Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Raja Hiram i Tirus nari nuruh sekalak utusen dagang ndahi Daud. Itenahkenna man Daud kayu aras, tukang-tukang batu, ras tukang kayu, guna erbahan istana.
2 Jenari ieteh Daud maka TUHAN nggo nangkuhken ia jadi raja Israel, janah ibahan TUHAN kinirajan Daud erteguhna guna kiniulin BangsaNa.
3 Iempoi Daud ka piga-piga nari diberu i Jerusalem, janah ipupusna tole anak dilaki ras diberu.
4 Enda me anakna si tubuh i Jerusalem: Samua, Sobap, Natan, Salomo,
5 Ibhar, Elisua, Elpelet,
6 Nogah, Nepeg, Japia,
7 Elisama, Beeliada ras Elipelet.
8 Kenca ibegi bangsa Pilisti maka Daud nggo itangkuhken jadi raja i negeri Israel, ndarat kerina tentera bangsa Pilisti guna nangkap Daud. Emaka luar ka Daud njumpaisa.
9 Emaka seh me kalak Pilisti i Baluren Repaim, janah mulai ia ngerampasi.
10 Nungkun Daud man Dibata, "Kuserang kin bangsa Pilisti e? IberekenNdu nge man bangku kemenangen?" Nina TUHAN, "Seranglah! Aku mereken kemenangen man bandu!"
11 Erkiteken si e iserang Daud bangsa Pilisti i Baal Perasim janah talu ibahanna musuh e. Nina Daud, "Dibata nggo make aku desken banjir njemba tentera musuhku." Emaka ibahan gelar ingan e Baal Perasim.
12 Sanga bangsa Pilisti lompat tading ibahanna berhala-berhala. Emaka iperentahken Daud gelah kerina berhala-berhala e iciluk.
13 Minter ka kalak Pilisti e mulihken ku baluren e, jenari imulaina ka ngerampasi.
14 Isungkun Daud ka sekali nari Dibata. Nina Dibata njabapsa, "Ula serang i jenda nari, tapi kelewetilah, jenari ersikap ngelawan arah lepar ah nari, deher batang balsam nari.
15 Kenca ibegindu sora erdalan i ancuk-ancuk batang balsam e, seranglah minter, sabap Aku erdalan arah lebendu naluken tentera bangsa Pilisti e."
16 Ilakoken Daud bagi si iperentahken Dibata, janah alu bage iasakna bangsa Pilisti mulihken i Gibeon nari seh ku Geser.
17 Gelar Daud terberita ku japa pe, janah ibahan TUHAN maka tiap bangsa mbiar nandangi Daud.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA