise humbani panguhum ni Israel, na Huhatahon marmahan bangsang-Ku: Mase ma lang ipauli hanima Bangku sada rumah humbani hayu ares?
7 On pe hatahon ma hubani juakjuak-Ku si Daud: Sonon do hata ni Jahowa Zebaot: Ahu do na mangarahkon ho, hun parmahanan, humbani na mangirik-irik biribiri, ase ho gabe kopala manggomgom bangsang-Ku halak Israel.
8 Ahu do mangkasomani ho barang huja pe ho manlangkah, anjaha domma Husiapkon ganup munsuhmu i lobeimu; anjaha bahenon-Ku do goranmu tarambilan, songon goran ni sada halak na sangap i tanoh on.
9 Ambahni ai, tontuhonon-Ku ma sada ianan bani bangsang-Ku halak Israel, anjaha suanhonon-Ku ma sidea ijai, ase marsonang-sonang sidea ijai marianan, seng marhabiaran be, anjaha seng be sunsahan ni halak parjahat songon na dob salpu in.
10 Singgan ni ari dob Hupabangkit panguhum manggomgomi bangsang-Ku halak Israel, anjaha patundukon-Ku do sagala munsuhmu. Tapi, pabanggalon-Ku do anggo ho, anjaha pajonamon-Ku do ginomparmu.
11 Tapi dob gok ari-arimu laho martumpu hubani ompungmu, pajongjongon-Ku ma ginomparmu i pudimu, sada humbani anakmu, pajonamon-Ku ma harajaonni.
12 Ia do na paulihon sada rumah Bangku, anjaha pajonamon-Ku do paratasni ronsi sadokah ni dokahni.
13 Ahu do gabe Bapa bani, anjaha ia gabe anak-Ku, seng osoron-Ku humbani idop ni uhur-Hu, songon na dob Huosor ai humbani halak na i lobeimu.
14 Maningon totap do ia bahenon-Ku ibagas rumah-Ku pakon ibagas harajaon-Ku ronsi sadokah ni dokahni; paratasni pe totap do ronsi sadokah ni dokahni.”
15 Romban hubani hata ai, anjaha romban hubani haganup pangungkabon ai do si Natan marsahap hubani si Daud.
16 Dob ai masuk ma si Daud hundul hu lobei ni Jahowa, jadi nini ma, “Ise ma ahu, Ham Jahowa Naibatangku, anjaha ise ma ginomparhu, ase sonai pambobai-Mu bangku?
17 Maotiktu ope on nini uhur-Mu, Ham Naibata; ibere Ham ope bagah-bagah hubani ginompar ni juakjuak-Mu hubani panorang na sihol roh, anjaha ipatuduhkon Ham do bangku sundut na sihol roh, Ham Jahowa Naibata.
18 Aha ope sihatahonon ni si Daud Bamu marhalanihon ni parpasangap-Mu ai bani juakjuakmu? Itanda ham do tene juakjuak-Mu.
19 Ham Jahowa, halani juakjuak-Mu anjaha romban hubani rosuh ni uhur-Mu do ibahen Ham ganup habanggalon on, ibahen na ipabotohkon Ham ai hubani juakjuak-Mu.
20 Ham Jahowa, seng adong na songon Ham, anjaha seng adong Naibata sobali Ham romban hubani haganup na binogeinami marhitei pinggolnami.
21 Anjaha ija ma adong sada bangsa na legan i tanoh on songon bangsa-Mu halak Israel, na pala Naibata sandiri bingkat martobussi bahen bangsa-Ni, laho mambahen tarambilan goran-Mu marhitei halongangan banggal anjaha na majangin, marhitei na mangusir bangsa sipajuh begu-begu hun lobei ni bangsa-Mu, na tinobus-Mu hun tanoh Masir.
22 Anjaha domma itotapkon Ham bangsa-Mu halak Israel gabe bangsa-Mu ronsi sadokah ni dokahni, anjaha Ham, Jahowa, gabe Naibata ni sidea.
23 Ai pe Ham Jahowa, sai patotap Ham ma hata na dob pinarbagah-bagah-Mu ai pasal juakjuak-Mu pakon pasal ginomparni ronsi sadokah ni dokahni, anjaha bahen Ham ma romban hubani na dob pinarbagah-bagah-Mu ai.
24 Nai ma, saud ma ai, anjaha sai timbul ma goran-Mu ronsi sadokah ni dokahni, ase ihatahon halak: Jahowa Zebaot, Naibata ni Israel, Ia do Naibata bani Israel, anjaha totap do ginompar ni juakjuak-Mu si Daud i lobei-Mu.
25 Ai domma ipatalar Ham, Naibatangku, hubani pinggol ni juakjuak-Mu on, paboa pajongjongon-Mu do ginompar bani. Halani ai do ase pag juakjuak-Mu on martonggo i lobei-Mu.
26 Ai pe Ham Jahowa, Ham do Naibata anjaha domma ibagahkon Ham bani juakjuak-Mu na madear on.
27 Halani ai sai pasu-pasu Ham ma ginompar ni juakjuak-Mu, ase totap ia i lobei-Mu ronsi sadokah ni dokahni; ai barang ise na pinasu-pasu-Mu, Ham Jahowa, ai do na dapotan pasu-pasu ronsi sadokah ni dokahni.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA