Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Genduari Raja Daud nggo ringan i bas istanana. I bas sada wari itenahkenna Nabi Natan jenari nina man bana e, "Genduari aku nggo ringan i bas istana si mejile, si ibahan i bas kayu aras nari tapi Peti Perpadanen TUHAN itamaken i bas kemah."
2 Nina Natan, "Bahanlah kai sura-surandu, sabap Dibata ras kam."
3 Tapi i bas berngi e reh kata TUHAN man Natan nina,
4 "To piseh katangKu man suruh-suruhenKu Daud, 'Labo kam kalakna si majekken rumah pertoton man inganKu.
5 I bas paksa Aku mulahi bangsa Israel i bas bangsa Mesir nari seh genduari, la pernah Aku ringan i bas sada rumah pertoton; Aku ringan i bas kemah jenari miser i bas sada ingan ku bas ingan si deban.
6 I bas gedang-gedang perdalanenKu ras bangsa Israel la pernah Kupindo man peminpin Israel si Kutangkuhken e, ngkai maka la ibangunna man bangKu rumah pertoton si ibahan i bas kayu arus nari.'
7 Emaka kataken man suruh-suruhenKu Daud maka Aku, TUHAN si Mada Kuasa, ngataken man bana, 'Gelgel e kam permakan biri-biri, tapi nggo Kulegi kam i mbalmbal nari jenari Kubahan kam jadi si merentah bangsangKu Israel.
8 Aku nggo ngarak-ngarak kam ku ja pe kam lawes, janah nggo Kukernepken kerina musuh-musuhndu i bas adep-adepenndu nari. Kubahan kam terberita bali ras peminpin si mbelinna i babo doni enda.
9 Nggo Kupilih sada ingan man bangsangKu Israel janah nggo Kutamaken ia i je, i ja ia ringan alu lanai lit ise pe si nindihsa. Kenca bangsangKu bengket ku bas negeri enda nggo ia iserang bangsa si merawa, tapi e lanai banci sekali nari. Erpadan Aku ngkernepken kerina musuhndu janah mereken kesusuren man bandu.
10 (1Taw 17:9)
11 Kenca kam mate jenari ikuburken ras nini-ninindu, Kubahan sekalak i bas anakndu si dilaki nari jadi raja, janah Aku erbahanca kerajanna tetap paguh.
12 Ia me pagi si majekken rumah pertoton man bangKu janah Aku njagasa maka kursi kinirajanna tetap pajek seh rasa lalap.
13 Aku jadi bapana janah ia jadi anakKu. Keleng ateKu man bana la pernah lesap, la bagi perbahanenKu man Saul.
14 Kuangkat sinursurna jadi si ngaturken bangsangKu ras singaturken kinirajanKu seh rasa lalap. Kursi kinirajanna la erkeri-kerin.'"
15 Ituriken Natan man Daud kerina si ipetangkas dingen ikataken TUHAN man bana.
16 Kenca bage lawes Raja Daud ku Kemah Perjumpan, kundul ia je ertoto nina, "O TUHAN Dibata, aku ras keluargangku la metunggung ngaloken kai si nggo IbahanNdu man bangku.
17 Tapi genduari tole denga ka AteNdu IberekenNdu, o TUHAN Dibata; Kam erbahan padan kerna kesusurenku i bas tahun-tahun si nandangi reh. Janah kam, o TUHAN Dibata, PerbahanenNdu man bangku nggo bali ras man kalak si mbelin.
18 Kai denga banci kukataken man BanNdu! ItandaiNdu nge ise aku, tapi bage gia IpehagaNdu aku, suruh-SuruhenNdu.
19 PeraturenNdu dingen sura-SuraNdu kap erbahan si e kerina man bangku, janah ncidahken kinihaganku i bas paksa si nandangi reh.
20 O, TUHAN la lit ise pe bagi Kam; gelgel nari pe nggo me ieteh kami maka Kam ngenca Dibata.
21 La lit bangsa si deban si seri ras Israel, si IpulahiNdu i bas perbudaken nari, lako njadiken ia jadi BangsaNdu jine; arah perbahanen si mbelin ras mejin si IlakokenNdu man bana, mahanca i japa pe Kam terberita, i belang-belang doni enda. IpulahinNdu BangsaNdu i Mesir nari, jenari IpelawesNdu bangsa-bangsa si deban sanga BangsanNdu reh nciatisa.
22 Nggo IbahanNdu Israel jadi BangsaNdu seh rasa lalap janah Kam TUHAN, jadi Dibatana.
23 Emaka genduari o TUHAN Dibata, sehkenlah rasa lalap kerina perpadanen si nggo IbahanNdu kerna aku ras kerna kesusurenku, janah lakokenlah si nggo IkatakenNdu.
24 GelarNdu si mbelin la banci la terberita janah rasa lalap bangsa-bangsa ngataken, 'TUHAN Si Mada Kuasa eme Dibata Israel.' Janah IpetetapNdu kinirajanku i bas sinursurku seh rasa lalap.
25 Pang aku notoken pertotonku enda man BanNdu o Dibatangku, sabap nggo IpetangkasNdu kerina man bangku, suruh-SuruhenNdu, janah nggo IkatakenNdu man bangku maka Kam erbahan kesusurenku jadi raja.
26 O TUHAN, Kam kap Dibata, janah nggo IbahanNdu padan si mbelin man bangku.
27 Mindo aku BaNdu pasu-pasulah kesusurenku maka terus ia ermeriah ukur i bas KiniulinNdu. O TUHAN, Kam nggo masu-masu ia emaka pasu-PasuNdu e tetap tading i bas ia rasa lalap."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA